ማርቆሳ 8:13-23 in Gamo

¹³ ኢስታ ሄን ኣጊዲኔ ዎጎሎን ጌሊዲ ሄ ፒንꬅ ፒኒዴስ።

¹⁴ ኢዛ ካሊዛይቲ ካꬅ ኦይኮንታ ባሌቲዳ ጊሽ ኢሲ ኡኬꬅ ኣቲን ዎጎሎ ጊዶን ሃራ ኣይ ካꬂካ ዴና።

¹⁵ ዬሱሲ ኢስታ “ፋርሳዌታ ኢርሾፌኔ ሄርዶሳ ኢርሾፌ ናጌቲቴ” ጊዲ ኣዛዚዴስ።

¹⁶ ኢስቲ ቃሴ ባ ጊዶን ኢሶይ ኢሳራ “ኢዚ ኑና ሃይሳ ጊዛይ ኑስ ካꬅ ባይንዳ ጊሻሳ” ጊ ዮቴቲዳ።

¹⁷ ቃሴ ዬሱሲ ኢስታ ቆፋ ኤሪዲ “ኑስ ካꬂ ባይንዳ ጊሽ ጋሳ ጊዲ ኢንቴ ጊዶን ኣዛስ ሃሳዬቴቲ? ሃዒካ ዩሺ ቆፔኬቲ? ዎዝናንካ ዎꬄኬቲ? ዎይኮ ኢንቴ ዎዝናይ ሹቻቲዴ?

¹⁸ ኢንቴስ ኣይፌይ ዴስ ሺን ፄሌኬቲ? ሃይꬂ ዴስ ሺን ሲዬኬቲ? ኣኬኬኬቲ?

¹⁹ ኢቻሹ ኡኬꬃ ኢቻሹ ሺ ኣሳስ ታ ሜንꬃ ኢሚን ኣፑን ፒꬃ ኩሜꬃ ካꬅ ዴንꬂዴቲ?” ጊዴስ። ኢስቲካ ዛሪዲ “ታማኔ ናምዑ” ጊዳ።

²⁰ ኢዚካ “ላፑን ኡኬꬃ ኦይዱ ሺ ኣሳስ ታ ሜንꬃ ኢሚን ኣፑን ፒꬃ ኩሜꬃ ካꬅ ዴንꬂዴቲ?” ጊ ኦይቺን ኢስቲካ “ላፑን” ጊዳ።

²¹ ኢዚካ ኢስታ “ሂስቲን ሃዒ ጋካናስ ዩሺ ቆፒቤኬታካ!” ጊዴስ።

²² ሄሳፌ ጌዴ ቤቴሳይዳ ጌቴቲዛሶ ቢዳ። ጉꬃ ኣሳቲካ ኢሲ ኣይፌ ቆቄ ኣሲ ዬሱሳኮ ኤሂዲ ዬሱሲ ኢዛ ቦቻና ማላ ዎሲዳ።

²³ ኢዚካ ሄ ቆቄዛ ኩሼ ኦይኪ ጎቺዲ ኣሲ ዲዛሶፔ ጌዴ ካሬ ኬሲ ኣዴዛ ኣይፌን ጩቲዲኔ ባ ኩሼ ኢዛ ቦላ ዎꬂዲ “ሃዒ ኔስ ኣዚ ቤቲዜ?” ጊ ኦይቺዴስ።

¹³ Ista heen aggidinne wogolon gelidi he pinth pinnides.

¹⁴ Iza kaallizayti kath oykkonta balettida gish issi uketh attin wogolo giddon hara ay kaththikka deenna.

¹⁵ Yesusi ista “Farsaaweeta irshofenne Herdoosa irshofe naagetite” giidi azazides.

¹⁶ Isti qasse ba giddon issoy issara “Izi nuna hayssa gizay nuus kath baynda gishassa” gi yootettida.

¹⁷ Qasse Yesusi ista qofa eridi “Nuus kaththi baynda gish gaasa giidi inte giddon aazas hasayettetii? Ha7ikka yuushi qoppeketii? Woznanka wotheketii? Woykko inte woznay shuchchatidee?

¹⁸ Intes ayfey dees shin xeelleketii? Haythi dees shin siyekketii? Akeekekketii?

¹⁹ Ichashu uketha ichashu shi asaas ta mentha immin aapun pitha kumeththa kath denthidetii?” gides. Istika zaaridi “Tammanne nam7u” gida.

²⁰ Izikka “Laapun uketha oyddu shi asas ta mentha immin aapun pitha kumeththa kath denthidetii?” gi oychin istika “Laapun” gida.

²¹ Izikka ista “Histin ha7i gakkanaas yuushi qoppibeekketakka!” gides.

²² Hessafe gede Betesayda geetettizaso bida. Guutha asatikka issi ayfe qooqe asi Yesusakko ehidi Yesusi iza bochchana mala woossida.

²³ Izikka he qooqeza kushe oykki goochchidi asi dizasoppe gede kare kessi addeza ayfen cuttidinne ba kushe iza bolla woththidi “Ha7i nees aazi bettizee?” gi oychides.