ማርቆሳ 4:17-35 in Gofa

¹⁷ ሺን ኤንታው ሚኖ ፃጶይ ባይና ጊሾ ሃዒሳፌ ኣቲን ጋምዖኮና። ጉꬃ ዎዴፔ ጉዬ ቃላ ጋሶን ዋዬይ ዎይኮ ጎዲ ጋኪያ ዎዴ ኤሌሲዲ ꬉቤቶሶና።

¹⁸ ኣጉንꬃ ጊዶን ዜሬቲዳይሲ ቃላ ሲዔይሳታ።

¹⁹ ሺን ሃ ሳዓ ዴዑዋስ ሂርጎይ፥ ዱሬቴꬃ ዶሶይኔ ሃራባ ኣሞቴይሲ ኢያ ዎዛናን ጌሊዲ ቃላ ጩሊያ ጊሾ ኣይፌ ኣይፎና ኣቲስ።

²⁰ ሺን ኣራዳ ቢታን ዜሬቲዳይሳቲ ቃላ ሲዒዲ ኤኬይሳታ። ኤንቲ ኢሶይ ሃስታማ፥ ኢሶይ ኡሱፑን ታማ ኢሶይ ፄታ ኣይፊስ» ያጊስ።

²¹ ዬሱሲ ጉጂዲ፥ «ፆምፔ ኤኪዲ፥ ዳቾፌ ዎይኮ ኣልጋፌ ጋርሳን ዎꬂያ ኣሲ ዴዒ? ꬎቃ ቤሳን ዎꬄኔዬ?

²² ሂዛ፥ ቆሴቲዳባይ ኡባይ ቆንጬ ኬያና፤ ጌሚዳባይ ኡባይ ኤሬቶና ኣቴና።

²³ ሲዒያ ሃይꬂ ዴዒያ ኦኒካ ሲዖ» ያጊስ።

²⁴ ቃሲ ኤንታኮ፥ «ሂንቴ ሲዒያባ ኣኬኪዲ ሲዒቴ! ፆሳ ቃላ ሂንቴ ሲዔይሳ ሜላ ኢ ሂንቴው ኣኬካ ኢማና። ኡባካ ሂንቴው ዳርሲዲ ኢማና።

²⁵ ኢሲባይ ዴዒያ ኡራስ ጉጂ ኢሜታና፥ ባይናይሳፌ ሃሪ ኣቶሺን፥ ኢያው ዴዒያ ሄ ጉꬂያካ ኤኬታና» ያጊስ።

²⁶ ዬሱሲ ዛሪዲ፥ «ፆሳ ካዎቴꬃይ ባ ጋዴን ዜሬꬂ ዜሪያ ኣሳ ሜላ።

²⁷ ሄ ኡራይ ቃማ ꬊስኬስ፤ ዎንታ ዴንዴስ። ኢ ባ ሁዔን ዋኒያኮ ኤሮና ዴዒሺን ሄ ዜሬꬃይ ዶሌሲኔ ዲጬስ።

²⁸ ቢታይ ካꬂ ባርካ ኢሜስ። ኮይሮ ዶሊዲ ዲጬስ፥ ካሊዲ ኣይፋናው ጋምቡፄስ፥ ዉርሴꬃን ኩሜꬃ ኣይፌ ኣይፌስ።

²⁹ ሺን ካꬃይ ጋኪያ ዎዴ ኡራይ ሶሁዋራ ባጫራ ጌሊ ኣጌስ» ያጊስ።

³⁰ ዬሱሲ፥ «ኑኒ ፆሳ ካዎቴꬃ ኣይ ዳኔስ ጋኔ? ዎይኮ ኣይቢራ ሌሚሳኔ?

³¹ ፆሳ ካዎቴꬃይ ኣይፌ ጉꬃ ሚꬂ ዳኔስ። ሄ ሚꬃ ኣይፊያ ዜሪያ ዎዴ ሳዓን ዴዒያ ሚꬃ ኣይፌ ኡባፌ ጉፄስ።

³² ዜሪን ዶሊዲ ኣታኪልቴ ኡባፌ ጊታቴስ፤ ዳሮ ዳሺ ዳዬስ። ካፎቲ ኢያ ታሺያ ቦላ ኬፂዲ ኡታና ጋካናው ዳዬስ» ያጊስ።

³³ ዬሱሲ ሃይሳ ሜላ ዳሮ ሌሚሶን ኣሳይ ኣኬካናው ዳንዳዔይሳ ሜላ ቃላ ኦዲስ።

³⁴ ኣሳስ ሌሚሶይ ባይና ኦዴና። ሺን ዬሱሲ ባ ታማሬታ ፃላላራ ዴዒያ ዎዴ ኤንታው ኡባባ ቢርሺዲ ኦዲስ።

³⁵ ሄ ጋላስ ሳዓይ ኦማርሲን፥ ዬሱሲ ባ ታማሬታኮ፥ «ኣባፌ ሄፊንꬂ ፒኖስ» ያጊስ።

¹⁷ Shin enttaw mino xaphoy baynna gisho ha77issafe attin gam77okona. Guutha wodeppe guye qaala gaason waayey woykko goodi gakkiya wode ellesidi dhubettoosona.

¹⁸ Aguntha giddon zerettidayssi qaala si7eyssata.

¹⁹ Shin ha sa7a de7uwas hirggoy, duretethaa dosoynne harabaa amotteyssi iya wozanan gelidi qaala cuulliya gisho ayfe ayfonna attis.

²⁰ Shin aradda biittan zerettidayssati qaala si7idi ekkeyssata. Entti issoy hasttama, issoy usuppun tamma issoy xeeta ayfis” yaagis.

²¹ Yesuusi gujjidi, “Xomppe ekkidi, daachchofe woykko alggafe garssan wothiya asi de7ii? Dhoqqa bessan wotheneyye?

²² Hiza, qosettidabay ubbay qoncce keyana; geemmidabay ubbay erettonna attenna.

²³ Si7iya haythi de7iya oonikka si7o” yaagis.

²⁴ Qassi enttako, “Hintte si7iyabaa akeekidi si7ite! Xoossaa qaala hintte si7eyssa mela I hinttew akeeka immana. Ubbaka hinttew darssidi immana.

²⁵ Issibay de7iya uraas gujji imettana, baynnaysafe hari attoshin, iyaw de7iya he guuthiyaka ekettana” yaagis.

²⁶ Yesuusi zaaridi, “Xoossaa kawotethay ba gaden zerethi zeriya asa mela.

²⁷ He uray qamma dhiskkees; wontta denddees. I ba huu7en waaniyakko eronna de7ishin he zerethay doleesinne diccees.

²⁸ Biittay kathi barkka immees. Koyro dolidi diccees, kaallidi ayfanaw gambbuxees, wurssethan kumetha ayfe ayfees.

²⁹ Shin kathay gakkiya wode uray sohuwara baacara geli aggees” yaagis.

³⁰ Yesuusi, “Nuuni Xoossaa kawotethaa ay daanees gaanee? Woykko aybira leemisanee?

³¹ Xoossaa kawotethay ayfe guutha mithi daanees. He mithaa ayfiyaa zeriya wode sa7an de7iya mitha ayfe ubbaafe guuxees.

³² Zerin dolidi atakiltte ubbaafe gitatees; daro daashshi daayees. Kafoti iya tashiya bolla keexidi uttana gakkanaw dayees” yaagis.

³³ Yesuusi hayssa mela daro leemison asay akeekanaw dandda7eyssa mela qaala odis.

³⁴ Asaas leemisoy baynna odenna. Shin Yesuusi ba tamaareta xalaalara de7iya wode enttaw ubbabaa birshshidi odis.

³⁵ He gallas sa7ay omarssin, Yesuusi ba tamaaretakko, “Abbaafe hefinthi pinnoos” yaagis.