Matiu 1:3-17

³Ma ne Iuda no susine Peres ma ne Sira, no pawasi dir ne Tamar, Peres no susine Hesron, ma ne Hesron no susine Ram.

⁴Ma ne Ram no susine Aminadap, Aminadap no susine Nason, ma ne Nason no susine Salmon.

⁵Ma ne Salmon no susine Buas, ma ne Rahap no pawasine. Ma ne Buas no susine Obet, ma ne Rut no pawasine. Ma ne Obet no susine Iesi.

⁶Ma ne Iesi no susine Dawit no tamat na lualua na gil harkurai. Ma ne Dawit no susine Solomon, no pawasine nong baak a hahin ie tane Uraia.

⁷Ma ne Solomon no susine Rihobuam, Rihobuam no susine Abaisa, ma ne Abaisa no susine Asa.

⁸Ma ne Asa no susine Iosapat, Iosopat no susine Ioram, ma ne Ioram no susine Usia.

⁹Ma ne Usia no susine Iotam, Iotam no susine Ahas, ma ne Ahas no susine Hesekia.

¹⁰Ma ne Hesekia no susine Manase, Manase no susine Amon, ma ne Amon no susine Iosia.

¹¹Ma ne Iosia no susine Iekonia ma ira tasine. Ta iakano pakana bung di ga lamus ira Israel urau Babilon bia diet na lon hoing ira wasire kaia.

¹²Namur ta ing diet ga lon hoing ira wasire arau Babilon, io, Iekonia ga susine Silatiel, ma ne Silatiel no susine Serababel.

¹³Ma ne Serababel no susine Abiut, Abiut no susine Eliakim, ma ne Eliakim no susine Asor.

¹⁴Ma ne Asor no susine Sadok, Sadok no susine Akim, ma ne Akim no susine Eliut.

¹⁵Ma ne Eliut no susine Eliasar, Eliasar no susine Matan, ma ne Matan no susine Iakop.

¹⁶Ma ne Iakop no susine Iosep, no tunaan tane Maria nong ga kaha Jisas nong di kilam ie bia Krais.

¹⁷Io, sangahul ma ihat na harmur na nilon ta ira tunotuno makatiga laah tane Abraham tuk taar tane Dawit. Ma sangahul ma ihat makatiga ho Dawit tuk tano pakana bung di ga lamus Israel urau Babilon bia diet na lon hoing ira wasire kaia. Ma sangahul ma ihat mah makaia ta ing diet ga lon hoing ira wasire arau Babilon tuk taar di ga kaha no Mesaia.