1 Mboe ki Asap Yooba, ni Anutu mbura keskeezeŋana. Iur sua pizin tomtom ta boozomen ki toono, mi iboobo zin be timar tilup zin su kereene uunu. Zin ta timbot pa lele pakaana ta zoŋ izze pa i, mi ila tuŋ la lele ta zoŋ izulla pa i, na bela timap ma timar tipet kini.
2 Anutu imbot Sion ta kar ndabokŋana mi ŋgeezeŋana kat, mi iswe itunu raama mburaana mi azuŋka kini biibi.
3 Anutu kiti ta imar i. Irao imaane mini na som. You bilbilŋana ta imuuŋgu pini. Mi miiri ma yaŋ biibi iliu i.
4 Ni iboobo saamba mi toono be tire i, mi itiiri zin wal kini mi iur kadoono pizin.
5 Mi iso ta kembei: “Niom wal tio tau itiŋan tumbuk sua be kewe leŋ na, kamar kulup yom su kereŋ uunu be kakam patoronŋana mi kopombol sua tiom mbukŋana mini.”
6 Zin koroŋ ta timbot sala saamba na, tizzwe kembei Anutu mbulu kini indeŋdeeŋe men. Mi ni ta tiiriŋana katuunu.
7 “O niom wal tio Israel, keleŋ sua tabe aŋso i. Pa Anutu tiom ta nio i. Mi iŋgi be aŋswe mbulu tiom ta kakamam ŋoobo i.
8 Patoronŋana ta kakamam pio na, nio aŋyaamba yom pa som. Mi mbili ta gorgori kenenne zin su kereŋ uunu na, ta kembena. Aŋyaamba yom pa som.
9 Pa nio aŋkam kinkiini pa makau, som mekmek tiom ta timbot siiri tiom leleene na som.
10 Buzur boozomen ta tiwwa su leleene na, nio tio men. Mi mbili ta timbot irao abal ta munŋaana men lwonlwon, ina tomini nio tio men.
11 Mi man boozomen ta tirie pa maŋaanaŋana na, nio ta aŋboro zin. Mi koroŋ boozomen ta tiwwa pa rie lene na, nio tio men.
12 Nio sombe petel yo, na irao aŋwi yom pa koŋ kini sa na som. Pa toono ramaki ka koroŋ boozomen ta timbotmbot pa, ina koroŋ tio men.
13 Parei, niom koso nio aŋkanan makau mazaana, som aŋwinin mekmek siŋiini? Som kat.
14 Mi patoronŋana ta nio leleŋ be kakam pio, ina ta kembei: Leleyom ambai pio, kapakur yo pa kampeŋana tio, mi koto kat sua ta kumbuk pa Anutu tiom mbura keskeezeŋana na.
15 Mi sombe pataŋana sa indeeŋe yom, na koboobo yo be aŋuulu yom. Naso aŋkamke yom, mi niom ko kapakur nio zoŋ.
