5 Ni leleene ilip pa mbulu ta ndeeŋeŋana mi ambaiŋana. Mi mbulu kini ta itoto sua kini mi iurur leleene pa wal kini, ina ni izzwe ma irao toono ta boozomen.
6 Muŋgu, Yooba iur sua men mi saamba ipet. Kwoono iso sua men, mi koroŋ ta boozomen ki saamba tipet.
7 Tai ta biibi i, ni ilup ma imbot la mbata, kembei ta tomtom tikut tai ila tai putuunu na. Mi tai ta imbot la mozo lukutuunu na, ni ikes la tai putuunu kini, mi iur lae ma imbotmbot.
8 Niom tomtom ta karao pa toono na, komoto Yooba mi keleŋ la kalŋaana. Niom iwal karkari kapakuri mi kopou i!
9 Pa ni iso sua men, mi saamba ma toono tipet. Iur sua mi koroŋ ta boozomen tipet ma timbot la murinmurin.
10 Zin karkari lelen iurur pa mbulu boozo tabe tikam. Tamen Yooba ikamam ma ŋgar kizin tana iurur ŋonoono som. Tana ŋgar kizin ko iwe koroŋ sorok.
11 Mi Yooba, ni mbolŋana. Tana tomtom sa irao izooro ŋgar kini na som. Sombe leleene iur pa ŋgar sa, na ŋgar tana ko imbol mi imbotmbot ma alok. Mi ŋgar ta so leleene iur pa, inako ipiyooto ŋonoono tabe imbotmbot ma alok.
12 Zin wal ta timbesmbeeze pa Yooba na, ni itunu ta ipeikat zin, mi ikam zin ma tiwe lene. Tana lelen ambai pa kampeŋana kini ta ise kizin na.
13 Yooba, ni imbotmbot saamba, mi mataana isu ma irre zin tomtom ta timbotmbot toono na.
