Mark 9:7-38 in Wedau

⁷ Anina ma apau i eḡa ma taui i purui. Ma pona apauei i opu ma i riwa i pa, “Wei Tau Natu au nuavainana, ona rautaniḡanei!”

⁸ Maratagogi taui i ʼnana viravira ma eḡa aiai ḡelauna ita inanai ma Iesu, tauna ava.

⁹ Ma maranai olei i ḡaiḡairai ma Iesu, taui i viḡaei da aiwai i ʼnananaia eḡa ina vieḡai da au naona Rava Natuna iraḡelei ina vomairi me.

¹⁰ Ma taui, wei riwana i voteletelei ma i babani vivira i pa, “Iraḡelei vomairi me anona aiwai?”

¹¹ Ma taui, i vitara-virevirei i pa, “Aiwai aubaina, tarawatu babadai e ririwa da Elijah au naona ina nei?”

¹² Iesu i paribelei, “Riwa kaua Elijah au naona ina nei da aiwai anatapuna ina vokaukauei. Aubaina wariaḡa i girumi da Rava Natuna ina vinuapoapoe kaua ma ina inana-geduaiei.

¹³ Wate a ririwana-kauemi da Elijah anina i nei ma rava, ai ḡoanei tauna i rau-iviapoapoelei me i girugirumia nanare.”

¹⁴ Iesu ana tauvotaḡotaḡo tonuḡa maiteni olei i ḡaira memei ai rava awari ma patara ḡaeḡaena, taui i gariḡuruvi. Ma Jew ai tarawatu babadai, taui maiteni i vivitarapiri.

¹⁵ Maranai patara, Iesu i ʼnanai. Taui orai i auepai ma awarina i ruba ma i viegualauei.

¹⁶ Iesu, taui i vitara-virevirei, “Aiwai o vitarapiriei?”

¹⁷ Oroto tagogi patara au poui i paribelana, “Tauviararamana, arua-apoapoena natu orotona au orana e mamae ma i kauei da eḡa ita bababani, lamna aubaina a neiai awarim.

¹⁸ Maranai ana doria e ururu-melei, lamna arua-apoapoena: tauna au doa e tawatawanei; gamona e vivipuropuro; ivona e utauta ḡiriḡiriei; ma inina e badobado. Am tauvotaḡotaḡo a vibaḡai da arua-apoapoena ita viopuni, wate eḡa tagotagogina da ita kauei.”

¹⁹ Ma Iesu i paribelei, “Oo mara aiwai ona vitumaḡana! Ta mae ḡaḡa ma ami vita ana ʼvara ḡaḡalei? Tevera awariu ona neiai!”

²⁰ Ma tevera i neiai Iesu awarina. Ma maranai arua-apoapoena, Iesu i ʼnanai, maratagogi tevera i viaikwajiana-guratei da au doa i tonei ma i vitatauvira ma i vivipuropuro.

²¹ Iesu, tevera amana i vitara-virevirei, “Wei teverana ana doria mara aiwai i vikarei?” I paribelei i pa, “Maranai aburunai.

²² Arua-apoapoena mara au anatapuna, tauna ai au araratana ma au waira e tawatawanei ma i ḡoei da ita viraḡeni. Mepa da tam tagotagogina; ma raunuʼapoapoelelai ma ma voaguiai!”

²³ Iesu, tauna i riwei, “Menanare da u riwa, ‘Mepa da tam tagotagogina?’ Aiai ravana e vivitumaḡana, God anatapuna ina kauei tauna aubaina.”

²⁴ Maratagogi tevera amana i garara, “A vitumaḡana, wate au tumaḡana eḡa ita rata ma ma voaguiu da ina rata!”

²⁵ Iesu i ʼnana da patara i rierieiai awarii ma lamna aubaina arua-apoapoena i egari i pa, “Tam arua taniḡa-potapotana ma gumgum. Tau a egaegarim da tevera ma opu-tawanei. Ma eḡa melanai au orana ma rui me!”

²⁶ Ma arua i garara ma tevera i viaikwajiana-guratei ma i opu-tawanei. Ma tevera inanana me taubeu. Ma rava maḡamaḡaui kampa i riwa, “Tauna iʼraḡe!”

²⁷ Ma Iesu, tauna urana i vojijini ma i sinaepai da i mairi.

²⁸ Muriai Iesu, ana tauvotaḡotaḡo maiteni i rui au numa. Ma maranai taui ava ma i paridadanei i pa, “Aiwai aubaina tauai eḡa tagotagogina da arua-apoapoena ata viopuni?”

²⁹ Iesu, i riwa, “Arua-apoapoei me wenanare, pari ainelana ina viopuni.”

³⁰ Iesu, ana tauvotaḡotaḡo maiteni dobuna i netawanei ma Galili i verautuini. Iesu eḡa ita ḡoei da rava ita aramanei da taui mepa.

³¹ Aubaina tauna, ana tauvotaḡotaḡo i viararamani i pa, “Taui Rava Natuna ina amverenei rava ḡelaui au urai. Ma taui ina viraḡeni. Wate au pom tonuḡa au murina ina vomairi me.”

³² Wate taui eḡa ita aramanei tauna aiwai i bababaniei. Ma pari-dadanana i rovoei.

³³ Iesu ana tauvotaḡotaḡo maiteni i ḡeta au Capeniam ma au numa i rui. Ma Iesu, taui i vitara-virevirei, “Au etanai aiwai o vitarapiriei?”

³⁴ Wate taui i genuana, aubaina au etanai taui i vitarapiri vivira da aiai i ḡetelara.

³⁵ Iesu i kiala ma Apasol 12 i raukwatuei awarina ma i riwei i pa, “Aiai e ḡoeḡoe da ina vibada. Tauna ina tereḡairana-melei ma ina vimuri dewadewa ma ina vitaunola rava aubai.”

³⁶ Ma Iesu, tevera i vaia ma au poui i vimairini. Ma urana au jiḡona i tere-taḡonei. Ma taui i riwei i pa,

³⁷ “Aiai ravana; tau wavauei, tevera wenanare i rauḡorei. Lamna tau maiteni e rarauḡoreiu. Ma aiai da tau e rarauḡoreiu. Lamna tauparitawaneu maiteni e rarauḡorei.”

³⁸ Anina ma John, Iesu i riwei, “Tauviararamana! Tauai, oroto tagogi a inanai; tam wavamei arua-apoapoena i viviopuni ma tauna eḡa turata. Lamna aubaina a viḡaei da eḡa ina kauana-melei.”

⁷ Anina ma hapau i hura ma tauhi i puruhi ma pona hapauwei i hopui ma i riwa ipa, “Weꞌi Taꞌu Natuꞌu, aꞌu nuwavainana ona rau-tanighanei!”

⁸ Maratagogi tauhi hi inana viravira ma egha aiyaꞌi ghehauna hita inanai, maitehi, eꞌegha da Yesu tau avana.

⁹ Ma tauhi maranai oya damonei hi ghaꞌighaꞌirai ma Yesu tauhi ivi ghaehi da aiwaꞌi hi inainanaiya egha hinavi heghai da au naona Rava natuna hiragheyei inavo mahirime

¹⁰ Ma tauhi, tauna riwana hivo teꞌeteꞌei ma hivi tarapiri vivira hipa, “hiragheyei vomahirime,” anona aiwaꞌi.

¹¹ Ma tauhi tauna hi rau-bayadei ipa, “Aiwaꞌi aubaina raugagayo tauvi haraharamanahi he ririwa da Elijah au naona ina neꞌi?”

¹² Yesu i pari-beyei, “Anina Elijah, ina ai nememei da aiwaꞌi anatapuna inavo kaukauwehi. Aiwaꞌi aubaina warihagha i girumi da Rava Natuna inavi nuwaꞌapoapoei kauwa ma hina hini dodorei.

¹³ Ma a ririwemi da Elijah anina i neꞌi, rava ahi ghohana tauna awarina hi kauwana pahiyei me i girugirumia nanaꞌarena.”

¹⁴ Yesu ana tauvotaghotagho tonugha maiteni oyei hi ghaꞌighaꞌiramemei ahi rava auwarihi, hi inanai da patara ghaeghaena tauhi hi mae kwavivirohi ma mai Jew ahi raugagayo tauvi haraharamanahi maitehi hivivi pariparighahi.

¹⁵ Maranai, tauhi Yesu hi inanai hi ghohorihi ma hi veraubeyebeyei.

¹⁶ Yesu tauhi i rau-bayadehi, “Aiwaꞌi ovivi pariparighahiyei?”

¹⁷ Oroto tagogi patara au horahi i pari-beyana, “Tauviharaharamana aruwa-apoapoena natuꞌu orotona au horana e maꞌamaꞌae ma i kauwei da egha ita dedede, Yamna aubaina a neiyai awarim.

¹⁸ Maranai ana doria e huruhuru meyei, Yamna aruwa-apoapoena tauna au dowa e tawatawanei, gamona evivi puropuro, ivo na e utaꞌuta didini ma e hirahiraghe madigha. Am Tauvotaghotagho avi baghahi da aruwa-apoapoena hitavi hopuni, wate egha tagotagogina da hita kauwei.”

¹⁹ Ma Yesu i pari-beyehi, “O ma meyanai onavi tumaghana! Ta maeghagha ma aubaimi yohora da ami vita ana avaꞌavarai? Tevera ona neiyai awariꞌu!”

²⁰ Ma tauhi tevera hi neiyaꞌi Yesu awarina. Ma maranai aruwa-apoapoena Yesu i inanai, tevera i ghohai da i rau-moyaghahu, i tawanei au dowa ma ivo vai tatatavi ma gamona ivi puropuro.

²¹ Yesu tevera amana i rau-bayadei, “Ana doria mara aiwaꞌi ivi kareni?” I paribeyei ma i riwa, “Au meyameyanei ivi kareni.

²² Aruwa-apoapoena mara maghamaghauna tauna au eyagi araꞌaratana ma au waira e tawatawanei ma i ghohei da itavi hiragheni. Mepa da tam tagotagogina yamna ma raunuwaꞌapoapoeyeai ma mavo hagui.”

²³ Yesu tauna i riwei, “Menanaꞌarena ma u riwa, ‘Mepa da tam anina?’ Aiyaꞌi ravana evivi tumaghana, God aiwaꞌi anataputapuna ina kauwanapahiyei tauna aubaina!”

²⁴ Maratagogi teverana amana i garara, “A vitumaghana. Wate aꞌu tumaghana i tapia aubaina ma mavohagui da ma vovai raꞌatai!”

²⁵ Yesu i inana da patara yohora da i riyeriyehi auwarihi, aubaina aruwa-apoapoena i hegari ipa, “Tam aruwa tanighapota ma dede egha, Taꞌu a hegahegarim da tevera ma hopu tawanei ma egha meyanai ma ruina meyei.”

²⁶ Ma aruwa-apoapoena i garara ma teverana ivo vaitatatavi ma i hopu tawanei. Ma tevera inanana me taubeu ma rava kampa hi ririwa, “Tauna i hiraghe!”

²⁷ Ma Yesu au urana ivo wa ma i sinahepai da i mahiri.

²⁸ Muriyai Yesu ana Tauvotaghotagho maiteni hi rui au numa ma maranaina tauhi ava ma hi pari-dadanei hipa, “Aiwaꞌi aubaina tauꞌai egha tagotagogina da aruwa-apoapoena atavi hopuni?”

²⁹ Tauna tauhi i riwehi, “Aruwa apoꞌapoeihi me we nanaꞌarehi yamna pariyei ava inavi hopuni”

³⁰ Yesu ana Tauvotaghotagho maitehi dobuna hi netawanei ma Galiliyei hi nae. Yesu egha ita ghohei da rava hita haramanei da tauhi kampa,

³¹ aubaina tauna ana Tauvotaghotagho ivivi haraharamanihi ipa, “Tauhi Rava Natuna hina amverenei rava ghehauhi au urahi ma tauhi hinavi hiragheni, wate maratom tonugha au murina inavo mahirime.”

³² Ma tauhi egha hita haramanei tauna aiwaꞌi i dededei ma tauhi raubayadana hi rovowei.

³³ Yesu ma ana Tauvotaghotagho au Capernaum i gheꞌeta ma au numa hi rui ma tauna tauhi i rau-bayadehi, “Au etanaꞌi aiwaꞌi ovi awahe gahigahiyanei?”

³⁴ Wate tauhi hi genuwana, aubaina au etanaꞌi, tauhi hivi awahe gahigahiyana da aiyaꞌi itavi bada.

³⁵ Tauna i tughura ma Apostle 12 i ghorehi awarina ma i riwehi ipa, “Aiyaꞌi e ghoheghohei da inavi bada tauna ina tereghaꞌirana meyei ma anatapuna inavi taunoyei.”

³⁶ Tauna tevera i vaini ma au pouhi ivi mahirini ma i tarahaghavui. Ma tauhi i riwehi ipa,

³⁷ “Ma aiyaꞌi ravana taꞌu wavaꞌuwei teverana e rau-warowarorowei yamna taꞌu maiteu evivi anineu ma tauparitawaneu maiteni evivi aninei.”

³⁸ John Yesu i riwei, “Tauviharaharamana, tauꞌai oroto tagogi a inanai tam wavamei aruwa-apoapoehi ivi hopunihi ma tauna egha turata yamna aubaina avi ghaei da egha ina kauwana meyei.”