10 Jazame motec jaŋe dâŋ i maŋkehuc ʒiŋuc manasumbiŋ: Hâmockonec fafahare i wemo dâŋ?
11 Erâ Jesu wiocnerâ mumbiŋ, “Elia qanaŋ fisiocmu, miti qaqazu jaŋe dâŋ iŋuc wemocte mueŋgopieŋ?”
12 Wiocnepie jazawec, “Elia e jâmbomac qanaŋ fisirâ wiac bâtâcne bâtimuŋ eocmu. Erâ Ŋic Fâri Wâtuŋne e ima barâ bâsueniŋmu, ere iŋuc qâreŋkekicne i fuŋne weniŋuc?
13 Eliare ine ʒiŋuc ŋazakopac: E biac fisirâ juhame jaŋe wiac kosa ecnembiŋ. Miti papiao ere qâreŋkekicne iŋuc hâcne ecnembiŋ.”
14 Tikionec waha‐fârerâ motec gâcne jaŋerao fisirâ honembiŋ: Ŋic mâretec orâŋ‐joparâ domahapie miti qaqazu tucne motec jaŋehec mu qaqatarac embiŋ.
15 Eme ŋic sasawa jaŋe Jesu honerâ izia fâfârerâ ra bâfuarâ mu ʒeri ecnembiŋ.
16 Eme eki wio‐jarewec, “Wemo wiacte mu qaqatarac eŋgopieŋ?”
17 Mume ŋic jaŋeraonec moczi fuarâ ʒiŋuc âzâcnewec: “Qaqazu, ŋokâ‐nane demoŋ nâŋguŋnezi ecneme gorao bawarekopac.
18 Motec e demoŋzi dameŋ sâc rorâ ba suriŋ ecneme mic sofororocne wefume mic kikihotac kihuc me kikene râŋgeŋkeekac. Eme motecfâcge jaŋe jâpecneniŋte jazape eipiembieŋ.”
19 Mume Jesuzi ʒiŋuc jazawec: “O ŋic mamanasiŋ tâmiric ŋoŋe, no ŋoŋehec hati jurâ ju ehuc âsi qataŋ eŋarepemu me? Motec norao bawareniŋ.”
20 Mume motec erao barapie demoŋzi Jesu honerâ motec rârec bârârec ecneme me kikene jâjâwâckeme mâreŋko qarâ risimbiŋne qahuc fome mic sofororocne wefuwec.
21 Eme Jesuzi motec mamac‐ticne wiocnerâ muwec, “Wiac i wezimucne fuacnewec?” Mume ŋiczi ʒiŋuc âzâcnewec: “I ɋieoa fuacnewec.
22 Demoŋ e motec sipirickeocte wemo afecne ʒocko â opâo tuŋkeme huhuc domaekac. Go ine tâpiri fogarekacko nâhere buge sâqoreme bafic‐nâfoc.”
23 Iŋuc muhuc wâsickeme Jesuzi ʒiŋuc âzâcnewec: “Tâpirire mukicte mupe manac, moc e mamanasiŋhec juocmuo wiac sasawa eene efâreocmu.”
24 Âzâcneme izia motecte mamaczi kâcɋene wirahuc muwec, “No manasiŋgukopac, go gahac mamanasiŋ‐nane gegec dodocne basanaŋke‐narec!”
25 Eme ŋic mâretec fisi sâqorehuc domapie honec‐joparâ demoŋ jâpehuc muwec, “Demoŋ qepoŋ nâŋguŋne go gazape, wefurâ wiserâ rac, erâ mocwâc mi risie ware huzemec!”
26 Mume demoŋzi kâcɋene owackehuc motec heunuckerâ âte tuŋkeme qarâ hâmocne tinac fowec. Fohame ŋic jaŋe honerâ mumbiŋ, “Hâmo‐jâmbâŋkejec.”
27 Iŋuc muhapie Jesuzi motec menao rorâ bafahareme domawec.
28 Eme Jesu e ficko feme motec jaŋe bucko wiocnerâ mumbiŋ, “Nâŋe wemocte jâpenaŋte eipiembeneŋ?”
29 Mupie jazawec, “Demoŋ iŋucne jaŋe wiac moczi mâcne, mâc nunumuzi jâpec‐jopazo.”
30 Eme jaŋe hae mâreŋ i beherâ Galilaia mâreŋ fotâcnerâ rambiŋ. Ine ŋic jaŋe biŋe‐ticne mananʒipiŋte kamierâ rambiŋ.
31 Rahuc motecfâcne ʒiŋuc hâcne muhuc jaza qazuc ewec: “Ŋic Fâri Wâtuŋne e ŋic jaŋere meo feme qapie hâmorâ ʒoaŋ gie bapa jahec â moc eha fahareocmu.”
32 Iŋuc muhuc jazame dâŋticne kâuc barâ indiŋkeniŋte memeŋgaruc embiŋ.
33 Eme raku Kafanaum haeo fisimbiŋ. Fisirâ ficko ferâ motecfâcne indiŋ‐joparâ muwec, “Hatao wemo wiacte muc manac embieŋ?”
34 Indiŋ‐jopame mâc fâsâerâ ŋembiŋ; ine jaŋe hatao nâŋâcnaonec mozi micne sâko jukac muhuc mu qaqatarac embiŋ irec.
35 Eme waha ŋehuc motec hefârec‐jopa‐fârerâ ʒiŋuc jazawec: “Moc e micne juzo murâ gâcne sasawa jaŋere râpeo juhuc kiŋaŋ qaqa‐jeŋic ezejec.”
36 Iŋuc murâ motec piticne moc rorâ ŋondeŋ‐jeŋicko râerâ menezi sabeckehuc jazawec,
37 “Moc e motec kecʒiŋucne nore erâ mamac rau ecneocmu eki no mamac rau enareocmu. Â no mamac rau enareocmuzi no nahacne mâcne, sorecnuwec e mamac rau ecneocmu.”
38 Eme Johanezi Jesu ʒiŋuc âzâcnewec: “Qaqazu, nâŋe ŋic moc gore ʒâŋe muhuc demoŋ jâpec‐jopame honembeneŋ. Erâ nâŋâc mi bâjâpec‐nâpokacte qataracnembeneŋ.”
39 Mume Jesuzi ʒiŋuc jazawec: “Mi qataracnezo. Moc e nore ʒâŋe muhuc mâsi baocmu, iŋucnezi wemocko afeckerâ musâqorecnuocmu.
40 Gie‐nâŋec mi hetâtieocmuzi âgo babafic‐nâŋec eocmu.
41 No jâmbomac ŋazape: Ŋic moczi ŋoŋe Kristore ŋicfâc juŋgopieŋte opâ sawa fia gumec eŋareocmu, jauŋ iŋucne mac i furimâc mi foocmu.
42 “Moc e biŋefâc‐nane piicne jaŋeraonec mocjaha mac sâqoreocte suru jâiŋ ecneocmu, e buse sâko upenao qonaŋkerâ hâwecko sârockepie hume muzac, izi wiac aafecne fuacnekac ezac.
43 Erâ megezi sâqocnere bitiŋko râecguzo eme hetâcnezemec. Go mefuru juku hârâcte ʒocsanaŋko huzicte sifu puriŋ erâ juju sanaŋko raʒizemec.
44 Hârâcko umbeŋ‐jeŋic mi hâmoocmu â ʒoc mi hâpoocmu.
45 Me kikegezi sâqocnere bitiŋko râecguzo eme hetâcnezemec. Go kike furu juku hârâcko huzicte sifu puriŋ erâ juju sanaŋko raʒizemec.
46 Hârâcko umbeŋ‐jeŋic mi hâmoocmu â ʒoc mi hâpoocmu.
47 Me ʒâŋegezi sâqocnere bitiŋko râecguzo eme ripozemec. Go ʒâŋe furu juku hârâcko huzicte sifu ʒâŋe fiŋgic erâ Anuture uucmaŋko raʒizemec.
48 Hârâcko umbeŋ‐jeŋic mi hâmoocmu â ʒoc mi hâpoocmu.
49 Ŋic mâmâc sasawa ʒoczi hâwec i rua‐jarezo.
