8 Merere tio, nu itum tamen ta Anutu ŋonoono. Anutu toro sa kembei ta nu na som. Pa uraata ku ilip kat. Tana kadom sa som.
9 Merere tio, nu ur tomtom ta munŋaana men ma timbot pa lele kizin kizin. Karkari ta boozomen ko timar be tilek kumbun pu mi tipakur zom.
10 Pa nu ta biibi ŋonoono. Mi nu kamam uraata mburanŋan ta ipa ndel kat. Tana nu itum tamen ta Anutu ŋonoono.
11 O Yooba, paute yo pa zaala ku. Naso aŋpa pai tio ma indeeŋe men pa sua ku ŋonoono. Mi kam ma aŋur kat leleŋ pu. Naso aŋmototo u mi aŋleŋleŋ la kalŋom.
12 Merere, nu Anutu tio. Nio ko leleŋ ambai pu mi aŋur kat leleŋ pu, mi aŋpakurkur zom ma alok.
13 Pa nu toto sua ku mbukŋana mi urur kat lelem pio. Muŋgu aŋbot la naala kezeene. Tamen nu tatke yo pa pataŋana tana, tabe aŋmeete som.
14 O Anutu, re. Iŋgi zin wal sananŋan timaŋga be tikam malmal pio mi tikoto yo. Wal zigzikŋan tilup zin, mi tisombe tipun yo ma aŋmeete. Wal tana timuŋai tomtom sa som, mi tikam ŋgar pu risa som.
15 Tamen Merere, nu lelem izanzaana pizin mbesooŋo ku, mi muŋaiŋai zin mi kampewe zin. Mi ketem malmal karau som, mi toto sua ku mbukŋana mi urur kat lelem pa wal ku.
16 Tana motom miili pio mi muŋai yo. Pombol yo mi kamke yo. Pa nio mbesooŋo ku tau. Aŋbesmbeeze pu kembei ta muŋgu naŋgoŋ ikamam na.
