10 Nio aŋyamaana kembei mboti tio ambai som kat. Pa leleŋ ipata ma aŋsaana kat. Iŋgi aŋkaraŋeeze pa pataŋana tio mi mburoŋ imap. Tana niŋ mburaana pa koroŋ sa kamŋana mini som.
11 Koŋ koi bizin ta boozomen matan repiili yo lup. Mi waeŋ bizin na, sombe tire yo na timoto. Tabe timbotmbot molo pio. Sombe tindeeŋe yo su zaala lwoono, na tikowo pio.
12 Zin matan iŋgalŋgal yo mini som. Tire yo kembei aŋmeete kek. Nio iŋgi kembei kuuru ta imapaala mi tipiri ila lene.
13 Nio aŋbotmbot raama motoŋana biibi. Pa aŋleŋleŋ wal boozomen timburmbuuru pio. Zin tilup zin mi tirru zaala be tipun yo ma aŋmeete.
14 Tamen Yooba, nio aŋpase pu, mi aŋso: “Nu ta Anutu tio.”
15 Iŋgi aŋur ituŋ ima nomom tau. Tatke yo la koŋ koi bizin mi zin tau tiseseeze motoŋ i naman.
16 Pa nio mbesooŋo ku tau. Tana swe itum ramaki muŋaiŋana ku pio, mi kam mat ku ma iyaara pio. Pa nu muŋaiŋana katuunu mi toto sua ku. Tana kamke yo.
17 Yooba, nio aŋtaŋroro u be uulu yo: Kokena koŋ koi bizin tilip pio, to koŋ miaŋ. Tana koto zin wal sananŋan. Pun mburan ma imap kat, mi piri zin sula Andewa. Naso kan miaŋ, mi timaane men.
18 Mi zin wal pakamkaamŋan ta tipakurkur zitun, mi tigibgiibi sua sananŋana pizin wal ndeeŋeŋan, mi tipasomsom zin na, pumun kwon.
19 Yooba, kampeŋana ku na biibi kat. Zin wal ta timototo u mi tileŋleŋ la kalŋom na, nu ur len koroŋ ambaimbaiŋan boozomen ma imbotmbot lae be kam pizin. Zin wal ta so tipase pu be we ur pizin mi menderkaala zin na, nu ko kampe zin ila iwal biibi matan.
20 Zin ko timbot ambai paso, nu mbotmbot raama zin mi we ur pizin. Tana kan koi bizin mi zin wal sananŋan ta timburmbuuru kan, nako tirao be tikam kosa sa pizin na som. Pa nu ko poroukaala zin. Tana sua sananŋana ta kan koi bizin tiwirri pizin, nako irao be ipasaana zin na som.
21 Nio aŋpakur Yooba! Pa indeeŋe ta koŋ koi bizin tiliu yo be tikam malmal pio na, ni iswe muŋaiŋana biibi kat pio mi iuulu yo.
22 Nio aŋmoto mi aŋso ko ni iziiri yo ma aŋbot molo pini. Tamen som. Aŋtaŋroro i be iuulu yo, mi ni ileŋ tiŋiizi tio mi ikamke yo.
23 O niom wal ki Yooba ta kototo zaala kini na, kuur leleyom ila kini! Pa zin wal ta titoto kalŋaana na, ni ko mataana pizin ma timbot ambai. Mi zin ta tizorzoori mi tipakurkur zitun na, ni iurur kadoono pizin ma ikot mbulu kizin.
