20 Vadaeni ia lao Hanua 10, unuseni ia ese Iesu ena kara ia dekenai ena sivarai ia harorolaia, taunimanima ibounai idia hoa bada.
21 Iesu ese vanagi dekenai ia hanaia lou davara unai kahanai, vadaeni taunimanima momo idia haboua ia dekenai, ia be kone dekenai ia noho.
22 Dubu ena lohia ta, iena ladana be Iairo, ese Iesu ia itaia neganai ia mai, ia tui diho Iesu ena aena badinai.
23 Ia noinoi goada, ia gwau, “Egu natuna kekeni maragina be kahirakahira ia mase, lau noinoi, mani oi mai, oiemu imana oi atoa iena latanai, oi hamauria.”
24 Iesu be dubu lohia tauna danu ia lao, taunimanima momo ese idia hagegea, bona momo be iena murinai idia raka.
25 Taunimanima edia huanai be hahine ta. Inai hahine ia gorere lagani 12, iena gorere be rara moru.
26 Muramura taudia momo ese iena gorere idia hanamoa gwauraia, to idia be hegeregere lasi. Iena moni bona kohu ia negea ore, to iena gorere be ia bada noho.
27 Iesu ena kara sivarai ia kamonai. Unai dainai ia mai, taunimanima edia huanai ia vareai, Iesu ena dabua ia dogoatao.
28 Badina be ia gwau, “Bema iena dabua sibona lau dogoatao, mauri do lau davaria.”
29 Nega tamona rara gorere ia doko, hahine sibona ena lalona dekenai ia diba iena gorere ia ore.
30 Iesu ia diba iena lalona dekena amo hamauria siahu ia lao murimuri dekenai, unai dainai ia giroa, taunimanima dekenai ia nanadaia, “Lauegu dabua daika ese ia dogoatao?”
31 Iena diba tahua taudia idia gwau, “Taunimanima momo herea oi kahirakahira idia gini, idia dogoatao oi, badina dahaka oi gwau, ‘Daika ia dogoatao lau?’ ”
32 To Iesu ia giroa, ia dogoatao tauna ia tahua.
33 Unai hahine ia heudeheude mai gari danu, ia diba dahaka ia vara ia dekenai. Ia mai, ia tui diho Iesu ena vairanai, dahaka ia vara gauna ia hamaoroa ia dekenai.
34 Iesu ia gwau, “Lauegu natuna, oiemu abidadama dainai, mauri oi davaria vadaeni, oi lao mai maino danu, bona oiemu gorere do oi davaria lou lasi.”
35 Ia hereva noho neganai, dubu lohia tauna ena taudia haida be iena ruma dekena amo idia mai. Dubu lohia dekenai idia hamaoroa, idia gwau, “Oiemu natuna ia mase vadaeni. Badina dahaka hadibaia tauna dekenai oi noinoi noho?”
36 To edia hereva Iesu ia kamonai neganai, ia hereva dubu lohia dekenai, ia gwau, “Oi gari lasi, oi abidadama henia sibona.”
