2 Yooba isombe iswe itunu, na imbotmbot lela miiri tieene gabgapŋana mi imar. Peeze kini, ina imender se mbulu kini ndeeŋeŋana. Pa ni imendernder pizin tomtom mi iurpewe pataŋana kizin.
3 You kini imuŋmuuŋgu pini, mi ikanan ka koi bizin ma timap lup.
4 Ni ikamam ma lele ikimitmit, mi lolo kini iwenweene. Tabe toono ire, to itortoori kembei moori ta ikamam be ipeebe i.
5 Yooba, ni biibi ta imborro toono ta boozomen. Sombe imar igarau na, you kini inenne zin abal ma tirereere kembei ta yok ma tila len.
6 Koroŋ ta timbotmbot sala maŋaanaŋana na, tizzoyaryaara mbulu kini ndeeŋeŋana. Mi karkari ta boozomen tire mburaana mi mbulu kini ndabokbokŋan ta zaana biibi pa i.
7 Tana zin wal ta so timbesmbeeze pa merere pakaamŋan mi nin zze pa ke teeteŋan ta koroŋ ŋonoono som na, Yooba ikam zin ma kan miaŋ. Pa mburaana ilip pa merere ta boozomen. Tana wal tana merere kizin tilek kumbun pini tomini.
