Mbouŋ to Yes Israela 135:8-21 in Mutu

⁸ Muuŋ, ye irab yes Isipa ndinatudi aidaba toman ŋgai todi to tipoop di muuŋ ne, le tisob timatmaat.

⁹ Ye igham mbeb gharatooŋadi ve uraat tintina izi Isip, le iwaghamun kinik todi toman uraata toni tisob.

¹⁰ Sawa to yes Israela tilooŋ tila taan to yes Kanaana, ye irab tamtoghon to ndug ndug timatmaat. Kinik to tapiridi tintina ne paam, ye irab di timatmaat.

¹¹ Ye irab Sihon to kinik to yes Amora, Og to kinik to Basan, ve kinik tisob to ndug ndug to Kanaan.

¹² Ve igham taan todi inim yes Israela ledi. Leso tamtoghon toni tineep pani itaghoni taghoni gha ila.

¹³ O Yoova, izam tiina pale inepneep tovene irau sawa isob! Tamtoghon pale matadi iŋgal uraat tiom, ve tivotia varum itaghoni taghoni gha ila.

¹⁴ Pasa, Yoova iyondyood pa tamtoghon toni, ve ighurghur atia pa yes to tigham samin di. Ye lolo isasamin mbesooŋa toni, ve iuluul di.

¹⁵ Ndug ndug tigharaat maaron todi pa silva ve gol. Maaron kaaromŋa tonowen, tamtoghon tigharaat di pa nimadi.

¹⁶ Yes ledi avodi. Eemoghon tisavsaav maau. Ve ledi matadi. Eemoghon tighita ndug maau.

¹⁷ Yes ledi taliŋadi. Eemoghon irau tilooŋ saveeŋ maau. Ve yaghur eta ivot pa uzudi maau. Pasa, yes mbeb matadi yaryaara maau.

¹⁸ Tamtoghon to tigharaat maaron kaaromŋa tovene ve tinumeer di, yes tisob tinimale maaron todi tonowen. Tirau mbeb eta maau.

¹⁹ Yam ival tiina to Israel, apait Yoova pa poia toni! Ve yam ndiran to watooŋrau to avot ila to Aron, apait Yoova pa poia toni!

²⁰ Ve yam rumai Levi to auluul uraat to rumai ne paam, apait Yoova pa poia toni! Tovenen yam to amatughez pa Yoova ve ataghon ŋgar toni, asob apaiti pa poia toni.

²¹ Yoova ina to nepooŋ ineep izi Yerusalem. Tovenen yam to aneep izi ndug Zion, apaiti pa poia toni! Aleluia, tapait Yoova!

⁸ Muuŋ, i irav yes Isipa natuzŋa aidabazŋa tomania ŋgai toozi tau tipoop zi imin maata na le tisov timataar.

⁹ I igham gabua ŋgeretazi ve uraat tintiina izi Isip, le ivaghamun kinik toozi tomania uraata tooni tisov.

¹⁰ Saawe tau yes Israela tiloŋ tila taan to yes Kanaana, i irav tamtamon to nugh nugh timatmaat. Kinik tau tapirizi tiina na paam, i irav zi timatmaat.

¹¹ I irav Sihon tau kinik to yes Amora, Og tau kinik to Basan, ve kinik tisov to nugh nugh to Kanaan.

¹² Ve igham taan toozi imin yes Israela lezi motot. Leso tamtamon tooni tileep pani taghon taghon gha ila.

¹³ O Yoova, ezam tiina pale ighengheen tauvene irau saawe! Tamtamon pale matazi iŋgalŋgal uraat tsio, ve tivotia varum taghon taghon gha ila.

¹⁴ Pasaa, Yoova iyozyooz pa tamtamon tooni, ve ighurghur atuya pa yes tau tigham saghatin zi na. I loolo isasaghatin besooŋa tooni, ve iuluul zi.

¹⁵ Nugh nugh tigharaat maaron toozi pa silva ma gol. Maaron karomŋa tawe, tamtamon tigharaat zi pa nimazi.

¹⁶ Yes lezi avozi. Eemon irau tisavsaav mako. Ve lezi matazi. Eemon tighita nugh mako.

¹⁷ Yes lezi taliŋazi. Eemon tilooŋ saveeŋ mako. Ve yaghur eta ivot pa uzuzi mako. Pasaa, yes gabua matazi yaryaare mako.

¹⁸ Yes tau tighagharaat maaron karomŋa, ve tinumeer zi na, tisov timin maaron toozi tawe. Tirau gabua eta mako.

¹⁹ Yam eval tiina to Israel, apait Yoova pa poia tooni! Ve yam zeran to watooŋrau tau avot ila to Aron na, apait Yoova pa poia tooni!

²⁰ Ve yam rumei Levi tau auluul uraat to rumei na paam, apait Yoova pa poia tooni! Tauvene yam tau aroi pa Yoova ve ataghon ŋgar tooni na, asov apaiti pa poia tooni.

²¹ Yoova niia to lepoogh igheen izi Yerusalem. Tauvene yam tau aleep izi nugh Zion na, apaiti pa poia tooni! Aleluia, tapait Yoova!