ማርቆሳ 7:14-33 in Gamo

¹⁴ ቃሴካ ዬሱሲ ኣሳ ባኮ ፄይጊዲ “ዉሪካ ታ ጊዛ ሲዪቴኔ ዎዝናን ዎꬂቴ።

¹⁵ ካሬፔ ኡሎ ጊዶ ጌሊዲ ኣስ ቱኒሲዛ ኢሲ ሚሺካ ዴና። ሃራፔካ ኣሴ ቱኒሲዛይ ኬꬃ ኣዋፔ ጌዴ ካሬ ኬዚዛ ሚሻ።

¹⁶ ሲዪዛ ሃይꬂ ዲዛይ ሲዮ!” ጊዴስ።

¹⁷ ኢዚ ኣሳ ካሬን ኣጊዲ ኬꬄ ጌሊን ኢዛ ካሊዛይቲ ኢዚ ዮቲዳ ሌሚሶዛ ቢርሼꬅ ዬሱሳ ኦይቺዳ።

¹⁸ ኢዚካ ኢስታ “ኢንቴስካ ዮዖይ ጌሌኔ? ካሬፔ ጌሊዲ ኣሴ ቱኒሲዛ ሚሺ ኣዚካ ዴና።

¹⁹ ካሬፔ ጌሊዛይ ጌዴ ዎዝናን ጊዶንታ፤ ዱጌ ቃንꬃ ጊዶ ጌሌስ ቃሴ ሄፔ ኢዛዴ ኣሳቴꬃፌ ጌዴ ካሬ ኬዜስ።” ዬሱሲ ሄሳ ጊዳይ ኣሲ ሚዛ ካꬂ ዉሪካ ጌሽ ጊዲዳይሳ ቆንጪሳናሳ።

²⁰ ካሌꬂዲካ “ኣሳፔ ኬዚዛዚ ኣሴ ቱኒሴስ።

²¹ ኣሳ ዎዝና ጊዶፌ ኬዚዛይ ኢታ ቆፋታ፥ ላይማ ኣሞኔ ካይሶቴꬅ፥ ኣሴ ዎꬎ፥ ላይማቴꬅ፥

²² ዪቄቴꬅ፥ ኢታቴꬅ፥ ባሌꬆ፥ ላይማ ካስ፥ ቃናቴቴꬅ፥ ኣሳ ሱንꬅ ሞሮ፥ ኦቶሬቴꬂኔ ኣዛላ።

²³ ሃይቲ ኢታ ሃኖቲ ዉሪ ኣሳፔ ኬዜቴሲኔ ኣሴ ቱኒሴቴስ” ጊዴስ።

²⁴ ዬሱሲ ሄፔ ኬዚዲ ፂሮሴ ጌቴቲዛ ዴሬ ቢዴስ። ሄን ኢሳዴ ኬꬄ ጌሊዲ ኢዚ ሄን ዲዛይሳ ኣሲ ኤሮንታ ማላ ኮዪዴስ። ጊዶ ኣቲን ኢዚ ሄን ኢዛ ዱሳይ ቆቴታናስ ዳንዳዬቲቤና።

²⁵ ሄራካ ኢሲ ቱና ኣያናይ ኦይኪዳ ጉꬃ ና ዲዛሪ ኣያ ዬሱሲ ሄን ዲዛይሳ ሲያዳ ኢዛኮ ያዳ ኢዛ ቶሆ ቦላ ኩንዳዱስ።

²⁶ ማጫሳያ ኣይሁዳ ጊዶንታ ጊሪኬ ቃላ ሃሳዪዛ ማጫሳሺን ኢዛ ዬሌቲዳሶይ ሲሮፊንቄ ጌቴቴስ። ኢዛካ ዬሱሲ ናይፔ ቱና ኣያና ኬሳና ማላ ዎሳዱስ።

²⁷ ዬሱሲ ዛሪዲ ኢዚስ “ናይታ ቁማ ኤኪ ካናስ ዬጋናስ ቤሶንታ ጊሽ ኮይሮ ናይቲ ሚ ካሌቶ” ጊዴስ።

²⁸ ኢዛካ ዛራዳ “ኤ ጎዶ! ካናቲካ ማዳ ማታን ዴዒዲ ናይታ ኩሼፔ ጋዴን ዎꬊዳይሳ ሜቴሲኮ” ጋዱስ።

²⁹ ኢዚካ “ሂስቲኮ ኔኒ ሄሳ ጊዳ ጊሽ ባ! ዳይዳንꬃይ ኔ ናይፔ ኬዚዴስ” ጊዴስ።

³⁰ ኢዛ ሲማዳ ሶ ቢሺን ናያ ዳይዳንꬃይ ዬዲን ፓፃዳ ሂፃን ኢቺዳሮ ዴማዱስ።

³¹ ሄሳፌ ዬሱሲ ፂሮሴ ቢታፌ ዴንዲዲ ሲዶና ጊዛሶራ ኣꬊ ታሙ ካታማ ጊዛሶራ ካንꬂዲ ጌዴ ጋሊላ ኣባኮ ጋኪዴስ።

³² ኣሳይ ኢሲ ሃይꬃ ቱሌኔ ኣይፌ ቆቄ ኣሲ ኢዛኮ ሄ ኤኪ ዪዲ ዬሱሲ ኢዛ ቦላ ባ ኩሼ ዎꬃና ማላ ዎሲዳ።

³³ ዬሱሲካ ኢዛ ኣሳፔ ሻኪ ኤኪ ቢዲ ባ ኩሼ ቢራꬌታ ኣዴዛ ሃይꬃን ጌልꬂዴስ፤ ቃሴካ ጩች ጩቲዲ ኣዴዛ ኢንፃርሳ ቦቺዴስ።

¹⁴ Qasseka Yesusi asa baako xeygidi “Wurikka ta giza siyitenne woznan woththite.

¹⁵ Kareppe ulo gido gelidi as tunisiza issi miishikka deenna. Harappeka ase tunisizay keeththa aawappe gede kare keziza miisha.

¹⁶ Siyiza haythi dizay siyo!” gides.

¹⁷ Izi asa karen aggidi keeththe gelin iza kaallizayti izi yootida leemisoza birsheth Yesusa oychida.

¹⁸ Izikka ista “Inteska yo7oy gellenee? Kareppe gelidi ase tunisiza miishi aazikka deenna.

¹⁹ Kareppe gelizay gede woznan gidonta; duge qantha gido gelees qasse heeppe izaade asatethafe gede kare kezees.” Yesusi hessa giday asi miza kaththi wurikka geesh gididayssa qoncisanassa.

²⁰ Kaalethidikka “Asappe kezizazi ase tunises.

²¹ Asa wozna giddofe kezizay iita qofata, layma amonne kaysoteth, ase wodho, laymateth,

²² Yiiqeteth, iitateth, baleththo, layma kaas, qanatetteth, asa sunth mooro, otoretethinne azalla.

²³ Hayti iita hanoti wuri asappe kezeetessinne ase tuniseetes” gides.

²⁴ Yesusi heeppe kezidi Xiroose geetettiza dere bides. Heen issade keeththe gelidi izi heen dizayssa asi eronta mala koyides. Gido attin izi heen iza duussay qotettanas dandayettibenna.

²⁵ Heerakka issi tuna ayanay oykkida guutha naa dizaari aaya Yesusi heen dizayssa siyada izakko yaada iza toho bolla kundadus.

²⁶ Macasaya Ayhuda gidonta Girike qaala haasayiza macasashin iza yelettidasoy Sirofinqe geetettes. Izakka Yesusi naype tuna ayana kessana mala woossadus.

²⁷ Yesusi zaaridi izis “Nayta quma ekki kanas yegganas bessonta gish koyro nayti mi kalletto” gides.

²⁸ Izakka zaarada “Ee Godo! Kanatikka maadda matan de7idi nayta kusheppe gaden wodhdhidayssa meetesikko” gadus.

²⁹ Izikka “Histikko neni hessa gida gish ba! Daydanthay ne naype kezides” gides.

³⁰ Iza simmada so bishin naya daydanthay yeddin paxada hiixan ichchidaro demmadus.

³¹ Hessafe Yesusi Xiroose biittafe dendidi Sidoona gizasora aadhdhi tammu katama gizasora kanthidi gede Galila Abbako gakkides.

³² Asay issi haytha tullenne ayfe qooqe asi izakko he ekki yiidi Yesusi iza bolla ba kushe wothana mala woossida.

³³ Yesusikka iza asappe shaakki ekki biidi ba kushe biradhdheta addeza haythan gelthides; qasseka cuchch cuttidi addeza inxarsa bochides.