2 Nu ta tiiriŋana katuunu. Tana maŋga mi pokot mbulu kizin wal ta tipakurkur zitun na. Pimiili mbulu kizin sananŋana ma ipasaana zitun.
3 Yooba, re zin wal sananŋan. Zin nin se mi menmeen zin pa mbulu kizin sananŋana. Ŋiizi na kam mbulu sa pizin?
4 Zin wal ta tikamam mbulu sananŋana na, kwon bok pa sua pakurŋana. Timap ma kalŋan izalla mi tipakurkur zitun zan.
5 Yooba, zin tikamam pataŋana biibi pa wal ku. Pa zin wal ta itum peikat zin mi kam zin ma tiwe lem na, wal tana tiseseeze kat matan.
6 Mi tipunun zin noroŋa mi moondo ma timetmeete. Mi zin wal ta tiwe leembe isu toono ti na, tikazas zin.
7 Mi tikamam sua repiiliŋana pu ta kembei: “Aa, Yooba ire yam? Mbulu ta amkamam i, Anutu ki Yakop iute som.”
8 Niom tina talliŋoyom kat! Leyom ŋgar sa som. Niom kankaanaŋoyom. Ŋiizi na kakam kat ŋgar?
9 Parei, ni ta iur talŋoyom na, irao ileŋ sua tiom som? Mi ni ta iur motoyom na, irao ire mbulu tiom som?
10 Ni ta ipazalzal zin karkari ta boozomen na, ko iŋgal motoyom som? Ni ta ipaute tomtom ta boozomen na, itunu le ŋgar som?
11 Yooba, ni iute ŋgar turkeŋan boozomen ta tomtom lelen iurur pa. Mi ni iute: Ŋgar kizin tana ŋono somŋana.
12 O Yooba, tomtom ta so nu pazali mi paute i pa sua ku, na ni ko leleene ambai kat. Pa kampeŋana ku ko imbotmbot se kini.
13 Wal ta kembei, sombe pataŋana sa indeeŋe zin, na irao tikam ŋgar boozo pa som. Pa nu itum ko kipiiri zin mi motom pizin ma irao kel naala pa zin wal sananŋan ma titoptop sula.
14 Pa Yooba, ni irao ipizil ndemeene pa wal kini na som. Zin wal ta ni itunu ikam zin ma tiwe lene kek na, ni ko izem zin som.
15 Tana ni ko iur zin peeze kan ambaimbaiŋan be tikam kat peeze mi tipombol mbulu ndeeŋeŋana. Mi wal boozomen ta lelen ŋgeezeŋan, nako tipombol mbulu ta kembei.
16 Sombe tomtom tikam ŋoobo mbulu pio, na asiŋ ko ilae tio mi iuulu yo? Mi sombe zin wal sananŋan tiŋgal sua pio, na asiŋ ko imender pio? Tomtom sa som. Yooba itunu tau.
17 Mibe Yooba iuulu yo som, so karau men mi aŋmeete mi aŋbot sula zin meeteŋan murin. Zin wal ta timbot lele tana na, tizzo sua mini som.
18 Yooba, indeeŋe ta aŋyasipir mabe aŋtop pa urlaŋana tio na, muŋaiŋana ku ta ikis yo mi ikipiiri yo.
19 Mi indeeŋe ta kopoŋ rru mi leleŋ ipata kat na, nu potor leleŋ ma ambai mini.
