21 Ma taui i riwei i pa, “Ma amapo da o vivinuanaina!”
22 Taui i nei au Bethsaida ma rava ḡelaui, oroto matana apoapoena i neiai Iesu awarina ma i vibaḡa-guratei da ita vodadani.
23 Ma Iesu, oroto matana apoapoena i raunimavoai ma melagaiei i taravaina-opunei. Ma kampa matana i ovai ma urana au matana i terei ma i paridadanei, “Aiwai e inainanai bo eḡa?”
24 Ma i taepai ma i riwa, “Rava a inainanai ma taui me ai ita bababara.”
25 Iesu, urana i tere-melei oroto au matana. Ma matana i wanatawanei da aiwai anatapuna i ʼnana-kauei.
26 Iesu, tauna i paritawanei ana au numa ma i riwei, “Eḡa ma nae au melagai! Wate jijimanina ma nae au numa.”
27 Iesu, ana tauvotaḡotaḡo maiteni i nae melagaii Caesarea Philipai au ḡereḡerei. Maranai i nenae ma Iesu, taui i paridadanei, “Rava e ririwa; tau aiai?”
28 Ma taui i paribelei, “Ḡelaui e ririwa da tam, John Taubabataito. Ma ḡelaui Elijah. Ma ḡelaui e ririwa da peroveta wariaḡana tagogi.”
29 Ma Iesu, taui i paridadanei, “Wate taumi, mena o notanota-nei? O ririwa da tau aiai?” Peter i paribelei, “Tam God ana Messiah - anona Keriso.”
30 Iesu, taui i viḡaei da eḡa aiai ina riwei da tauna aiai.
31 Ma Iesu i raukarei da ana tauvotaḡotaḡo i giuni i pa, “Rava Natuna ina vinuapoapoe kaua. Ma dogadogara, pirisi babadai ma tarawatu babadai, tauna ina pari-geduaiei ma ina viraḡeni. Ma au pom tonuḡa au murina ina vomairi me.”
32 Iesu jijimaninei wei kauai i bababaniei ma lamna aubaina Peter, tauna i taravaini au ririva ma enana i vikarei.
33 Wate Iesu i mae-tavirei ma ana tauvotaḡotaḡo i ʼnanai. Ma Peter i eni, i pa, “Satan ma nae au muriu! Tam am nota eḡa Godei ita nenei, eḡa da ravei.”
34 Ma Iesu, patara ma ana tauvotaḡotaḡo i raukwatuei ma i riwei, “Mepa da aiai ita votaḡotaḡoiu. Tauna ina boviana-melei ma ana korosi ina avarai ma ina votaḡotaḡoiu.
35 Aiai ana lawana e tatajijini, ina vine-boai. Ma aiai da ana lawana i verenei; Tau ma Riwana Aiaina aubaina. Tauna ana lawana ina vaimelei.
36 Ana aii bo anona aiwai, mepa da wei dobuna lawanana ma vigulauna ma vaipai ma am lawana maemae-nonoana ma vine-boai.
37 Wate aiwaiei am lawana ma gimara-melei.
38 Mepa da aiai: tau ma au viararamana ina vinimalei; ma i mae-puputeu; ma ana ḡoanei kaua apoapoe ina kaukauei. Rava Natuna, tauna ina vinimalei maranaina ina nememei; Amana ana au boruma anela vivivirei maiteni.”