Mbouŋ to Yes Israela 139:9-21 in Mutu

⁹ Ighaze naroov nala pa ndug to ndag iza pani, ma naghur inag to nepooŋ ila te dige ite to ndag izila pani,

¹⁰ nene paam, yom unepneep toman ghou. Ve nimam waan pale ikis ghou, ve ipasaluŋgan ghou pa laghooŋ.

¹¹ Ve ighaze naghason ndoroom pa inim ikau ghou, ma nasaav pa ghazooŋa to isul luvutin ghou pa inim ndoroom, nene paam irau iŋgooz ghou pa matam maau.

¹² Pasa, ndoroom irau ipoon mbeb eta pa matam maau. Mboŋ, yom ughita mbeb tisob tineep ghazooŋa raraate inimale ughita di pa ndag. Tovenen ndoroom ve ghazooŋa, nene raratedi moghon ila matam.

¹³ Yom to ughur babaŋag tisob, ve ulup di tinim ee moghon ilooŋ ila tinaŋ apo lolo.

¹⁴ You nawatag kat: Uraat tiom to naol ne, popoiadi ve ite kat. Tauto namatughez payom, ve napait ghom.

¹⁵ Sawa to nayooŋ ila tinaŋ apo lolo, yom ughita tuag titub ve tiwaseŋgan di. Mbeb to tivot payou pa sawa tonenen, eta iyooŋ pa matam maau.

¹⁶ Tovenen sawa to tinaŋ inaama payou, yom ughita ghou wa. Ve sawa to nepooŋag izi taan, toman sa mbeb to pale ivot payou, nene matam ighur pani, ve timbooda ila rau tiom pataghaaŋ, ghoro tinaŋ ipoop ghou.

¹⁷ Aa Maaron, ŋgar tiom tiina ve poia kat! You nazuaria ghou naghaze le nawatag katin ŋgar tiom. Eemoghon naraua maau. Pasa, yom matam iŋgal mbeb katindi kat.

¹⁸ Ighaze natoova pa nanin di, nene naraua maau. Tilib pa magargaar to naari. Mboŋ, matag iŋgalŋgal ghom tovene ila le ndugizau, ghoro namundig ve naghilaal naghaze yom unepneep toman ghou.

¹⁹ O Maaron, you naghaze yom urab ndiran samsamia tisob timatmaat, ghoro poia! Ve yes to tirabrab tamtoghon le naghodi siŋ, upaghau di tila saguan payou.

²⁰ Koiamŋa tonowen, tighamgham ŋgar samsamia naol ila izam. Tiwatwaat izam sorok pa tipariaaŋ kaarom todi.

²¹ O Yoova, yes to tighur koi payom, you paam naghur koi padi. Ve yes to tizorzoor ghom, lolog padi rita maau.

⁹ Isaav ighe naroov nala pa nugh tau aaz izaa pani, ma naghur niag to lepoogh ila te ziige ite tau aaz izila pani,

¹⁰ ene paam, yo ulepleep tomani ghau. Ve nimam tapir aat ikis ghau, ve ipaduduuŋ ghau pa laghooŋ.

¹¹ Ve ighe naghason ndoroom to ilam ikau ghau, ma nasaav pa ghazooŋa tau isul livutin ghau to imin ndoroom, ene paam irau iŋgooz ghau pa matam mako.

¹² Pasaa, ndoroom irau ipoon gabua eta pa matam mako. Mboŋ, yo ughita gabua isov tigheen ghazooŋa raraate imin ughit zi pa mataaz. Tauvene ndoroom ve ghazooŋa, ene raratezi mon ila yo matam.

¹³ Yo ta ughur gabuaŋag naol isov, ve ulup zi timin eemon iloŋ ila tinaŋ aapo loolo.

¹⁴ Yau nawatagh kat: Uraat tsio ta naol ne, popoiazi ve ite kat. Tauta naroi payo, ve napait ghom.

¹⁵ Saawe tau naleep imin yoŋgaaŋ ila tinaŋ aapo loolo, yo ughita tuag titum ve tivaseŋgai zi. Gabua tau ivot payau pa saawe tana, eta iyooŋ pa matam mako.

¹⁶ Tauvene saawe tau tinaŋ inaam ghi payau, yo ughit ghau wa. Ve saawe to lepoghag izi taan, tomania saa gabua tau pale ivot payau, ene lolom ighur pani, ve tiboode ila rau tsio pataghaaŋ, ra tinaŋ ipoop ghau.

¹⁷ Aa Maaron, ŋgar tsio tiina ve paghuuna kat! Yau nazuari ghau naghe le nawatagh katin ŋgar tsio. Eemon narao mako. Pasaa, yo matam iŋgal gabua katini kat.

¹⁸ Isaav ighe natoova to nanin zi, ene narao mako. Tiliiv sausau to nari. Mboŋ, matag iŋgalŋgal ghom tauvene ila le nughizau, ra naburig ve naghilaal naghe yo ulepleep tomani ghau.

¹⁹ O Maaron, yau naghe yo urav zeran sasaghati tisov timataar, o poia! Ve yes tau tiliŋliŋ siŋ pa tamtamon na, upaghau zi tila soghan payau.

²⁰ Koiamŋa tawe, tighamgham ŋgar sasaghati naol ila yo ezam. Tiwatwaat ezam sorok to tipariaaŋ karom toozi.

²¹ O Yoova, yes tau tighurghur koi payo na, yau paam naghurghur koi pazi. Ve yes tau tizorzoor ghom na, lolog pazi rigta mako.