Mark 6:30-53 in Wedau

³⁰ Apasol i ḡeta memei ma aiwai anataputapuna i kaukauei ma i raraugugulei, Iesu i vieḡei.

³¹ Lamna maranai, rava maḡamaḡaui i nenei ma i nenae da Iesu ana tauvotaḡotaḡo maiteni eḡa gavogavo ita maemae da ita am. Lamna aubaina Iesu, taui i riwei i pa, “Taumi ava ona nei ma tana nae au mutulua da laumi ina tau mara aburuna.”

³² Ma anatapui wagei i nae au mutulua.

³³ Wate rava maḡamaḡaui i ʼnanai i nenae ma i aramanei taui aiavoi. Ma melagai nununai anatapui geraei i ruba gogona da au dobuna i aiḡeta.

³⁴ Maranai Iesu wagei i tuopu au gera ma patara ḡaeḡaena i ʼnanai ma nuanuana i bola-kauei. Taui me sipu ma eḡa ai tauvipaipai. Ma Riwana Aiaina viararamanai i raukarei.

³⁵ Ma au biga e tuturiai ma ana tauvotaḡotaḡo i nei awarina ma i riwei i pa, “Wei mutulua ma madeḡa e arearere.

³⁶ Rava ma paritawanei da ina nae au melagai ma au wapu au ḡereḡere da ai lam ina gimarai.”

³⁷ Wate Iesu i paribelei i pa, “Taumi ona viambagibagi!” Ma taui i paribelei i pa, “Mepa 200 denarii tana vaia da wei patarana tana viambagibagi?”

³⁸ Ma Iesu i paridadanei i pa, “Palawa biaḡa awarimi? Ona nae ma ona baiei!” Maranai i nelaḡai ma i riwa i pa, “Awariai, palawa five ma iana ruaḡa.”

³⁹ Anina ma Iesu, patara i riwei i pa, “Boru nununai, gidagida au majimajiḡai ona kiala nae.”

⁴⁰ Ma taui ai au boru 50 da 100 nanare i kiala nae.

⁴¹ Ma Iesu, palawa five ma iana ruaḡa i vaia ma i ḡoutata au mara ma God i viegualauei. Ma palawa i vogimagimai ma iana i ḡutai da ana tauvotaḡotaḡo i verei ma taui, rava i verei.

⁴² Ma patara i am ma i am-iaua.

⁴³ Ma ana tauvotaḡotaḡo, lam am tereterenai i tuarui da poa muomuoi 12 i vioai.

⁴⁴ Nelara 5,000 i viambagibagi.

⁴⁵ Anina ma Iesu, ana tauvotaḡotaḡo i egari da ita aidamana au Bethsaida. Taui au waga i geru da i nenae ma tauna, patara i paritawanei.

⁴⁶ Patara i paritawanei ma tauna ava i ḡae au ola da ita raupari.

⁴⁷ Ma waguvara ana tauvotaḡotaḡo au waga au topa ma Iesu au alala.

⁴⁸ Ma ana tauvotaḡotaḡo, lare i vovoguratei da ita ḡota wate ive i viraumatamatani. Ma maratomtom nanare, Iesu i nae awari. Tauna waira au tepana i bababara ma i ḡoei da taui ita tutelarei.

⁴⁹ Ma maranai taui, Iesu i ʼnanai topa au tepana i bababara ma i notai da tauna konaḡa ma i rovo kaukaua ma i vigaragararei. Ma maratagogi Iesu i riwa i pa, “Tepami ina tora! Tau, eḡa ona rovo!”

⁵¹ Ma au waga i geru ma ive i wanatuini ma taui i bana-kauei.

⁵² Avena da kaua palawa awarina i kauei i ʼnanai, wate ana rewapana eḡa ita aramana-kauei. Taui orai i bado ma i vinuanaina.

⁵³ Taui, topa i damani ma au Genesaret i ḡota ma ai waga i raḡini.

³⁰ Yesu ana Apostle, ahi au bagibagi hi neneyana, hi wana virameyehi awarina ma aiwaꞌi hi ghohaghohahi da hivi haraharamaneiya, hivi heghei.

³¹ Ma na marainana, rava maghamaghauhi, hi naenae auwarihi ma hi wanawana virameyehi. Yesu ana tauvotaghotagho maitehi egha mepa ahi gavogavo da hita am. Yesu i riwehi ipa, “Tautaiava tana nae, au mutuyuwa, mepa rava egha hita maꞌemaꞌeyana ma tanavi yawahi.”

³² Au waga hi geru ma hi damana au mutuyuwa, mepa rava egha hita maꞌemaꞌeyana.

³³ Rava maghamaghauhi, tauhi hi inanahi da hi naenae ma hi inana tuhaghahi, aubaina geraha, meyagaina ravahi maghamaghauhi, gerahei hi ruba da hi aigheꞌeta au mutuyuwa ma Yesu ana tauvotaghotagho maitehi muriyai hi ghota.

³⁴ Yesu wageꞌi i hopu ma rava maghamaghauhi i inanahi ma i rau-nuwaꞌapoapoeyehi aubaina tauhi me sipu ma egha taupainihi. Anina ma tauna God ana ghoha maghamaghauhi ma ana vibadana vaivaina, ivi haraharamanihi.

³⁵ Au hegoya, ana tauvotaghotagho, hi neꞌi awarina ma hipa, “Au e pompom ma weꞌi au dobuna rava egha hita maꞌamaꞌae.”

³⁶ Rava ma paritawanehi da tauhi hina nae, meyagai au muhomuhohi bo au ghaeghaehi da yam hina baiha da hina am.

³⁷ Ma Yesu i pari-beyana ipa, “Taumi yam ona verehi da hina am.” Ma hi riwehi ipa, “Tam u ghoheghohei da tauai 200 denarii.” Ruvanei yam tana gimarai da ravahi maghamaghauhi tana ghamohi bo.

³⁸ Yesu i rau-bayadehi, “Payawa bihagha awarimi? Ona nae da ona inanai.” Hi nae ma hi nememei da hi riwei hipa, “Payawa 5 ma i yana 2 hemaꞌamaꞌaꞌe.”

³⁹ Anina ma Yesu i riwehi ipa, “Upumei, au gidagida ona tughura.”

⁴⁰ Anina ma tauhi upuma 50 da 100 awarinei hi tughuranae.

⁴¹ Ma Yesu payawa 5 ma i yana 2 i vaini ma au mara i watata ma God ivi egwayauwei ma payawa da i yana i tomutomui ma ana tauvotaghotagho i verehi da tauhi rava hi verehi.

⁴² Ana taputapuhi hi am ma hi amhiyauwa.

⁴³ Yesu ana tauvotaghotagho, payawa ma i yana amꞌamterenahi hi tami da poha 12 hivi howahi.

⁴⁴ Oroꞌoroto maghauhi 5000 hi gamohi.

⁴⁵ Yesu Yaghiyaghina ava ana tauvotaghotagho, i hegarihi da au waga hi geru da hita ai damana au Bethsaida, Galili topana au navanava ghehauna. Ma tauna, patara ivo tawanehi.

⁴⁶ Tauhi, ivo tawanehi ma tauna i ghae au oya pari aubaina.

⁴⁷ Waguvaraina, Yesu tau avana au geraha i maꞌae ma ana tauvotaghotagho yamna au waga, Galili topana au pouna.

⁴⁸ Yaghina ma hive ivo guratei ma Yesu ana tauvotaghotagho i inanahi da tauhi hive ma yaghina hi tupatupamatani mavi wewehanei hi yareyare.

⁴⁹ Maratomtomai Yesu topa tepanei i bababara nae ma tauna i ghoheghohei da ana tauvotaghotagho ita terevivirehi ma marainana tauhi hi inanai ma hi notai da tauna yamna konagha, hi rovo ma hi otu.

⁵⁰ Marainana anataputapuhi, tauna hi inanai ma hi rovo kauwa. Ma Yesu, i riwehi ipa, “Taꞌu, egha ona rovo.”

⁵¹ Tauna au waga i geru ma hive i wanautuini ma tauhi hi nota ava, havena da, tauhi payawa ani bahana i kaukauweiya hi inanai ma tauhi yohora egha tauna ana riwapana hita haramanei. Au baina, tauhi ahi nota i pupu.

⁵³ Tauhi, Galili topana hi damani da au Genesareta hi ghota ma waga hi tainagheꞌetei.