ማርቆሳ 9:2-28 in Dawro

² ዬሱሲ ኡሱፑን ጋላሳፔ ጉዪያን፥ ባሬናና ጴፂሮሳ፥ ያዪቆባኔ ዮሃኒሳ ኣኪዴ፥ ኡንቱንቱ ፃላላ ዎልቃማ ዴሪያ ቦላ ኬሴዳ፤ ኡንቱንቱ ሲንꬃን ላሜቴዳ፤

³ ኣ ማዩካ ጶሌዳ፤ ሳዓን ማዩዋ ሜጪያ ኦኒኔ ጌሻናው ዳንዳዬናዋ ኬና ዳሪ ቦፄዳ።

⁴ ሄ ሄዙ ዬሱሳ ካሊያዋንቱ፥ ኤላሲኔ ሙሴ ዬሱሳና ሃሲያዋንታ ቤዔዲኖ።

⁵ ጴፂሮሲ ዬሱሳ፥ «ታማሪሲያዎ፥ ኑኒ ሃዋን ዴዒያዌ ኑሲ ሎዓ፤ ኑኒ ሄዙ ዳሳቱዋ ኢቱዋ ኔው፥ ኢቱዋ ሙሴው፥ ቃሲ ኢቱዋ ኤላሳሲ ኬፃና» ያጌዳ።

⁶ ኢ ዋጋኔንቶኔ ኤሪቤና፤ ኣዪሲ ጎፔ፥ ኢካ ዮኮንቱካ ዳሪ ያዬዲኖ።

⁷ ሄዋፔ ጉዪያን፥ ሻሪ ዪዴ ኡንቱንታ ካሚና ሻሪያፔ፥ «ሃዌ ታኒ ሲቂያ ታ ናዓ፤ ኢ ጊያዋ ሲሲቴ» ጊያ ቃላይ ዬዳ።

⁸ ኤሌካ ኡንቱንቱ ዩሺ ኣꬂ ፄሊያ ዎዴ፥ ዬሱሳፔ ኣቲን፥ ሃራ ኦናኔ ባሬንቱ ማታን ቤዒቤይኪኖ።

⁹ ኡንቱንቱ ዴሪያፔ ዎꬊሺን፥ ዬሱሲ ኡንቱንታ፥ «ታኒ፥ ኣሳ ናዓይ፥ ሃይቁዋፔ ዴንዳና ጋካናው፥ ሂንቴ ቤዔዳባ ኦሲኔ ኦዶፒቴ» ያጊዴ ኣዛዜዳ።

¹⁰ ኢ ኣዛዜዳዋ ኡንቱንቱ፥ « ‹ኤኖ› ጊዴ፥ ሃ ሃይቁዋፔ ዴንዲያዋ ጊያዌ ዋጊያዌ» ያጊዴ፥ ባሬንቱ ጊዶን ሃሳዬቴዲኖ።

¹¹ ኡንቱንቱ ዬሱሳ፥ «ሂጊያ ታማርሲያዋንቱ ኣዪሲ፥ ‹ኤላስ ካሴቲዴ ያናው ቤሴ› ጊኖ?» ያጊዴ ኦቼዲኖ።

¹² ኢ ዛሪዴ ያጌዳ፤ «ቱማካ፥ ኤላስ ካሴት ዪዴ፥ ኡባባ ጊጊሴ፤ ያቲና፥ ኣዪሲ ፆሳ ማፃፋይ፥ ‹ኣሳ ናዓይ ዳሪ ዋዬታናኔ ኢፄታና› ያጊ?

¹³ ሺን ታኒ ሂንቴንቶ ኦዳይ፤ ኤላስ ዬዳ፤ ቃሲ ኣባይ ፆሳ ማፃፋን ፃፌቴዳዋዳንካ፥ ኣሳይ ኣ ባሬ ኮዬዳባ ኦꬄዳ» ያጌዳ።

¹⁴ ዬሱሲ፥ ጴፂሮሲ፥ ያዪቆቢኔ ዮሃኒሲ ዮኮ ዬሱሳ ካሊያዋንቱኮ ሲሚዴ ዪያ ዎዴ፥ ጮራ ኣሳይ ሄ ካሊያዋንቱ ዩሹዋን ኤቄዳዋኔ ሂጊያ ታማሪሲያ ኣማሬዳ ኣሳቱ ኡንቱንቱና ፓሉሜቲያዋንታ ቤዔዲኖ።

¹⁵ ሄ ጮራ ኣሳይ ዬሱሳ ቤዔዳ ዎዴ ማላሌቲ ዳጋሚዴ፥ ኤሌካ ኣኮ ዎፂ ዪዴ፥ ኣ ሳሮቴዳ።

¹⁶ ዬሱሲ ባሬና ካሊያዋንታ «ኡንቱንቱና ኣያ ፓሉሜቲቴ?» ያጊዴ ኦቼዳ።

¹⁷ ሄ ጮራ ኣሳ ጊዶፔ ኢቲ ቢታኒ ዛሪዴ፥ «ታማሪሲያዎ፥ ታ ናዓ ቦላን ሃሳያ ዲጊያ ኢታ ኣያናይ ዴዒያ ዲራው፥ ኣ ኔኮ ኣካዴ ያዲ።

¹⁸ ሃ ኢታ ኣያናይ ኣ ኦይቂያ ዎዴ ኡባን፥ ኣ ኦሌ፤ ኣ ዶናናካ ሆሙ ፓሮቴ፤ ቃሲ ኣቻ ጋርጪሴ፤ ቦላካ ዞሊሴ። ኣፔ ሃ ኢታ ኣያና ኬሳና ማላ፥ ኔና ካሊያዋንቶ ኦዳዲ፥ ሺን ኬሳናው ዳንዳይቤይኪኖ» ያጌዳ።

¹⁹ ዬሱሲ ዛሪዴ ኡንቱንታ፥ «ኣማኔና ሃ ዎዲያ ኣሳው! ታኒ ሂንቴንቱና ኣዉዴ ጋካናው ዴዓኔ? ቃሲ ሂንቴንቱባ ኣዉዴ ጋካናው ዳንዳያኔ? ናዓ ታኮ ሃ ኣኪ ዪቴ» ያጌዳ።

²⁰ ኡንቱንቱ ናዓ ኣኮ ኣሄዲኖ፤ ሄ ኢታ ኣያናይ ዬሱሳ ቤዔዳ ማንዒያንካ ናዓ ኮኮርሲ ኣጌዳ፤ ናዓይ ሳዓን ኩንዲዴ፥ ዶናና ሆሙ ጎፑ ጊሺን ጎንዶሬቴዳ።

²¹ ዬሱሲ ሄ ናዓ ኣዉዋ፥ «ሃዌ ኔ ናዓ ኦይቆዴፔ ዎይሳ ዎዴ ጊዳኔ?» ያጊዴ ኦቼዳ። ናዓ ኣቡ፥ «ኢ ናዓቴꬃን ዴዒያ ዎዲያፔ ዶሜዳ።

²² ኣ ዎꬋናው ዳሮ ዎዴ ታማኒኔ ሃꬃን ኦሌዳ፤ ሺን ኔኒ ዳንዳዮፔ፥ ኑሲ ቃሬታዴ ኑና ማዳሪኪ» ያጌዳ።

²³ ዬሱሲ ኣ፥ «ኔኒ ዳንዳዮፔ ጋይ? ኣማኒያ ኣሳው ኡባባይ ዳንዳዬቴ» ያጌዳ።

²⁴ ኤሌካ ናዓ ኣቡ ባሬ ኮሻ ꬎቁ ኦꬂዴ፥ «ታኒ ኣማናይ፤ ሺን ጉጃ ኣማናናዳን፥ ታና ማዳሪኪ» ያጌዳ።

²⁵ ዬሱሲ ኣሳይ ዳሪ ዳሪ ቢያዋ ቤዒዴ፥ ኢታ ኣያና፥ «ናዓ ቱሌኔ ዱዴ ኡዴዳ ኣያናው፥ ሃ ናዓፔ ኬሳ ጋዴ ኔና ታ ኣዛዛይ፤ ቃሲ ዛሬꬃዴ ኣኒ ጌሎፓ» ያጌዳ።

²⁶ ሄ ኢታ ኣያናይ ዋሲዴ፥ ናዓ ዳሪሲ ኮኮርሲዴ፥ ኣፔ ኬሴዳ። ናዓይ ሃይቄዳዋ ማላቲና፥ ዳሮ ኣሳይ፥ «ናዓይ ሃይቄዳ» ያጌዳ።

²⁷ ሺን ዬሱሲ ናዓ ኩሺያ ኦይቂዴ ዴንꬂና፥ ናዓይ ዴንዲ ኤቄዳ።

²⁸ ዬሱሲ ሶይ ጌሌዳዋፔ ጉዪያን፥ ኣ ካሊያዋንቱ ዬሱሳ ዱማ፥ «ኑኒ ሄ ኢታ ኣያና ኬሳናው ኣዪሲ ዳንዳይቤይኮ?» ያጊዴ ኦቼዲኖ።

² Yesuusi usuppun gallassaappe guyyiyan, barenanna Phexiroosa, Yayiqoobanne Yohaannisa akkiide, unttunttu xalalaa wolqqaama deriyaa bolla kesseedda; unttunttu sinthaan laametteedda;

³ A mayuukka phooleedda; sa7aan mayuwaa meecciyaa ooninne geeshshanaw danddayennawaa keenaa darii booxxeedda.

⁴ He heezzu Yesuusa kaalliyaawanttu, Eelaasinne Muse Yesuusanna haasiyaawantta be7eeddino.

⁵ Phexiroosi Yesuusa, “Tamaarissiyaawoo, nuuni hawaan de7iyaawe nuussi lo77a; nuuni heezzu daasatuwaa ittuwaa new, ittuwaa Musew, qassi ittuwaa Eelaasassi keexxana” yaageedda.

⁶ I waaganenttonne eribeenna; ayissi gooppe, ikka yokkonttukka darii yayyeeddino.

⁷ Hewaappe guyyiyan, shaarii yiide unttuntta kammina shaariyaappe, “Hawe taani siiqiyaa ta Na7aa; I giyaawaa sisite” giyaa qaalay yeedda.

⁸ Ellekka unttunttu yuushshi aathi xeelliyaa wode, Yesuusappe attin, haraa oonanne barenttu matan be7ibeykkino.

⁹ Unttunttu deriyaappe wodhdhishshin, Yesuusi unttuntta, “Taani, Asaa Na7ay, hayquwaappe denddana gakkanaw, hintte be7eeddabaa oossinne odoppite” yaagiide azazeedda.

¹⁰ I azazeeddawaa unttunttu, “ ‘Eeno’ giide, ha hayquwaappe denddiyaawaa giyaawe waagiyaawe” yaagiide, barenttu giddon haasayetteeddino.

¹¹ Unttunttu Yesuusa, “Higgiyaa tamaarssiyaawanttu ayissi, ‘Eelaas kasetiide yaanaw bessee’ giinoo?” yaagiide oochcheeddino.

¹² I zaariide yaageedda; “Tumakka, Eelaas kaset yiide, ubbabaa giigissee; yaatina, ayissi Xoossaa Maxaafay, ‘Asaa Na7ay darii waayyettananne ixettana’ yaagii?

¹³ Shin taani hinttenttoo oday; Eelaas yeedda; qassi aabay Xoossaa Maxaafan xaafetteeddawaadankka, asay A bare koyyeeddabaa ootheedda” yaageedda.

¹⁴ Yesuusi, Phexiroosi, Yayiqoobinne Yohaannisi yokko Yesuusa kaalliyaawanttukko simmiide yiyaa wode, cora asay he kaalliyaawanttu yuushshuwaan eqqeeddawaanne higgiyaa tamaarissiyaa amareedda asatuu unttunttunna palumettiyaawantta be7eeddino.

¹⁵ He cora asay Yesuusa be7eedda wode maalaletti dagammiide, ellekka aakko woxxi yiide, A saroteedda.

¹⁶ Yesuusi barena kaalliyaawantta “Unttunttunna ayaa palumettiitee?” yaagiide oochcheedda.

¹⁷ He cora asaa giddoppe itti bitani zaariide, “Tamaarissiyaawoo, ta na7aa bollan haasayaa diggiyaa iita ayyaanay de7iyaa diraw, A neekko akkaade yaaddi.

¹⁸ Ha iita ayyaanay A oyqqiyaa wode ubbaan, A olee; A doonaannakka hoommuu paarottee; qassi achchaa garccissee; bollaakka zoolissee. Aappe ha iita ayyaanaa kessana mala, neena kaalliyaawanttoo odaaddi, shin kessanaw danddaybeykkino” yaageedda.

¹⁹ Yesuusi zaariide unttuntta, “Ammanenna ha wodiyaa asaw! Taani hinttenttunna awude gakkanaw de7anee? Qassi hinttenttubaa awude gakkanaw danddayanee? Na7aa taakko haa akki yiite” yaageedda.

²⁰ Unttunttu na7aa aakko aheeddino; he iita ayyaanay Yesuusa be7eedda man77iyankka na7aa kokkorssii aggeedda; na7ay sa7aan kunddiide, doonaanna hoommuu goppu giishshin gonddoretteedda.

²¹ Yesuusi he na7aa aawuwaa, “Hawe ne na7aa oyqqoodeppe woysa wode gidanee?” yaagiide oochcheedda. Na7aa aabbu, “I na7atethaan de7iyaa wodiyaappe doommeedda.

²² A wodhanaw daro wode tamaaninne haathaan oleedda; shin neeni danddayooppe, nuussi qarettaade nuuna maaddaarikkii” yaageedda.

²³ Yesuusi A, “Neeni danddayooppe gay? Ammaniyaa asaw ubbabay danddayettee” yaageedda.

²⁴ Ellekka na7aa aabbu bare kooshshaa dhoqqu oothiide, “Taani ammanay; shin gujja ammananaadan, taana maaddaarikkii” yaageedda.

²⁵ Yesuusi asay dari dari biyaawaa be7iide, iita ayyaanaa, “Na7aa tullenne duude udeedda ayyaanaw, ha na7aappe kesa gaade neena ta azazay; qassi zaarethaade aani geloppa” yaageedda.

²⁶ He iita ayyaanay waassiide, na7aa darissi kokkorssiide, aappe keseedda. Na7ay hayqqeeddawaa malatina, daro asay, “Na7ay hayqqeedda” yaageedda.

²⁷ Shin Yesuusi na7aa kushiyaa oyqqiide denthina, na7ay denddi eqqeedda.

²⁸ Yesuusi soy geleeddawaappe guyyiyan, A kaalliyaawanttu Yesuusa dumma, “Nuuni he iita ayyaanaa kessanaw ayissi danddaybeykkoo?” yaagiide oochcheeddino.