Mataio 12:38-44

³⁸Arinai abo tauuriuri headi, eo Parisea headi Iesu se heriba si ene, “Tanuagamai e, heiheinoim esau bena ai ita.”

³⁹Ia arinadi i heuio i heribadi, i ene, “Isina baaeana, eo isina nige se sunusunuma, heiheinoina se eooi: taba nige heiheinoina esau se mosei na Iona peroveta mo heiheinoina wa.

⁴⁰Doha ulaulasi Iona ie dom wa, bogana alona eai ie mia asubena haiona eo maiona haiona: doha ede Tau Natuna hinage i mia tano boeana eai asubena haiona eo maiona haiona.

⁴¹Hedudurai huiana eai Nineva tataodi abo se totoro teina isina ta maenayao, abo hinage se hegirudi: paana ede Iona ena lauguguia arinai nuadi se buidi: esau ede ina, Iona i saetawatawai.

⁴²Hedudurai huiana eai tupo eawana edi wasawasa sine abo i toro teina isi ta maenayao abo hinage i hegirudi: ia tanoubu sigana eai i laoma bena Solomona ena sonoga i ataiei: esau ede ina, Solomona i saetawatawai.

⁴³“Earua bii tau esau nuana eai i laugabaei, i lau dimo pitapitari eai bena ena abaaieawasi i eooi, na nige i lobai.

⁴⁴E abo i ene, Abo ea uio egu numa eai arinai ea laoma ta: abo i laoma, ie ita numa ahaaha mo, eo se uiauiaauri, eo se deuri.