3 Pa tuŋ ŋonoono ta nu. Nu pombolmbol yo mi poroukalkaala yo. Mi nu we kembei siiri mbolŋana pio. Tana muuŋgu pio mi so yo pa zaala tabe aŋto. Pa mbulu ku na, ta kembena.
4 Pazal yo: Kokena kilis ta koŋ koi bizin tiur pio na ikeene yo. Pa nio aŋpase pu be poroukaala yo.
5 Yooba, nu motom iŋgalŋgal sua ku mi toto. Tana iŋgi aŋur ituŋ ima nomom be kamke yo.
6 Zin wal tau timbesmbeeze pa zin merere pakaamŋan ta ŋonon somŋan i, na nio aŋurur koi pizin. Mi aŋpase pa nu itum tamen tau.
7 Pataŋana tio ti, nu re kek. Mi nu ute: Leleŋ na, ipata ma ipata kat. Tamen nu toto sua ku mbukŋana mi urur lelem pa wal ku. Tanata leleŋ ambai mi menmeen yo biibi.
8 Pa nu zem yo la koŋ koi bizin naman na som. Nu ur zaala pio, tana iŋgi aŋbot ambai.
9 Yooba, muŋai yo lak! Pa nio mbesooŋo ku tau. Mi iŋgi pataŋana biibi indeeŋe yo. Mi leleŋ ipata, mi aŋtaŋ ma biibi mi motoŋ izarzar. Tabe ikam ma mburoŋ imap kat.
10 Nio aŋyamaana kembei mboti tio ambai som kat. Pa leleŋ ipata ma aŋsaana kat. Iŋgi aŋkaraŋeeze pa pataŋana tio mi mburoŋ imap. Tana niŋ mburaana pa koroŋ sa kamŋana mini som.
11 Koŋ koi bizin ta boozomen matan repiili yo lup. Mi waeŋ bizin na, sombe tire yo na timoto. Tabe timbotmbot molo pio. Sombe tindeeŋe yo su zaala lwoono, na tikowo pio.
12 Zin matan iŋgalŋgal yo mini som. Tire yo kembei aŋmeete kek. Nio iŋgi kembei kuuru ta imapaala mi tipiri ila lene.
13 Nio aŋbotmbot raama motoŋana biibi. Pa aŋleŋleŋ wal boozomen timburmbuuru pio. Zin tilup zin mi tirru zaala be tipun yo ma aŋmeete.
14 Tamen Yooba, nio aŋpase pu, mi aŋso: “Nu ta Anutu tio.”
15 Iŋgi aŋur ituŋ ima nomom tau. Tatke yo la koŋ koi bizin mi zin tau tiseseeze motoŋ i naman.
16 Pa nio mbesooŋo ku tau. Tana swe itum ramaki muŋaiŋana ku pio, mi kam mat ku ma iyaara pio. Pa nu muŋaiŋana katuunu mi toto sua ku. Tana kamke yo.
17 Yooba, nio aŋtaŋroro u be uulu yo: Kokena koŋ koi bizin tilip pio, to koŋ miaŋ. Tana koto zin wal sananŋan. Pun mburan ma imap kat, mi piri zin sula Andewa. Naso kan miaŋ, mi timaane men.
18 Mi zin wal pakamkaamŋan ta tipakurkur zitun, mi tigibgiibi sua sananŋana pizin wal ndeeŋeŋan, mi tipasomsom zin na, pumun kwon.
19 Yooba, kampeŋana ku na biibi kat. Zin wal ta timototo u mi tileŋleŋ la kalŋom na, nu ur len koroŋ ambaimbaiŋan boozomen ma imbotmbot lae be kam pizin. Zin wal ta so tipase pu be we ur pizin mi menderkaala zin na, nu ko kampe zin ila iwal biibi matan.
