1 Mboe ki Dabit, mbesooŋo ki Yooba Indeeŋe ta Yooba ikamke i pa Saul mi ka koi bizin ta boozomen naman na, Dabit itooro mboe ti O Yooba, nio aŋkamam mburoŋ se ku tau. Nio leleŋ pu ilip!
2 Yooba, ni ta tuŋ ŋonoono. Pa ipombolmbol yo, mi ipakalkaala yo pa koroŋ sananŋan kembei ta raŋ sumbuunu, mi ni ulaaŋa tio. Ni iwe kembei siiri mbolŋana pio be aŋke lela mi aŋbot ambai. Tana aŋpase pa Anutu tio mbolŋana be iwe seraara pa koŋ koi bizin mi iporoukaala yo. Ni siŋgiao tio. Itunu mburaana ta ikamkewe yo. Mi ni imborro yo ma aŋbot ambai.
3 Nio sombe aŋpakur Yooba zaana, na indeeŋe men. Pa aŋboobi na, ni ikamke yo pa koŋ koi bizin naman.
4 Kilis ki meeteŋana, rimen mi ikam yo. Pa pataŋana sananŋana kat ilol yo kembei ta wo biibi i.
5 Wooro ki Andewa, ta itautau yo mi iyakat yo be aŋsula. Kilis ki meeteŋana, ta igarau yo kek.
6 Indeeŋe pataŋana biibi tana ikam yo na, aŋboobo Yooba. Aŋtaŋroro Anutu tio be imar iuulu yo. Mi ni imbot lela urum kini leleene mi ileŋ kalŋoŋ. Iŋgun talŋaana pa bobi tio.
7 To ni keteene malmal kat, mi ikam ma yeŋyeeŋge itok toono ma toono ikam katkat. Mi abal unun timirri.
8 You ka koi ta iwedet pa Anutu kuzuunu. Mi you miaana ramaki pat bayouŋan iwedet pa kwoono.
9 To ikaaga saamba, mi imbot se miiri tieene gabgapŋana ma isu.
10 Ni imbot se aŋela mbolŋana ndemeene mi irie. Miiri tieene ta ikwaari ma irie karau men.
11 Ni ike lela zugut. Miiri tieene ta izuki ma iwe kembei beeze pini be imbot lela.
12 Azuŋka biibi imuuŋgu pini mi lele ikimitmit. Mi lolo niini ramaki yaŋ pat iyotyooto pa miiri tieene kini mi izzu.
13 To Yooba imbot saamba, mi iso sua raama kalŋaana biibi kat, kembei lele ikuruŋ. Anutu kor kana kat iso sua ma tomtom tileŋ.
14 Mi ipeene ka koi bizin pa peene lutuunu kini ma tiko papirik. Ikam ma lolo iwenweene. Mi ka koi bizin tire, to motoŋana biibi ikam zin ma tiko.
15 Yooba, indeeŋe ta nu yespokpok zin mi swe ketem malmalŋana pizin na, miiri biibi iyooto pa kuzum, mi iwilaala tai ma ipei maaŋga ma ise mat. Mi itooro toono tomini ma meleebe kana ise mat.
16 To Yooba imbot kor, mi isara namaana isu mi iteege yo. Mi iweene yo ma aŋse pa mozo lukutuunu.
17 Koŋ koi bizin ta mburanŋan i, ni itatke yo la naman. Zin wal tau tiur koi pio mi mburan ilip pio na, ikamke yo pizin.
