1 Mboe ki Dabit Zin wal sananŋan ta timbotmbot ambai men na, kam ŋgar boozo pizin pepe. Mi zin wal ta tikamam ŋoobo mbulu na, motom mburmbur pizin pepe.
2 Ko timbot rimen, to timetmeete kembei ta mbutmbuutu imelle. Ko tila len kembei manman pwon ta timetmeete ma titoptop na.
3 Mi nu na, pase pa Yooba mi kam mbulu ambaiŋana men. Naso mbotmbot ambai su toono ta ni ikam pizin wal kini na, mi kosa sa ko ipasaanu som.
4 Mbeeze pini raama lelem ambai. Naso ni ikam lem koroŋ ta lelem pa i.
5 Ur itum ila Yooba namaana mi pase pini. To ni ko iuulu u mi iso u pa zaala tabe to i.
6 Mi ko iswe mbulu ku ndeeŋeŋana ma ipet kat mat, kembei ta zoŋ iyaara. Tana tomtom ko tikilaalu kembei mbulu ku ambai men, mi lem uunu sa isaana som.
7 Sombe uraata kizin wal sananŋan iloondo ambai men, mi tiyo len koroŋ boozo pa zaala sananŋana, na kam ŋgar boozo pizin pepe. Ur nim men mi sa Yooba be iur kadoono pizin.
8 Tana ketem malmal pepe, kam ŋgar boozo pizin pepe. Yaraama itum. Kokena ketem ibeleu, to kam mbulu sananŋana sa.
