Mbouŋ to Yes Israela 140:1-9 in Mutu

¹ O Yoova, ugham mulin ghou ila ndiran samsamia nimadi. Upoon ghou pa yes to tirabrab tamtoghon le naghodi siŋ. Pa vene, tiwaghamun ghou.

² Moghon moghon, matadi ighurghur pa ŋgar samia, ve tipapazaagh tamtoghon pa malmal.

³ Avodi poia maau. Saveeŋ to tipipiyaava ne, iwaghamun tamtoghon kat, inimale moot samia ighan tamtoghon.

⁴ O Yoova, uvool tiou, ve uŋgin ghou. Leso ndiran samsamia tikis ghou sob. Yes to tirabrab tamtoghon le naghodi siŋ, tikalkaal ataam pa tigham ghou natap. Unum sigeu payou, leso tiwaghamun ghou sob.

⁵ Yes to tipapait taudi ve matadi velegin ghom, tauto tighur liis itaghon ataam dige pa tiliis ghou. Yes tiraar malum ila ataam to nalaghlaagh pani, tighaze tisavag ghou.

⁶ You nasaav pa Yoova naghaze: “Yom Maaron tiou.” Ughur taliŋam pa taŋiiz tiou tonene, ve uul ghou.

⁷ O Yoova, Tiina tiou, yom Volaaŋa tiou ariaŋa. Sawa to naneep ila malmal lolo, yom to unum sigeu payou.

⁸ Yoova, ndiran samsamia tilup di, ve tikalkaal ataam pa tiwaghamun ghou. Upoon ataam padi, leso ŋgar todi samia tonowen ighur maau. Upul di tilib payou malep. Pa vene, tipakur di.

⁹ Yes tiluvut ghou, ve tipakur di tighaze tilib payou. Saveeŋ samsamia to ivotvot ila avodi, ighamgham pataŋani payou. Upamuul saveeŋ tonowen imuul ila pa taudi, leso iwaghamun di.

¹ Mbouŋ to David O Yoova, ugham mulin ghau ila zeran sasaghati nimazi. Upoon ghau pa yes tau tiliŋliŋ siŋ pa tamtamon. Mako pale tivaghamun ghau.

² Monmon lolozi ighurghur pa ghamuuŋ ŋgar saghati, ve tipapazaagh tamtamon pa ghamuuŋ malmal.

³ Avozi poia mako. Saveeŋ tau tisiksiki na, ene ivavaghamunia tamtamon kat, imin moot saghati ighan tamtamon.

⁴ O Yoova, uvool tsiau, ve uŋgin ghau. Leso zeran sasaghati tikis ghau sov. Yes tau tiliŋliŋ siŋ pa tamtamon na, tiliil eez to tigham ghau natap. Umin sigheu payau, leso tivaghamun ghau sov.

⁵ Yes tau tipapait tauzi ve matazi veleghin ghom, tauta tighur liis itaghon eez ziige to tikis ghau. Yes tiraar puugh toozi ila eez tau nalaghlaagh pani ne tighe tisaghav ghau.

⁶ Yau nasaav pa Yoova naghe: “Yo Maaron tsiau.” Ughur taliŋam pa taŋiiz tsiau tane, ve uul ghau.

⁷ O Yoova, Tiina tsiau, yo Uleeŋa tsiau ariaaŋa. Saawe tau naleep ila malmal loolo, yo ta umin sigheu payau.

⁸ Yoova, zeran sasaghati tilup zi, ve tiliil eez to tivaghamun ghau. Upoon eez pazi, leso ŋgar toozi saghati tawe ighur mako. Upul zi tiliiv ghau sov. Pale tipakur tauzi.

⁹ Yes tilivutin ghau, ve tipakur zi tighe tiliiv ghau. Saveeŋ sasaghati tau ivotvot ila avozi na, ighamgham pataŋani payau. Upamuul saveeŋ tawe imuul ila pa tauzi, leso ivaghamun zi.