Mbouŋ to Yes Israela 136:1-22 in Mutu

¹ Lolomim poia pa Yoova ve apaiti. Pasa, ye poia le poia kat.

² Lolomim poia pa Maaron ve apaiti. Pasa, ye ilib pa ndimaronŋa tisob.

³ Lolomim poia pani ve apaiti. Pasa, ye Maaron Tiina To Ilib Pa Ndimaronŋa Tisob.

⁴ Ye moghon to ighamgham mbeb gharatooŋadi to tintina kat.

⁵ Muuŋ, ye ighur mbeb tisob to tineep ila sambam paroŋania. Uraat toni tonowen, ye ighami toman ŋgar le ivot kat.

⁶ Ye ighur taan izala te pogho.

⁷ Ve ighur mbeb tintina tineep ila sambam paroŋania, leso tigham ndug ighazooŋ.

⁸ Ye ighur ndag, leso ighaaz pa ndag.

⁹ Ve ighur kaiyo ve pitum, leso tisul pa mboŋ.

¹⁰ Ye to irab yes Isipa ndinatudi aidaba.

¹¹ Ve igham yes Israela tipul yes Isipa ve tivot.

¹² Sawa tonenen, ye ipatooŋ tapiri tiina ivot ighazooŋ.

¹³ Ye ivalag te le pida ila pa ŋas, ve pida ila pa waan, ve taan mamaasa ivot.

¹⁴ Ve ighereb yes Israela, ve tilaagh ila taan mamaasa to ineep bodbodaaŋ to te, ve tivool tila pa dige ite.

¹⁵ Ve igham Te Kaviaaŋa itatab kinik to yes Isipa toman ndaaba toni, le tisob tighun te ve timatmaat.

¹⁶ Ye imuuŋ pa tamtoghon toni, ve yesŋa tilaghlaagh izi ndug balim.

¹⁷ Ye irab kinik to tapiridi tintina timatmaat.

¹⁸ Kinik to izadi tintina, ye irab di timatmaat.

¹⁹ Ye irab Sihon to kinik to yes Amora imaat.

²⁰ Ve irab Og to kinik to Basan ne paam.

²¹ Ve igham taan todi inim yes Israela ledi.

²² Ye igham taan tonowen pa yes Israela to mbesooŋa toni ne, leso tineep pani itaghoni taghoni gha ila.

¹ Lolomim poia pa Yoova ve apaiti. Pasaa, i poia le poia kat.

² Lolomim poia pa Maaron ve apaiti. Pasaa, i iliiv zimaronŋa tisov.

³ Lolomim poia pani ve apaiti. Pasaa, i Maaron tiina tau iliiv zimaronŋa tisov.

⁴ I mon ta ighamgham gabua ŋgeretazi tau tintiina kat.

⁵ Muuŋ, i ighur gabua naol isov tau tighenaar ila sambam saamba. Uraat tooni tawe, ighamu toman ŋgar le ivot kat.

⁶ I ighur taan izala te paavo.

⁷ Ve ighur gabua tintiina tigheen ila sambam saamba to tigham nugh ighazooŋ.

⁸ I ighur aaz, leso ighaaz pa mataaz.

⁹ Ve ighur kaiyo ve pitum, leso tisul pa mboŋ.

¹⁰ I ta iravuur yes Isipa natuzŋa aidabazŋa.

¹¹ Ve igham yes Israela tipul yes Isipa ve tivot.

¹² Saawe tana, i itotoi tapiri tiina ivot ighazooŋ.

¹³ I ivalagh te, gha sirivu ila pa ŋas, ve sirivu ila pa tapir, le taan gorgori ivot.

¹⁴ Ve igherev yes Israela, gha tilaagh ila taan mamaasa tau igheen bodbodaaŋ to te na, ve tila tivool ziige ite.

¹⁵ Ve igham Te Siŋsiŋai itav kinik to yes Isipa tomania zaaba tooni, le tisov tighun te gha timataar.

¹⁶ I imuŋmuuŋ pa tamtamon tooni gha yesŋa tilaghlaagh izi nugh ŋginaaŋa.

¹⁷ Ve irav kinik tau tapirizi tiina na timatmaat.

¹⁸ Kinik tau ezazi tintiina na, i irav zi timatmaat.

¹⁹ I irav Amora kinik toozi Sihon imaat.

²⁰ Ve irav Og tau kinik to Basan na paam.

²¹ Ve igham taan toozi imin yes Israela lezi motot.

²² Igham taan tawe pa yes Israela tau besooŋa tooni na, leso tileep pani taghon taghon gha ila.