ማርቆሳ 6:9-53 in Gamo

⁹ ጫማ ኣꬂቴ ጊዶ ኣቲን ላማና ማይዖ ኦይኮፍቴ።

¹⁰ ኢሲ ኬꬄ ኢንቴ ጌሊኮ ሄ ካታማፔ ኢንቴ ኬዛና ጋካናስ ሄ ኬꬃን ዲቴ።

¹¹ ኣዋንካ ኦኒካ ኢንቴና ሞኪ ኤኮንታ ኢፂኮ ሄፔ ኬዚሼ ሄ ዴሬታ ቦላ ማርካ ጊዳና ማላ ኢንቴ ቶሆ ቦላ ዲዛ ጉዱላ ቆቆፍቴ” ጊዲ ኣዛዚዴስ።

¹² ኢስቲካ ሄፔ ኬዚዲ ዴሬይ ማሮቴꬃን ጌላና ማላ ሳባኪዳ።

¹³ ዳሮ ዳይዳንꬃታ ኬሲዳ፤ ዳሮ ሃርጋንቻታ ዛይቴ ቲዪ ቲዪዲ ፓꬂዳ።

¹⁴ ዬሱሳ ሱንꬂ ካሴፔ ኤሬቲ ኤሬቲ ቢሺን ካዎ ሄርዶሲ ሄሳ ሲዪዴስ። ኢሲ ኢሲ ኣሳቲ “ሃይሳ ማላ ማላታታ ኦꬂዛ ፃማቂዛ ዮሃኒሲ ሃይቆፔ ዴንዲኒኮ” ጊዳ።

¹⁵ ባጋይቲ “ኤላሳ” ጌቴስ፤ ባጋ ኣሳይ ቃሴ “ካሴ ናቤታፔ ኢሳ ሚሳቴስ” ጌቴስ።

¹⁶ ሄርዶሲ ዮዖዛ ሲይዲ “ታ ኢዛ ቆꬌ ቃንፂሲዳ ዮሃኒሲ ሃይቆፔ ፓፂ ዴንዲዴስ” ጊዴስ።

¹⁷ ሄርዶሲ ባ ኢሻ ፒሊጶሳ ማቾ ሄሮዲያዶ ኤኪዳ ጌዶን ኦይኬቲዲ ቃሼታና ማላ ኣዛዚዲ ዮሃኒሳ ቃሾ ኬꬄ ጌልꬂዴስ።

¹⁸ ዮሃኒሲ ሄርዶሳ “ኔ ኢሻ ማቾ ኔ ኤኮንታ ማላ ዎጋይ ኔና ዲጌስ” ጊዳ ጊሽ ቃቺዴስ።

¹⁹ ሄሮዲያዳ ሄሳ ጊሽ ሆሎታዳ ኢዛ ዎꬊሳናስ ኮያዱስ ሺን ዳንዳያቤኩ።

²⁰ ጋሶይካ ዮሃኒሲ ፂሎኔ ጌሻ ኣስ ጊዲዳይሳ ሄርዶሲ ኤሪዛ ጊሽ ዮሃኒሳስ ባቤሲኔ ኢዛ ናጌስ። ዮሃኒሲ ዮቲዛይሳ ሄርዶሲ ሲይዲ ሂርጊዛ ጊዲኮካ ኢዚ ዮቲዛይሳ ዎዝናፔ ሲዬስ።

²¹ ሄርዶሳ ዬሌታ ጋላስ ቦንቻናስ ꬎቃ ሹሜታስ፤ ኦላ ዎታዳራታ ኣዛዚዛ ዋናታሲኔ ጋሊላ ቢታን ኬሂ ኤሬቲዛ ጊታ ኣሳታስ ጊቢራ ኬሲዴስ፤ ሄሲካ ሄሮዲያዲስ ጊጋ ጋላስ ጊዲዴስ።

²² ሄሮዲያዲ ማጫ ናያ ጌላዳ ኣሳ ሲንꬃን ዬꬅ ዬፂን ሄርዶሳኔ ኢዚ ፄይጊዳ ኣሳ ኢዚ ዬꬃይ ኡፋይሲዴስ። ካዎይካ ናዮ “ኔ ኮዪዛ ሚሽ ዉርሳ ታና ኦይቻ ታ ኔስ ኢማና” ጊዴስ።

²³ ቃሴካ ታ ካዎቴꬃ ባጋ ጊዲዳኮካ ኔ ኦይቺኮ ዉርሳ ታ ኔስ ኢማና ጊዲ ኢዚስ ጫቂዴስ።

²⁴ ናያካ ኤሌላ ኬዛዳ ባ ኣዬዮ “ካዎ ኣይ ኦይቾ?” ጋዱስ። ኣዪያካ “ፃማቂዛ ዮሃኒሳ ሁዔ ቃንፃዳ ኢማ ጋ” ጋዱስ።

²⁵ ናያካ ኤሌላ ኬዛዳ ካዎዛኮ ጌላዳ “ፃማቂዛ ዮሃኒሳ ሁዔ ኬሬን ዎꬃዳ ኔ ታስ ኢማና ማላ ኮያይስ” ጋ ኦይቻዱስ።

²⁶ ካዎይ ሄ ዮዖዛን ዳሮ ሞꬌቲዴስ፤ ጊዶ ኣቲን ፄይጌቲዳ ኢማꬃ ጊሺኔ ጫቂዳ ቃላ ጊሽ ኢዚስ ኣካይ ጋናስ ኮይቤና።

²⁷ ሄሳ ጊሽ ዎታዳራታፔ ኢሳ ኤሶን ኪቲዲ ዮሃኒሳ ቆꬌ ቃንፂዲ ኢዛ ሁዔ ኤኪ ያና ማላ ኣዛዚዴስ፤ ኢዚካ ቢዲ ቃሾ ኬꬃ ጊዶን ዮሃኒሳ ቆꬌ ቃንፂዴስ።

²⁸ ሁዔዛ ኬሬራ ኤሂዲ ናይስ ኢሚዴስ፤ ናያካ ባ ኣዬይሲ ኢማዱስ።

²⁹ ዮሃኒሳ ካሊዛይቲካ ሄሳ ሲዪዳ ማላ ዪዲ ዮሃኒሳ ኣሃ ኤኪ ኤፊዲ ሞጊዳ።

³⁰ ሄሳፌ ጉዬ ሃዋሬቲ ሲሚዲ ዬሱሳ ኣቻን ዩዪ ኣꬊ ባ ኦꬂዳይሳኔ ባ ታማርሲዳይሳ ዉርሲ ኢዛስ ዮቲዳ።

³¹ ዳሮ ኣሳይ ዪሼኔ ቢሼ ጊዛ ጊሽ ቁማ ሚዛ ዎዴይካ ቤቲቤና፤ “ኣኔ ኢንቴ ፃላ ታናራ ኣሲ ባይንዳሶ ቢዲ ኣኔ ጉꬅ ሼምፒ ኤኪቴ” ጊዴስ።

³² ሄሳ ጊሽ ኢስቲ ባርካ ዎጎሎን ጌሊዲ ኢሲ ኣሲ ባይንዳሶ ቢዳ።

³³ ኢስቲ ቢሺን ዳሮቲ ቤዪዲ ቶሆራ ዎꬃን ኢስታፌ ሲንꬄ ኣꬊዳ።

³⁴ ዬሱሲ ዎጎሎዛፔ ዎꬊዛ ዎዴ ዳሮ ዴሬይ ሺቂ ኡቲዳይሳ ቤዪዴስ። ሄሚዛዴይ ባይንዳ ሜሄ ማላ ጊዲዳ ጊሽ ኣሳስ ቃꬌቲዴስ። ዳሮ ዮዖካ ታማርሶ ኦይኪዴስ።

³⁵ ሄ ዎዴ ጋዴይ ቃሚ ቃሚ ቢዛ ጊሽ ኢዛ ካሊዛይቲ ኢዛኮ ሺቂዲ “ሃይሲ ኑ ዲዛሶይ ባዞኮ፥ ጋዴይካ ቃሚዴስ።

³⁶ ሃይሳ ሄራን ኣሲ ዲዛሶ ቢዲ ኣሳይ ባስ ሚዛ ካꬅ ሻሚ ማና ማላ ኣሳ ዬዳ” ጊዳ።

³⁷ ኢዚ ኢስታስ ዛሪዲ “ኣሳስ ሚዛ ሚሽ ኢንቴ ኢሚቴ” ጊዴስ። ኢስቲካ ማላሌቲዲ “ኑኒ ቢዲ ናምዑ ፄቱ ዲናሬራ ካꬅ ሻሚዲ ሃይሳ ኣሳስ ኢሚዛኮ ጊዳንዴ?” ጊዳ።

³⁸ ኢዚካ ኢስታስ “ኢንቴስ ኣይ ላጌ ኡኬꬂ ዲዛኮኔ ኣኔ ቢዲ ፄሊቴ” ጊን ኢስቲ ቢ ፄሊዲ “ኢቻሹ ኡኬꬂኔ ናምዑ ሞሌይ ዴስ” ጊዳ።

³⁹ ሄሳፌ ካሊዲ ኣሳ ጪሊላ ማታ ቦላ ኦይዳን ኦይዳን ኡቲሳና ማላ ኣዛዚዴስ።

⁴⁰ ኣሳይካ ፄቱ ፄቱኔ ኢቻሹ ታሙ ኢቻሹ ታሙ ጊዲዲ ኦይዳን ኡቲዴስ።

⁴¹ ኢዚካ ኢቻሹ ኡኬꬃኔ ናምዑ ሞሌታ ባ ኩሼን ኦይኪዲ ፑዴ ሳሎ ፄሊዲ ኣንጂዲኔ ኡኬꬃ ሜንꬂ ሜንꬂ ኣሳስ ጊሻና ማላ ባና ካሊዛይታስ ኢሚዴስ፤ ናምዑ ሞሌታካ ኡባ ኣሳስ ሻኬሬꬂዴስ።

⁴² ኣሳይ ዉሪካ ሚዲ ካሊዴስ።

⁴³ ዬሱሳ ካሊዛይቲ ኣሳይ ካሊ ሚን ኣቲዳይሳ ታማኔ ናምዑ ፒꬃ ኩሜꬅ ሺሺዳ።

⁴⁴ ካꬅ ሚዳ ኣሳፔ ኣቱማሳይ ፃላ ኢቻሹ ሺ።

⁴⁵ ሄራካ ኢዚ ኣሳ ሞይዚሼ ኢዛ ካሊዛይቲ ሲንꬃቲዲ ጌዴ ፒንꬅ ቤቴሳይዳ ጌቴቲዝሶ ፒናና ማላ ኣዛዚዴስ።

⁴⁶ ሄፔካ ኢስታ ኣጋጊዲ ዎሳናስ ፑዴ ዙማ ቦላ ኬዚዴስ።

⁴⁷ ጋዴይ ቃሚን ዎጎሎይ ኣባ ጊዶን ዲሺን ኢዚ ባርካ ቢታ ቦላ ዴስ።

⁴⁸ ኣባ ቦላ ጫርኮይ ኬሂ ሜቲዳ ጊሽ ኢዛ ካሊዛይቲ ኣባ ሺሪ ሺሪ ዎጎሎ ላጊዛ ሚሻራ ባፄቲሺን ዬሱሲ ቤዪዴስ። ዎንታ ቦላ ኢስታኮ ዪዴስ፤ ዪዲኔ ኢስታ ኣቻራ ኣꬊ ባናꬆ ሃኒዴስ።

⁴⁹ ጊዶ ኣቲን ኣꬊ ባና ሃኒሺን ኢዛ ቤዪዳ ማላ ሞይቲሌ ቤዪዳ ሚሳቲን ዉሪካ ዋሲዳ።

⁵⁰ ዉሪካ ኢዛ ቤዪዲ ዳጋሚዳ፤ ኢዚካ ሄራካ ኢስታ ዮቺዲኔ “ኣይኮይ ባ፤ ታናኮ ዳጋሞፍቴ!” ጊዴስ።

⁵¹ ኢዚካ ዎጎሎን ኢስታኮ ጌሊን ጫርኮይ ጮዑ ጊዴስ፥ ኢስቲካ ዳሮ ማላሌቲዳ።

⁵² ካሴ ኢዚ ኡኬꬃን ኦꬂዳ ማላታ ቢርሼꬅ ኢስቲ ኤሮንታ ጊሽ ኢስታ ዎዝናይ ዶጪዴስ።

⁵³ ኣባ ፒኒዲ ጌንሴሬፄ ጌቴቲዛሶ ጋኪዳ፤ ዎጎላፔ ዎꬊዲ ዎጎሎዛ ሄን ቃቺዲ ኣጊ ቢዳ።

⁹ Caamma aaththite gido attin laammana may7o oykkofte.

¹⁰ Issi keeththe inte gelikko he katamappe inte kezana gakkanaas he keeththan diite.

¹¹ Awanka oonikka intena mokki ekkonta ixikko heeppe kezishe he dereta bolla marka gidana mala inte toho bolla diza gudulla qoqofte” giidi azazides.

¹² Istika heeppe kezidi derey maarotethan gelana mala sabakida.

¹³ Daro daydanthata kessida; daro harganchata zayte tiyi tiyidi pathida.

¹⁴ Yesusa sunthi kaseppe ereti ereti bishin kawo Herdoossi hessa siyides. Issi issi asati “Hayssa mala malatata ooththiza Xammaqiza Yohannisi hayqoppe dendinikko” gida.

¹⁵ Baggayti “Elaasa” geettes; bagga asay qasse “Kase nabetappe issa misatees” geettes.

¹⁶ Herdoossi yo7oza siydi “Ta iza qoodhe qanxisida Yohannisi hayqoppe paxi dendides” gides.

¹⁷ Herdoossi ba isha Piliphoosa macho Herodiyado ekkida geedon oyketidi qashettana mala azazidi Yohannisa qasho keeththe gelthides.

¹⁸ Yohannisi Herdoosa “Ne isha macho ne ekkonta mala wogay nena diggees” gida gish qachides.

¹⁹ Herodiyada hessa gish hoollotada iza wodhisanas koyadus shin dandayabekku.

²⁰ Gaasoyka Yohannisi xillonne geeshsha as gididayssa Herdoossi eriza gish Yohannisas babbessinne iza naagees. Yohannisi yootizayssa Herdoossi siydi hirgiza gidikkokka izi yootizayssa woznappe siyees.

²¹ Herdoosa yeletta gallas bonchanas dhoqa shuumetas; olla wotadarata azaziza waannatassinne Galila biittan keehi erettiza gita asatas gibira kessides; hessika Herodiyadis giiga gallas gidides.

²² Herodiyadi maca naya gelada asa sinthan yeth yexin Herdoosanne izi xeygida asa izi yethay ufaysidees. Kawoykka nayo “Ne koyiza miish wursa tana oycha ta nees immana” gides.

²³ Qasseka ta kawoteththa bagga gididakkokka ne oychikko wursa ta nees immana giidi izis caaqides.

²⁴ Nayakka elela kezada ba aayeyo “Kawo ay oychoo?” gadus. Aayiyakka “Xammaqiza Yohannisa hu7e qanxada imma ga” gadus.

²⁵ Nayakka elela kezada kawozakko gelada “Xammaqiza Yohannisa hu7e keren wothada ne taas immana mala koyays” ga oychadus.

²⁶ Kawoy he yo7ozan daro modhettides; gido attin xeeygetida imatha gishinne caaqida qaala gish izis akay gaanas koybeenna.

²⁷ Hessa gish wotadaratappe issa eeson kiittidi Yohannisa qoodhe qanxidi iza hu7e ekki yaana mala azazides; izikka biidi qasho keeththa giddon Yohannisa qoodhe qanxides.

²⁸ Hu7eza kerera ehidi nays immides; nayakka ba aayeyssi immadus.

²⁹ Yohannisa kaallizaytikka hessa siyida mala yiidi Yohannisa aha ekki efidi moogida.

³⁰ Hessafe guye Hawaareti simmidi Yesusa achchan yuuyi aadhdhi ba ooththidayssanne ba tamarsidayssa wursi izas yootida.

³¹ Daro asay yishenne bishe giza gish quma miza wodeykka bettibenna; “Ane inte xalla tanara asi bayndaso biidi ane guuth shempi ekkite” gides.

³² Hessa gish isti barka wogolon gelidi issi asi bayndaaso bida.

³³ Isti bishin daroti beyidi tohora wothan istafe sinthe aadhdhida.

³⁴ Yesusi wogolozappe wodhdhiza wode daro derey shiiqi uttidayssa beyides. Heemmizadey baynda mehe mala gidida gish asas qadhettides. Daro yo7okka tamarso oykkides.

³⁵ He wode gadey qammi qammi biza gish iza kaallizayti izakko shiiqidi “Hayssi nu dizasoy bazzokko, gadeykka qammides.

³⁶ Hayssa heeran asi dizaso biidi asay baas miza kath shami maana mala asa yedda” gida.

³⁷ Izi istas zaaridi “Asaas miza miish inte immite” gides. Istika malalettidi “Nuni biidi nam7u xeetu dinarera kath shamidi hayssa asas immizakko gidandee?” gida.

³⁸ Izikka istas “Intes ay lagge ukethi dizakonne ane biidi xeellite” giin isti bi xeelidi “Ichashu ukethinne nam7u moley dees” gida.

³⁹ Hessafe kaallidi asaa cilila maata bolla oyddan oyddan uttisana mala azazides.

⁴⁰ Asaykka xeetu xeetunne ichashu tammu ichashu tammu gididi oyddan uttides.

⁴¹ Izikka ichashu ukethanne nam7u moleta ba kushen oykidi pude salo xeelidi anjidinne uketha menthi menthi asas gishana mala bana kaallizaytas immides; nam7u moletaka ubba asas shaakerethides.

⁴² Asay wurikka miidi kallides.

⁴³ Yesusa kaallizayti asay kalli miin attidayssa tammanne nam7u pitha kumeth shiishida.

⁴⁴ Kath mida asaappe attumasay xalla ichashu shi.

⁴⁵ Heerakka izi asaa moyzishe iza kaallizayti sinthatidi gede pinth Betesayda geetettizso pinnana mala azazides.

⁴⁶ Heeppeka ista aggagidi woossanas pude zuma bolla kezides.

⁴⁷ Gadey qammin wogoloy abba giddon dishin izi barka biitta bolla dees.

⁴⁸ Abba bolla carkoy keehi metida gish iza kaallizayti abba shiri shiri wogolo laaggiza miishara baaxetishin Yesusi beyides. Wonta bolla istako yides; yiidinne ista achchara aadhdhi baanatho hanides.

⁴⁹ Gido attin aadhdhi bana hanishin iza beyida mala moytile beyida misatin wurikka waassida.

⁵⁰ Wurikka iza beyidi daggammida; izikka heerakka ista yoochidinne “Aykkoy ba; tanakko dagammofte!” gides.

⁵¹ Izikka wogolon istako gelin carkoy co7u gides, istika daro malalettida.

⁵² Kase izi ukethan ooththida malata birsheth isti eronta gish ista woznay doccides.

⁵³ Abba pinnidi Gensereexe geetettizaso gakkida; wogolappe wodhdhidi wogoloza heen qachidi aggi bida.