8 Jesuzi “Demoŋ go ŋickonec wefu rac” mume iŋuc hâcne âzâcnewec.
9 Eme Jesuzi wiocnerâ muwec, “Ʒâŋege mo?” Wiocneme muwec, “No ʒâŋe‐nane Gurusâko, nâŋe bocjahazi juŋgopeneŋ irec.”
10 Murâ ʒoɋac erâ numucnewec, “Nâŋe mâreŋ ʒi behenaŋte mi jâpec‐nâpozemec.”
11 Eme mâreŋ ira heâŋko becguru kâcɋene qondaŋko jumbiŋ.
12 Eme demoŋ jaŋe Jesuzi mana‐jareme becmaŋko huniŋte âzâcnembiŋ.
13 Mupie Jesuzi mana‐jareme demoŋ jaŋe ŋickonec wefurâ becmaŋko hupie bec jaŋe tapionec sururuerâ ra duŋ riqic fowec ira huhuc hâmombiŋ. Bec afecne mâcne, 2000 hâmombiŋ.
14 Eme soŋaŋ jaŋe gasacke rarâ ŋic hae gie sâc jurambiŋ dâŋ binaŋ ejarembiŋ. Jazapie jaŋe wiac fuawec honeniŋte fisi‐fârembiŋ.
15 Jesurao fisirâ honembiŋ: Ŋic demoŋ guru sâkohec juweczi maŋne wiŋkeme wamane â ŋaqihec ŋewec. Iŋuc ŋeme honerâ me kirâ domambiŋ.
16 Eme wiac hone manac embiŋzi ine ŋic demoŋhec juwec ere binaŋ â bec jaŋere binaŋ mâmâc bajarembiŋ.
17 Dâŋ i mana‐fârerâ Jesu e hae mâreŋ‐jeŋic beheocte numucnembiŋ.
18 Eme Jesu e wokeo feme ŋic demoŋhec juweczi bâjâpeocte numucnewec.
19 Eki ine qataracnehuc ʒiŋuc âzâcnewec: “Go haegao rarâ wiacfâcge jaŋehec juhuc Wofuŋzi gorao mâsi sâko bahuc ehâmo‐garekac irec biŋe ŋic jazazemec.”
20 Mume ŋic e rarâ, Jesuzi wiac ecnewec irec biŋe hae 10 ŋerawec mâreŋ ira jufârehuc ŋic jazame jaŋe manarâ secke‐fârembiŋ.
21 Eme Jesu e wokeo ferâ ʒiŋucpec ware fisirâ moŋgeŋko waharâ domahame biac ŋic mâretec fisirâ tumaŋnembiŋ.
22 Ehapie mitific soŋaŋ moc, ʒâŋene Jairo, eki fisirâ Jesu honerâ kikefuŋnao fodaperâ fotariecnehuc
23 ʒiŋuc numucnewec: “Otâ‐nane hâmozo ekac, irec go warerâ megezi bâuarâ bâpiaŋketec juzejec.”
24 Âzâcneme manarâ rawec. Rahame ŋic guru sâko jaŋe bâjuŋ qâjuŋ ecnembiŋ.
25 Eme ŋondeŋ‐jeŋicko ŋokac moc juwec eki soc rohuc juhame jara 12 ewec.
26 Eme dokta bocjahazi erao gie bâipiehapie ʒâic wemo afecne manahuc juwec. Â irec furi moneŋ mafa‐ticne jarekume hesackewec. Eme sifu hucticne mi afeckehuc mâc ɋârâŋkecnewec.
27 Eme ŋokac eki hâcne Jesure biŋe manarâ ŋic ŋokac gâcne jaŋere ŋondeŋko juhuc râpefuŋnao rarâ ŋaqi‐ticne bâuawec.
28 I ʒiŋuc muhuc ewec: “Ŋaqi‐ticne sawa bâuarâ biaŋnuocmu.”
29 Bâuame izia socticne ʒickeme sahac‐ticne bâgunuckeme manawec.
30 Eme Jesu e tâpiri‐ticne moc wahame manarâ forisierâ wiohuc muwec, “Ŋaqi‐nane mozi bâuakac?”
31 Mume motecfâcne jaŋe ʒiŋuc âzâcnembiŋ: “Ŋic jaŋe hejâŋâŋgupie wemocte mukic, ‘Mozi bâuacnukac’?”
32 Eme Jesu eki ine bâuawec e ʒâŋitaocte hone wosâc ejarewec.
33 Ŋokac e ine sahac‐ticnao mâsi fuawec i manarâ maŋne heme ɋarac ɋarac qahuc Jesure maŋfuŋko fodapehuc fuŋne‐ticne mufuarâ âzâcnewec.
34 Eme eki ʒiŋuc âzâcnewec: “Ŋokac, mamanasiŋgere biaŋgukac. Irec go buge mâteŋkeha ra ɋiɋicne juzemec.”
35 Ŋokac dâŋ iŋuc âzâcnehuc domahame mitific soŋaŋte fickonec kiŋaŋ warerâ mumbiŋ, “Otâge hâmokac, irec wemocte qaqazu maŋgâŋ ecnetec raocmu.”
36 Eme Jesu e dâŋ i mana‐bipierâ soŋaŋ ʒiŋuc âzâcnewec: “Mi hâwicguoc, mâc manasiŋnuc.”
37 Iŋuc murâ gâcne hecke‐jarehuc Petoro, Jakobo â ɋaticne rocjopame rambiŋ.
38 Ra soŋaŋte ficko fisirâ, ŋic ŋokac jaŋe ojowa sâko â ki mamakuc epie hone manac ewec.
39 Manarâ ficko ferâ ŋic ŋokac ʒiŋuc jazawec: “Ŋoŋe wemocte kio soŋgâŋ boc eŋgopieŋ? Naru e mi hâmojec, e mâc guŋ fokac.”
40 Mume manarâ gâwiecnembiŋ. Eme ejareme hufârepie naru neŋgoc mamac jahecne â motecfâcne rocjopame naru fowecko raʒimbiŋ.
