7 Ni ko ikam peeze ma alok. Pa mburaana biibi kat. Mi ni mataana izzu pizin tomtom mi itirtiiri zin. Tana niom wal zorzooroŋoyom kamaŋga be kozoori mini pepe.
8 Niom karkari ta boozomen, kapakur Anutu tiam pa kampeŋana kini. Kalŋoyom isala mi kiwit uruunu.
9 Pa ni ta ikiskis ti ma tombot matanda yaryaara. Mi ni mataana piti, tana kumbundu ikam ŋgiris som.
10 Ŋonoono, Anutu nu toombo yam pa pataŋana pakan bekena peŋgeeze urlaŋana tiam, kembei ta tinenne pat silba bekena you ikan ka muk ma ila ne, mi silba tana iwe ŋgeezeŋana kat.
11 Nu yok pa kilis ma ikam yam, mi ur pataŋana biibi isalakaala yam be ambaada.
12 Mi zem koyam koi bizin ma tipadaaga yam. Tana niam kembei ampa la you leleene, mi kembei ta wo biibi isur yam. Tamen iŋgi ur leyam zaala kek. Tabe ambot ambai kat, mi amrao pa koroŋ ta boozomen.
