Mbouŋ to Yes Israela 119:76-170 in Mutu

⁷⁶ Yom lolom ineep tuŋia ila to tamtoghon tiom ve uluul di. Upatooŋ ŋgar tovene payou paam itaghon saveeŋ to yom umbua toman ghou. Leso urab ateg, ve upalot ghou. Pasa, you mbesooŋa tiom.

⁷⁷ Lolom isamin ghou, ve uul ghou naneep pooi. Pasa, saveeŋ tiom, tauto igham lolog poia le poia kat.

⁷⁸ Yes to tipait taudi ve tiveleg ghom, tinoknok ŋgaliiŋ saveeŋ kaarom payou. Utatan di, ve ugham di mayadi. Eemoghon you matag itaghon tutuuŋ to yom ughur di naghaze nagham ŋgar padi pooi.

⁷⁹ Yes to timatughez payom ve titaghon ŋgar tiom, ghoro tinim tiou ve yeiŋa nilup ghei. Pasa, ndiran tovene tiwatag ataam to yom ughuri pa tamtoghon tiom.

⁸⁰ You naghaze ŋgar to ineep ila lolog ne, eta isosor malep, ve nataghon katin tutuuŋ tiom naol to tineep pataghaaŋ. Leso mayag sob.

⁸¹ O Yoova, you nakaria saŋaniiŋ pa ulaaŋ tiom, le tapirig isob kat. Eemoghon you naghur ila naghaze aliŋam pale ighur anoŋa.

⁸² You naghur matag naghaze naghita saveeŋ mbuaaŋ tiom anoŋa ivot. Eemoghon nasaŋan le maau. Pale ŋeez o uul ghou ve ateg izi?

⁸³ You nasami, ve tamtoghon lolodi imaagh payou wa. Tighita ghou nanimale buzbuz. Eemoghon tutuuŋ tiom naol to tineep pataghaaŋ, lolog imaagh padi maau.

⁸⁴ You mbesooŋa tiom. Pughu vena to yom umbabatut koiagŋa, ve tighamgham pataŋani payou? Pale ŋeez o uŋgabiiz di, ve ughur atia padi?

⁸⁵ Ughita. Yes to tipapait taudi ve tiveleg ghom, titai saambu payou tighaze natap nazila. Ndiran tonowen titaghon saveeŋ tiom maau.

⁸⁶ Tutuuŋ tiom tisob, popoiadi moghon. Tovenen yei irau ninumeer di pa tipasaluŋgan ghei. Aazne, tamtoghon tighur pataŋani payou sorok. Tovenen uul ghou lak!

⁸⁷ Pasa, mala maau pale tipasob nepooŋ tiou to taan. Eemoghon tutuuŋ to yom ughur di, you napul murig padi maau.

⁸⁸ Yom lolom ineep tuŋia ila to tamtoghon tiom ve uluul di. Tovenen uŋgin ghou naneep pooi. Leso matag kisin ataam to yom ughuri payei, ve nataghoni irau sawa isob. Ataam tonenen, taum avom isavia.

⁸⁹ O Yoova, saveeŋ tiom pale iyaryaaŋ izi sambam, ve inepneep tovene itaghoni taghoni gha ila.

⁹⁰ Tamtoghon tipopoop, ve papaghu todi tivotvot itaghoni taghoni gha ila. Ve gabuam to avom onoon ve utataghon saveeŋ tiom ne paam. Inepneep tovene itaghoni taghoni gha ila. Yom to ughur taan ineep tuŋia ila ina. Irau induur maau.

⁹¹ Muuŋ ve inim aazne, mbeb tisob tineep tuŋia ila inadi inadi itaghon saveeŋ to yom usavia. Ve mbeb tisob tinim mbesooŋa tiom.

⁹² Saveeŋ tiom igham lolog poia le poia kat. Inimale maau, tone pataŋani tiou igham ghou nalaleg.

⁹³ Tutuuŋ to yom ughur di, you irau lolog imaagh pa eta maau. Maau le maau kat. Pasa, saveeŋ tiom, tauto igham ghou avuvug ila, ve naneep matag iyaryaar.

⁹⁴ You nanim lem wa. Tovenen ugham mulin ghou lak! Pasa, you nazuaria ghou naghaze le nataghon katin tutuuŋ tisob to yom ughur di.

⁹⁵ Aazne, ndiran samsamiadi tighamgham lilin ghou tighaze tirab ghou namaat. Eemoghon matag iŋgalŋgal ataam to yom ughuri payei.

⁹⁶ You naghita mbeb eta to ivot kat ne maau. Mbeb to naol ne, tisob timuul moghon. Eemoghon tutuuŋ tiom, ghoro iraua kat. Nene pughu tiina, ve poia le poia kat.

⁹⁷ You lolog pa saveeŋ tiom kat! Tovenen sawa to naol ne, mboŋmaagh ila le rabrab izi, matag itaghoni ve naghamgham ŋgar pani.

⁹⁸ Tutuuŋ tiom ineep ila ŋgar tiou irau sawa isob. Tauto ŋgar tiou ilib pa koiagŋa ŋgar todi.

⁹⁹ Ŋgar tiou ilib pa yes ŋgara to tipatoot ghou ne paam. Pasa, matag itaghon ataam to yom ughuri payei, ve naghamgham ŋgar pani.

¹⁰⁰ Ve ŋgar tiou ilib pa ndolmana ŋgar todi paam. Pasa, tutuuŋ to yom ughur di, matag kisin di, ve nataghon di irau sawa isob.

¹⁰¹ You napaghau taug pa ataam samsamia to naol ne, leso nataghon aliŋam.

¹⁰² You napul murig pa tutuuŋ tiom deŋiadi maau. Pasa, yom taum to upatooŋ ghou pa tutuuŋ tonenen.

¹⁰³ Bagil suru, nene poia pa taghuni. Eemoghon saveeŋ tiom, nene poia le poia kat. Ilib pa bagil suru.

¹⁰⁴ Tutuuŋ to yom ughur di, nene tiuul ghou pa naghilaal ŋgar poia. Tauto naghur koi pa ŋgar kaarom to naol ne. Pa vene, tiweu ghou ve napul ataam tiom.

¹⁰⁵ Saveeŋ tiom, nene inimale lam to isul ataam ve nalaagh. Ve inim ghazooŋa payou, leso nalaagh taghon ataam tiom.

¹⁰⁶ Gabizooŋ tiom, nene deŋia moghon. Tauto nambua saveeŋ toman ghom, ve napariaaŋa le iyaryaaŋ kat naghaze you pale nataghon ataam tiom to gabizooŋ mbeb.

¹⁰⁷ O Yoova, pataŋani tiina kat igham ghou le naneep sami. Uul ghou naneep pooi muul itaghon saveeŋ mbuaaŋ tiom.

¹⁰⁸ You lolog poia payom, ve napait ghom pa poia tiom. Naghaze paitooŋ tiou tonene inim watooŋrau poia ila matam. Upatooŋ ghou pa ataam tiom to gabizooŋ mbeb.

¹⁰⁹ Moghon moghon you nanepneep ila naal avo. Eemoghon lolog imaagh pa saveeŋ tiom maau.

¹¹⁰ Onoon, ndiran samsamia tighur liis payou. Eemoghon tutuuŋ to yom ughur di, you nayel padi maau.

¹¹¹ Ataam to yom ughuri payei, nene mbeb poia to yom ugham payou. You pale nakiskisi tovene itaghoni taghoni gha ila. Pasa, igham ghou lolog poia le poia kat.

¹¹² Tutuuŋ tiom to tineep pataghaaŋ, ŋgar tiou iyaryaaŋ naghaze you pale nataghon di le irau sawa tiou isob.

¹¹³ Yes to timbees payom toman lolodi ee moghon maau, ve ŋgar todi ru, you lolog padi maau. Eemoghon saveeŋ tiom, you lolog pani kat.

¹¹⁴ Yom unum inag to yoŋgaaŋ, ve unum sigeu payou. Tovenen naghur ila saveeŋ tiom, ve naghur matag naghaze naghita anoŋa ivot.

¹¹⁵ Yam ndiran to ghamuuŋ ŋgar samia, aghau payou! Pasa, you naghaze nataghon tutuuŋ to Maaron tiou.

¹¹⁶ O Yoova, upalot ghou itaghon saveeŋ mbuaaŋ tiom. Leso nayoon ariaŋa ve naneep pooi. Ighaze naghur matag payom sorok, nene pale mayag.

¹¹⁷ Ukis ghou tuŋia. Leso naneep pooi, ve matag kisin tutuuŋ tiom to tineep pataghaaŋ, ve nataghon di irau sawa isob.

¹¹⁸ Tamtoghon tisob to tiyel pa tutuuŋ tiom, yom upul murim padi. Ŋgar todi kaarom, nene ipatooŋ di ighaze yes tipul ataam tiom wa.

¹¹⁹ Ndiran samsamia to tineep izi taan, yom ughita di tinimale buzbuz, ve upiyaav di tilaledi. Tauto lolog pa ataam to yom ughuri pa tamtoghon tiom.

¹²⁰ You nagham ŋgar payom, le matughezaaŋ tiina igham ghou ve tinig irur. Ve ŋgar tiom to uŋgabiiz tamtoghon ve ughur atia padi, nene paam igham ghou namatughez.

¹²¹ You nagham ŋgar popoia ve ŋgar deŋia moghon. Tovenen upul ghou nala koiagŋa nimadi malep.

¹²² You mbesooŋa tiom. Tovenen uyoon payou ve uul ghou. Leso naneep pooi. Yes to tipapait taudi ve tiveleg ghom, upul di tigham samin ghou malep.

¹²³ You naghur matag pa ulaaŋ tiom, ve nakaria saŋaniiŋ wa. Pale ŋeez o uul ghou itaghon saveeŋ mbuaaŋ tiom?

¹²⁴ Yom lolom ineep tuŋia ila to tamtoghon tiom ve uluul di. Upatooŋ ŋgar tovene payou paam. Pasa, you mbesooŋa tiom. Ve upatoot ghou pa tutuuŋ tiom to tineep pataghaaŋ.

¹²⁵ You mbesooŋa tiom. Tovenen upaghazoŋan ghou, leso naghilaal ŋgar poia, ve nawatag katin ataam to yom ughuri payei.

¹²⁶ O Yoova, aazne tamtoghon tizorzoor saveeŋ tiom. Umundig ve ugham ŋgar eta padi lak!

¹²⁷ Onoon kat, you lolog pa tutuuŋ tiom to naol ne ilib pa gol. Gol to ŋgalaaŋa ve poia kat ne paam, naghita naghaze tutuuŋ tiom ilib pani.

¹²⁸ Tovenen tutuuŋ to yom ughur di, tauto tipasaluŋgan ghou pa laghooŋ tiou. Ve naghur koi pa ataam naol to tiweu ghou pa napul murig payom.

¹²⁹ Ataam to yom ughuri payei, nene poia le poia kat. Tovenen matag kisini ve nataghoni irau sawa isob.

¹³⁰ Ighaze tipaghazoŋan saveeŋ tiom pughu pa tamtoghon, nene inim ghazooŋa padi. Ve yes to ŋgar todi tiina maau, saveeŋ tiom igham ŋgar todi ivot, leso tighilaal ŋgar poia.

¹³¹ You lolog pa tutuuŋ tiom kat, nanimale tamtoghon to muruni le isami kat.

¹³² Matam inim payou, ve ugham poian ghou. Pasa, yes to lolodi ineep tiom ve tipapait izam, yom ughamgham tovene padi.

¹³³ Upasaluŋgan ghou, leso laghooŋ tiou deŋia itaghon saveeŋ tiom. Ve upul ŋgar samia eta ilib payou malep.

¹³⁴ Yes to tighamgham pataŋani payou pa titatan ghou, ugham mulin ghou ila nimadi. Leso nataghon tutuuŋ to yom ughur di.

¹³⁵ O Yoova, you mbesooŋa tiom. Naghaze lolom poia payou, ve ugham poian ghou. Ve upatoot ghou pa tutuuŋ tiom to tineep pataghaaŋ.

¹³⁶ You nataŋ, ve matag suru irereer izi inimale ya. Pasa, tamtoghon titaghon saveeŋ tiom iraua sone.

¹³⁷ Yoova, yom deŋiam kat. Ve gabizooŋ tiom paam, nene deŋia moghon.

¹³⁸ Ataam to yom ughuri payei, nene deŋia moghon. Tovenen yei irau ninumeera pa ipasaluŋgan ghei.

¹³⁹ Ŋgar tiou iyaryaaŋ kat naghaze tamtoghon tisob titaghon aliŋam. Eemoghon koiagŋa lolodi imaagh pani. Tauto tigham ghou ateg yabyab kat.

¹⁴⁰ You mbesooŋa tiom. Lolog pa saveeŋ tiom, ve nanumeera kat. Pasa, natoova le naghita naghaze nene onoon.

¹⁴¹ Onoon, you ŋgeu sorok, ve tamtoghon matadi izi payou. Eemoghon tutuuŋ to yom ughur di, lolog imaagh padi maau.

¹⁴² Ŋgar tiom deŋia pale inepneep tovene itaghoni taghoni gha ila. Ve saveeŋ tiom, nene onoon moghon. Tovenen irau naghur ila, ve nanumeera kat.

¹⁴³ Onoon, pataŋani naol titatan ghou, ve tigham ghou lolog ipataŋan kat. Eemoghon tutuuŋ tiom, nene igham lolog poia le poia kat.

¹⁴⁴ Ataam to yom ughuri payei, nene deŋia moghon, ve inepneep tovene irau sawa isob. Upaghazoŋan ghou pani, leso naneep pooi.

¹⁴⁵ O Yoova, you nataŋ roran ghom toman lolog. Ulooŋ suŋuuŋ tiou, ve uul ghou. Leso matag kisin tutuuŋ tiom to tineep pataghaaŋ, ve nataghon di.

¹⁴⁶ Taŋiiz tiou iŋarua ghom. Upas ghou navot pa pataŋani tiou tonene. Leso matag kisin ataam to yom ughuri payei, ve nataghoni irau sawa isob.

¹⁴⁷ You naghur ila saveeŋ mbuaaŋ tiom, ve naghur matag naghaze naghita anoŋa ivot. Tovenen ndag iza sone, ve you namundig nataŋ roran ghom pa ulaaŋ.

¹⁴⁸ Ve mboŋ to naol ne paam, you napamaat. Leso matag itaghon saveeŋ tiom, ve nagham ŋgar pani pooi.

¹⁴⁹ O Yoova, lolom ineep tuŋia ila to tamtoghon tiom ve uluul di. Ve gabizooŋ tiom, nene deŋia moghon. Tovenen ulooŋ suŋuuŋ tiou tonene, ve uul ghou naneep pooi.

¹⁵⁰ Aazne, ndiran samsamia tinim tigharau ghou tighaze tiwaghamun ghou. Ŋgar todi ineep saguan kat pa saveeŋ tiom.

¹⁵¹ Eemoghon Yoova, yom uneep digeg. Ve tutuuŋ tiom to naol ne, nene irau nanumeer di pa tipasaluŋgan ghou.

¹⁵² To muuŋ ve inim, you naghilaal naghaze ataam to yom ughuri pa tamtoghon tiom, yom ughaze ineep tovene itaghoni taghoni gha ila.

¹⁵³ Yoova, lolog imaagh pa saveeŋ tiom maau. Tovenen ughita pataŋani tiou tonene, ve upaghau ghou pani.

¹⁵⁴ Aazne, tamtoghon tipayoon ghou sorok pa savsaveeŋ. Tovenen uyoon payou, ve uul ghou naneep pooi itaghon saveeŋ mbuaaŋ tiom.

¹⁵⁵ Ndiran samsamia, yom uluul di maau. Pasa, tutuuŋ tiom to tineep pataghaaŋ, yes tigham ŋgar pa titaghon di maau.

¹⁵⁶ O Yoova, yes to tinepneep ila pataŋani lolo, yom lolom isamin di kat. Tovenen uul ghou naneep pooi itaghon ŋgar tiom deŋia.

¹⁵⁷ Pasa, koiagŋa to tigham pataŋani payou ne, yes ival kat. Eemoghon ataam to yom ughuri payei, you nayel pani maau.

¹⁵⁸ You naghita yes to tipul muridi payom, le irau lolog maau kat. Pasa, yes titaghon tutuuŋ tiom maau.

¹⁵⁹ O Yoova, ughita. Tutuuŋ to yom ughur di, you lolog padi kat. Uul ghou naneep pooi. Pasa, lolom ineep tuŋia ila to tamtoghon tiom ve uluul di.

¹⁶⁰ Saveeŋ tiom pughu tovene: Yom avom onoon, ve utaghon saveeŋ mbuaaŋ tiom irau sawa isob. Ve tutuuŋ tiom to naol, nene deŋiadi moghon, ve tinepneep tovene itaghoni taghoni gha ila.

¹⁶¹ Yes daba to taan tighurghur pataŋani payou sorok. Eemoghon you namatughez padi maau. Saveeŋ tiom moghon to namatughez pani.

¹⁶² Saveeŋ tiom igham lolog poia kat, nanimale tamtoghon to ilaagh ila le indeeŋ le mbeb poia eez.

¹⁶³ Ŋgar kaarom to naol, you lolog padi maau kat, ve naghur koi padi. Eemoghon saveeŋ tiom, ghoro lolog pani kat.

¹⁶⁴ Ndag to naol ne, napait ghom pa liim ve ru. Pasa, gabizooŋ tiom, nene deŋia moghon.

¹⁶⁵ Yes to lolodi pa saveeŋ tiom kat, nene pale tineep poia kat. Ve mbeb eta irau igham di titap ne maau.

¹⁶⁶ O Yoova, you nataghon tutuuŋ tiom to naol ne, ve naghur matag pa ulaaŋ tiom.

¹⁶⁷ ataam to yom ughuri payei, you lolog pani kat. Tauto matag kisini, ve nataghoni irau sawa isob.

¹⁶⁸ You nataghon ataam tonenen toman tutuuŋ tisob to yom ughur di. Pasa, sa ŋgar to you naghamghami, yom ughita.

¹⁶⁹ O Yoova, ulooŋ taŋiiz tiou tonene. Ugham ghou naghilaal ŋgar poia itaghon saveeŋ tiom.

¹⁷⁰ Ughur taliŋam pa suŋuuŋ tiou, ve upas ghou navot pa pataŋani tiou itaghon saveeŋ mbuaaŋ tiom.

⁷⁶ Yo lolom isaghav tamtamon tsio ve uluul zi. Utotoi ŋgar tauvene payau paam itaghon saveeŋ tau yo umbua payau na. Leso urav ateg, ve upalot ghau. Pa yau besooŋa tsio.

⁷⁷ Lolom isaghatin ghau, ve uul ghau to naleep poi. Pasaa, saveeŋ tsio, tauta igham lolog poia le poia kat.

⁷⁸ Yes tau tipapait tauzi ve tivelegh ghom na, tinoknok ŋgaliiŋ saveeŋ karom payau. Utatan zi ve ugham zi mayazi. Eemon yau, o matag itaghon tutuuŋ naol tau yo ughur zi na naghe nagham ŋgar pazi poi.

⁷⁹ Yes tau tiroi payo ve titaghon ŋgar tsio, o tilam payau ve yeŋa nilup ghei. Pa zeran tauvene tiwatagh eez tau yo ughuru pa tamtamon tsio.

⁸⁰ Yau naghe ŋgar tau igheen ila lolog ne, eta isosor sov, ve nataghon duduŋai tutuuŋ tsio naol tau tigheen pataghaaŋ na. Leso mayag sov.

⁸¹ O Yoova, yau nakaria saŋaniiŋ pa uleeŋ tsio, le tapirig isov kat. Eemon yau naghur ila naghe aliŋam pale ighur anooŋa.

⁸² Yau naghurghur matag naghe naghita saveeŋ mbuaaŋ tsio ighur anooŋa. Eemon nasaŋan le mako. Pale ŋeez o uul ghau ve ateg izi?

⁸³ Yau nasaghat ve tamtamon lolozi iveghai ghau wa. Tighit ghau namin pen. Eemon tutuuŋ tsio naol tau tigheen pataghaaŋ na, lolog iveegh pazi mako.

⁸⁴ Yau besooŋa tsio. Puughu mindai ta yo umamarar koiagŋa, ve tighamgham pataŋani payau? Pale ŋeez o ugabiiz zi, ve ughur atuya pazi?

⁸⁵ Ughita. Yes tau tipapait tauzi ve tivelegh ghom na, titai puura payau tighe natap nazila. Zeran tawe titaghon saveeŋ tsio mako.

⁸⁶ Tutuuŋ tsio tisov, ene popoiazi mon. Tauvene yei irau ninumeer zi to tipaduduuŋ ghei. Aazne, tamtamon tighur pataŋani payau sorok. Tauvene uul ghau lak!

⁸⁷ Pasaa, malau mako pale tipasov lepoogh tsiau to taan. Eemon tutuuŋ naol tau yo ughur zi na, yau naghur murig pazi mako.

⁸⁸ Yo lolom isaghav tamtamon tsio ve uluul zi. Tauvene uŋgin ghau naleep poi. Leso matag kisin eez tau yo ughuru payei na, ve nataghoni irau saawe. Eez tana, taum avom isavia.

⁸⁹ O Yoova, saveeŋ tsio pale iyaryaaŋ izi sambam, ve ighengheen tauvene taghon taghon gha ila.

⁹⁰ Tamtamon tipopoop, ve paaghu toozi tivotvot taghon taghon gha ila. Ve gabuam tau avom onoon ve utataghon saveeŋ tsio na paam. Ighengheen tauvene taghon taghon gha ila. Yo ta ughur taan igheen tuŋia ila niia. Irau izuur mako.

⁹¹ Muuŋ le ilam aazne, gabua naol isov tigheen tuŋia ila niazi niazi itaghon saveeŋ tau yo usavia na. Ve gabua naol isov, ene timin besooŋa tsio.

⁹² Saveeŋ tsio igham lolog poia le poia kat. Imin ta mako, kanaŋ pataŋani tsiau igham ghau nalaleg.

⁹³ Tutuuŋ naol tau yo ughur zi na, irau lolog iveegh pa eta mako. Mako le mako kat. Pasaa saveeŋ tsio, tauta igham ghau vuvuŋag ila ve naleep poia muul.

⁹⁴ Yau namin lem wa. Tauvene ugham mulin ghau lak! Pasaa, yau nazuari ghau pa taghoniiŋ tutuuŋ naol tau yo ughur zi na.

⁹⁵ Aazne, zeran sasaghati tighamgham lilin ghau tighe tirav ghau namaat. Eemon matag iŋgalŋgal eez tau yo ughuru payei.

⁹⁶ Yau naghita gabua eta tau ivot geeg ne mako. Gabua ta naol ne, tisov timuul mon. Eemon tutuuŋ tsio, o irao kat. Ene puughu tiina, ve poia le poia kat.

⁹⁷ Yau lolog pa saveeŋ tsio kat! Tauvene saawe ta naol ne, mboŋoozo ila le ravrav izi, matag itaghoni ve naghamgham ŋgar pani.

⁹⁸ Tutuuŋ tsio igheen ila ŋgar tsiau irau saawe. Tauta ŋgar tsiau iliiv koiagŋa ŋgar toozi.

⁹⁹ Ŋgar tsiau iliiv yes ŋgara tau tipaduduuŋ ghau ne paam. Pasaa, matag itaghon eez tau yo ughuru payei na, ve naghamgham ŋgar pani.

¹⁰⁰ Ve ŋgar tsiau iliiv zolmana ŋgar toozi paam. Pasaa, tutuuŋ naol tau yo ughur zi na, matag kisin zi, ve nataghon zi irau saawe.

¹⁰¹ Yau napaghau taug pa eez sasaghati ta naol ne, leso nataghon aliŋam.

¹⁰² Yau naghur murig pa tutuuŋ tsio duduŋazi mako. Pasaa, yo taum ta upaghazoŋai ghau pa tutuuŋ tana.

¹⁰³ Tok suuru, ene poia pa ghunuuŋ. Eemon saveeŋ tsio, ene poia le poia kat. Iliiv tok suuru.

¹⁰⁴ Tutuuŋ naol tau yo ughur zi na, ene tiuul ghau pa ghilalooŋ ŋgar poia. Tauta naghur koi pa ŋgar karom naol isov. Mako pale igherev ghau to napul eez tsio.

¹⁰⁵ Saveeŋ tsio, ene imin lam tau isul ghau. Ve imin ghazooŋa payau, leso nalaagh taghon eez tsio.

¹⁰⁶ Gabizooŋ tsio, ene iduduuŋ mon. Tauta nambu saveeŋ payo ve napariaaŋa le iyaryaaŋ kat naghe yau aat nataghon eez tsio to gabizooŋ gabua.

¹⁰⁷ O Yoova, pataŋani tiina kat igham ghau le naleep saghat. Uul ghau to naleep poi itaghon saveeŋ mbuaaŋ tsio.

¹⁰⁸ Yau lolog poia payo ve napait ghom pa poia tsio. Naghe paitooŋ tsiau tane imin watooŋrau poia ila matam. Upaghazoŋai ghau pa eez tsio to gabizooŋ gabua.

¹⁰⁹ Monmon yau nalepleep ila naal aavo. Eemon lolog iveegh pa saveeŋ tsio mako.

¹¹⁰ Onoon, zeran sasaghati tighur liis payau. Eemon tutuuŋ naol tau yo ughur zi na, yau nasapir pazi mako.

¹¹¹ Eez tau yo ughuru payei, ene gabua poia tau yo ugham payau. Yau aat nakiskisi tauvene taghon taghon gha ila. Pasaa, igham ghau lolog poia le poia kat.

¹¹² Tutuuŋ tsio naol tau tigheen pataghaaŋ na, ŋgar tsiau iyaryaaŋ naghe yau aat nataghon zi le irau saawe tsiau isov.

¹¹³ Yes tau tibees payo toman lolozi eemon mako ve ŋgar toozi ru na, yau lolog pazi mako. Eemon saveeŋ tsio, yau lolog pani kat.

¹¹⁴ Yo umin niag to yoŋgaaŋ, ve umin sigheu payau. Tauvene naghur ila saveeŋ tsio, ve naghurghur matag naghe naghita anooŋa ivot.

¹¹⁵ Yam zeran tau aghamgham ŋgar saghati na, aghau payau! Pasaa, yau naghe nataghon tutuuŋ to Maaron tsiau.

¹¹⁶ O Yoova, upalot ghau itaghon saveeŋ mbuaaŋ tsio. Leso nayooz ariaaŋ ve naleep poia. Isaav ighe naghur matag payo sorok, ene pale mayag.

¹¹⁷ Ukis ghau tuŋia. Leso naleep poi, ve matag kisin tutuuŋ tsio naol tau tigheen pataghaaŋ na, ve nataghon zi irau saawe.

¹¹⁸ Tamtamon tisov tau tisapir pa tutuuŋ tsio na, yo ughur murim pazi. Ŋgar toozi karom, ene itotoi zi ighe yes tipul eez tsio wa.

¹¹⁹ Zeran sasaghati tau tileep izi taan na, yo ughit zi timin pen ve usik zi tilalez. Tauta lolog isaghav eez tau yo ughuru payei.

¹²⁰ Yau nagham ŋgar payo, le roiŋ tiina igham ghau ve tinig irur. Ve ŋgar tsio tau monmon ugagabiiz tamtamon ve ughur atuya pazi, ene paam igham ghau naroi.

¹²¹ Yau nagham ŋgar popoia ve ŋgar duduuŋa mon. Tauvene upul ghau nala koiagŋa nimazi sov.

¹²² Yau besooŋa tsio. Tauvene uyooz payau ve uul ghau. Leso naleep poi. Yes tau tipapait tauzi ve tivelegh ghom na, upul zi tigham saghatin ghau sov.

¹²³ Yau naghurghur matag pa uleeŋ tsio. Ve nakaria saŋaniiŋ wa. Pale ŋeez o uul ghau itaghon saveeŋ mbuaaŋ tsio?

¹²⁴ Yo lolom isaghav tamtamon tsio ve uluul zi. Utotoi ŋgar tana payau paam. Pa yau besooŋa tsio. Ve upaghazoŋai ghau pa tutuuŋ tsio naol tau tigheen pataghaaŋ na.

¹²⁵ Yau besooŋa tsio. Tauvene upaghazoŋai ghau, leso naghilaal ŋgar poia, ve nawatagh katin eez tau yo ughuru payei na.

¹²⁶ O Yoova, aazne tamtamon tizorzoor saveeŋ tsio. Uburig ve ugham ŋgar eta pazi lak!

¹²⁷ Onoon kat, yau lolog pa tutuuŋ tsio ta naol ne iliiv gol. Gol tau ŋgalaaŋa ve poia kat na paam, naghita naghe tutuuŋ tsio iliivo.

¹²⁸ Tauvene tutuuŋ naol tau yo ughur zi, tauta ipaduduuŋ ghau pa laghooŋ tsiau. Ve naghur koi pa eez naol tau tigherev ghau to naghur murig payo.

¹²⁹ Eez tau yo ughuru payei, ene poia le poia kat. Tauvene matag kisini ve nataghoni irau saawe.

¹³⁰ Isaav ighe tipaghazoŋai saveeŋ tsio puughu pa tamtamon, ene imin ghazooŋa pazi. Ve yes tau ŋgar toozi tiina mako na, saveeŋ tsio igham ŋgar toozi ivot, leso tighilaal ŋgar poia.

¹³¹ Yau lolog pa tutuuŋ tsio kat, imin tamtamon tau murunu le isaghat kat.

¹³² Matam ilam payau, ve ugham poghani ghau. Pasaa, yes tau lolozi igheen tsio ve tipapait ezam na, yo ughamgham tauvene pazi.

¹³³ Upaduduuŋ ghau, leso laghooŋ tsiau iduduuŋ itaghon saveeŋ tsio. Ve upul ŋgar saghati eta iliiv ghau sov.

¹³⁴ Yes tau tighamgham pataŋani payau to titatan ghau na, ugham mulin ghau ila nimazi. Leso nataghon tutuuŋ naol tau yo ughur zi na.

¹³⁵ O Yoova, yau besooŋa tsio. Naghe lolom poia payau ve ugham poghani ghau. Ve upaghazoŋai ghau pa tutuuŋ tsio naol tau tigheen pataghaaŋ na.

¹³⁶ Yau nataŋtaŋ, ve matag suuru irereer izizi imin yaa. Pasaa, tamtamon titaghon saveeŋ tsio irao soone.

¹³⁷ Yoova, yo duduŋam kat. Ve gabizooŋ tsio paam, ene iduduuŋ mon.

¹³⁸ Eez tau yo ughuru payei, ene iduduuŋ mon. Tauvene yei irau ninumeera to ipaduduuŋ ghei.

¹³⁹ Ŋgar tsiau iyaryaaŋ kat naghe tamtamon tisov titaghon aliŋam. Eemon koiagŋa lolozi iveghaini. Tauta tigham ghau ateg yavyav kat.

¹⁴⁰ Yau besooŋa tsio. Lolog isaghav saveeŋ tsio, ve nanumeera kat. Pasaa, natoova le naghita naghe ene onoon.

¹⁴¹ Onoon, yau ŋeer sorok ve tamtamon matazi izi payau. Eemon tutuuŋ naol tau yo ughur zi na, lolog iveegh pazi mako.

¹⁴² Ŋgar tsio duduuŋa pale ighengheen tauvene taghon taghon gha ila. Ve saveeŋ tsio, ene onoon mon. Tauvene irau naghur ila, ve nanumeera kat.

¹⁴³ Onoon, pataŋani naol itatan ghau, ve igham ghau lolog ipataŋan kat. Eemon tutuuŋ tsio, ene igham lolog poia le poia kat.

¹⁴⁴ Eez tau yo ughuru payei, ene iduduuŋ mon, ve ighengheen tauvene irau saawe. Upaghazoŋai ghau pani, leso naleep poi.

¹⁴⁵ O Yoova, yau nataŋ rarai ghom toman lolog. Ulooŋ suŋuuŋ tsiau ve uul ghau. Leso matag kisin tutuuŋ tsio naol tau tigheen pataghaaŋ na, ve nataghon zi.

¹⁴⁶ Taŋiiz tsiau iŋarui ghom. Upas ghau navot pa pataŋani tsiau tane. Leso matag kisin eez tau yo ughuru payei na, ve nataghoni irau saawe.

¹⁴⁷ Yau naghur ila saveeŋ mbuaaŋ tsio, ve naghurghur matag naghe naghita anooŋa ivot. Tauvene aaz izaa soone, ve yau naburig nataŋ rarai ghom to uul ghau.

¹⁴⁸ Ve mboŋ ta naol ne paam, yau namamaat. Leso matag itaghon saveeŋ tsio, ve nagham ŋgar pani poi.

¹⁴⁹ O Yoova, yo lolom isaghav tamtamon tsio ve uluul zi. Tauvene ulooŋ suŋuuŋ tsiau tane, ve uul ghau naleep poi. Pasaa, gabizooŋ tsio, ene iduduuŋ mon.

¹⁵⁰ Aazne, zeran sasaghati tilam tigharau ghau tighe tivaghamun ghau. Ŋgar toozi igheen malau kat pa saveeŋ tsio.

¹⁵¹ Eemon Yoova, yo uleep zigeg. Ve tutuuŋ tsio ta naol ne, ene irau nanumeer zi to tipaduduuŋ ghau.

¹⁵² Ta muuŋ ve ilam, yau naghilaal naghe eez tau yo ughuru payei, yo ughe igheen tauvene irau saawe.

¹⁵³ Yoova, ughita pataŋani tsiau tane, ve upaghau ghau pani. Pasaa, lolog iveghai saveeŋ tsio mako.

¹⁵⁴ Aazne, tamtamon tipayooz ghau sorok pa savsaveeŋ. Tauvene uyooz payau ve uul ghau naleep poi itaghon saveeŋ mbuaaŋ tsio.

¹⁵⁵ Zeran sasaghati, yo uluul zi mako. Pasaa, tutuuŋ tsio naol tau tigheen pataghaaŋ na, yes tigham ŋgar pa taghoniiŋ zi mako.

¹⁵⁶ O Yoova, yes tau tileep ila pataŋani loolo na, lolom isaghatin zi kat. Tauvene uul ghau naleep poi itaghon ŋgar tsio duduuŋa.

¹⁵⁷ Pasaa, koiagŋa tau tighamgham pataŋani payau ne, yes eval kat. Eemon eez tau yo ughuru payei na, yau nasapir pani mako.

¹⁵⁸ Yau naghita yes tau tighur murizi payo na, le irau lolog mako kat. Pasaa, yes titaghon tutuuŋ tsio mako.

¹⁵⁹ O Yoova, ughita. Tutuuŋ naol tau yo ughur zi na, yau lolog isaghav zi kat. Uul ghau naleep poi. Pasaa, yo lolom isaghav tamtamon tsio ve uluul zi.

¹⁶⁰ Saveeŋ tsio puughu ene vene: Yo avom onoon ve utaghon saveeŋ mbuaaŋ tsio irau saawe. Ve tutuuŋ tsio ta naol ne, ene tiduduuŋ mon, ve tigheen tauvene taghon taghon gha ila.

¹⁶¹ Yes daaba to taan tighurghur pataŋani payau sorok. Eemon yau naroi pazi mako. Saveeŋ tsio mon ta naroi pani.

¹⁶² Saveeŋ tsio igham ghau lolog poia le poia kat, imin tamtamon tau ilaagh ila le indeeŋ le gabua poia eez.

¹⁶³ Ŋgar karom naol isov, ene lolog pazi mako kat ve naghur koi pazi. Eemon saveeŋ tsio, o lolog isaghavu kat.

¹⁶⁴ Mataaz ta naol ne, napapait ghom pai liim ve ru. Pasaa, gabizooŋ tsio, ene iduduuŋ mon.

¹⁶⁵ Yes tau lolozi isaghav saveeŋ tsio, ene pale tileep poia kat. Ve gabua eta irau igham zi titap ne mako.

¹⁶⁶ O Yoova, yau nataghon tutuuŋ tsio ta naol ne, ve naghurghur matag pa uleeŋ tsio.

¹⁶⁷ Eez tau yo ughuru payei na, yau lolog isaghavu kat. Tauta matag kisini, ve nataghoni irau saawe.

¹⁶⁸ Yau nataghon eez tana tomania tutuuŋ naol tau yo ughur zi na. Pasaa, ŋgar isov tau yau naghamgham zi ne, yo ughitoor zi isov.

¹⁶⁹ O Yoova, ulooŋ taŋiiz tsiau tane. Ugham ghau naghilaal ŋgar poia itaghon saveeŋ tsio.

¹⁷⁰ Ughur taliŋam pa suŋuuŋ tsiau, ve upas ghau navot pa pataŋani tsiau itaghon saveeŋ mbuaaŋ tsio.