Mbouŋ to Yes Israela 127:1-5 in Mutu

¹ Yes to reiŋ ruum, ighaze Yoova ineep toman di pa uraat todi maau, nene pale tirab taudi sorok. Ve yes to tipamaat, ve tiŋgin ndug pa mboŋ ne paam. Ighaze Yoova iŋgin ndug todi tonowen maau, nene pale tipamaat sorok.

² Ighaze moghon moghon, ugham ŋgar naol ughaze: “Pale ag aniiŋ ma leg mbeb iraua, ma maau?” Ve upamundigin uraat pa mboŋmaagh kat, ve ukiskisi ila ila le mboŋ anoŋa, nene urab taum sorok. Pasa, poia toni, tauto igham uraat toit ighurghur anoŋa ivotvot. Tovenen yes to Maaron lolo ineep todi, lolodi imbumbu maau, ve tigheen pooi pa mboŋ.

³ Ndipain to tapoop di, Yoova ighaze igham poian ghiit, tauto igham di pait itaghon tau poia toni.

⁴ Ighaze pain paghu eta azuwa ipoop ndinatu nditamoot pida, ndinatu tonowen pale tiyoon pani tinimale pane ndinatu to yes ndaaba.

⁵ Tovenen tamtoghon to le ndinatu nditamoot katindi, nene pale tini iza pa poia to Yoova to iza toni. Ve muri, ighaze yesŋa koia tiwazoran di pa savsaveeŋ izi maran, nene koia irau titatani ve tipamayaŋini maau. Pasa, ndinatu tonowen pale tiyoon pani, ve tiuuli pa savsaveeŋ.

¹ Mbouŋ to yes tau tizala Yerusalem pa suŋuuŋ Mbouŋ to Solomon Yes to raoŋ ruum, isaav ighe Yoova ileep tomani zi pa uraat toozi mako, ene pale tirav tauzi sorok. Ve yes tau timamaat ve tiŋgin nugh pa mboŋ na paam. Isaav ighe Yoova iŋgin nugh toozi tawe mako, ene pale timamaat sorok.

² Isaav ighe monmon ugham ŋgar naol ughe: “Pale leg aniiŋ ma gabua irao, ma mako?” Ve upaburigin uraat pa mboŋoozo geeg, ve ukiskisi ila ila le mboŋ anooŋa, ene urav taum sorok. Pa poia tooni, tauta igham uraat toit ighurghur anooŋa ivotvot. Tauvene yes tau Maaron loolo igheen toozi na, lolozi bubu mako, ve tigheen poi pa mboŋ.

³ Ve natuunŋa tau tapoop zi na paam, Yoova ighe igham poghani ghiit, tauta igham zi pait itaghon tauu poia tooni.

⁴ Isaav ighe ŋeer paaghu eta azaawa ipoop le zitamoot siriv, ene natŋa tawe pale tiyooz pani imin paneegh natŋa to yes zaaba.

⁵ Tauvene tamtamon tau le natŋa zitamoot katini, ene pale tintini pa poia to Yoova tau izaa tooni na. Ve murei, isaav ighe yesŋa koiŋa tivazorai zi pa savsaveeŋ izi maaran, ene koiŋa irau titatani ve tipamayaŋini mako. Pa natŋa tawe pale tiyooz pani, ve tiuule pa savsaveeŋ.