Marcos 5:5-26 in San Blas Kuna

⁵ Dule-niaburba-nikad mutikidba, ibginedba, yala-imbaganba, neg-uan-imbaba binnasur gordii, degi, na dukin akwagi sarsodii daed.

⁶ Bannaba-Jesús-daksagua, abarmakalid, Jesús-asabin yokorgi-sindigar signonikid.

⁷ Geb binnasur-gote, Jesúsʼga sogded: —Jesús-Bab-Dummad-Bur-Birigined-Machi. ¡Mer be ibgwensur an-sao! Bab-Dummad-nuggi mer be ise-mesagwar an-imake.

⁸ Ar ade, Jesús weyob niaburbaga sogdegusad: “Niaburba, dulegi-be-maid be noe.”

⁹ Jesús a-dulese egichialid: —¿Igi be nuga? Dule, abin-sogded: —Bukidaradye an nuga, ar ade, anmar niamar-ichesulid.

¹⁰ Niamar Jesúsʼgi gannar-gannar wilenai gusad, mer be dikasur anmar-barmidye.

¹¹ Deunni, sinmar-bukidar yar-naba mas-mananaid.

¹² Niaburbamar Jesúsʼgi wilenaigusad, ega sogdemalad: —Anmar, sinmargi-ubogega, sinmar-bukwadse be anmar-barmide.

¹³ Degisoggu, Jesús, sinmar-bukwadse niaburbamar-barmisad. Niaburbamar dulegi-nodmargua, sinmargi ubodapid. Sinmar-milibo-yar-wereged-naba-bukwadi (2,000), mata-dummadse babatidapid, bela sinmar gundilegar burgwismalad.

¹⁴ Sin-edarbemalad dobguar duurmakdemalad. Neggweburgi, degi, sapurba-negmar-bubukwadgi, bela ibmar-gusad sogdapmalad. Geb dulemar degi-neggusad daknadmarsunnad.

¹⁵ Jesúsʼse nonimargua, dakarmalad, dule-nia-bukidar-nika-gudidaed sii. Mor-yoi, degi, nugus-sii dakarmalad. Dulemar dobe itodmalad.

¹⁶ Dulemar-we-ibmar-daksamalad, dulemar-daksasurmaladga sogsamalad, dule-nia-nika-gudigusad igi nugusa, degi, igi sinmar mata-dummadse bela babatisbali.

¹⁷ Geb Gadara-dulemar Jesúsʼgi wilenaigusad, we-yargi-be-gudiid be naye.

¹⁸ Jesús urgi nainagu, dule-nia-nika-gudigusad, Jesúsʼba-naega Jesúsʼgi wilenaigusad.

¹⁹ Jesús eba-dagega imaksasulid, ega sogded: —Be-negse, be-gwenadganse be nae, Bab-Dummad bela bega ibmar-imaksad be sogna, degi, igi nue-wile be-daksabali be sogbalo.

²⁰ Degisoggu, dule-niaburba-nika-gudigusad nadsunnad. Geb Decápolis-yargi-neggweburmar-bukwadgi igi-Jesús e-nudaksagusa, sogdii gualid. Bela dulemar geger dakmalad.

²¹ Jesús gannar urgi mata-dummad-gaka-baidse obaksabargu, a-mata-gaka-naba besad, ar ade, dulemar-bukidar e-dikarba bukunonimalad.

²² Geb degine, Judíoʼmar-onmakedneg-daked-e-dummad-wargwen, Jairoʼye-nugad, Jesúsʼse nonikid. Jesús-dakargu, yokorgi sindigar Jesús-asabin signonikid.

²³ Jesúsʼgi nue-wilenaigusad, ega sogded: —An-bunagwa burgwedani maid. Anba be dage, be-argan egi be mesdage, adi, nuguegar, degi, mer burgwegar.

²⁴ Jesús Jairoʼba nadegusad. Dule-bukidar eba nadmarmogad, ali-ali Jesúsʼgi yolenanai guarmalad.

²⁵ Dulemar-nadapmalad-abargi ome-gwensak birgambe-gakabogus (12) boni-nalur-nika-gudiid nadap gusmogad.

²⁶ A-ome, ina-duleganse nue-san-odurdakledii gusad. Aisaar nuguoeyob, bela mani-nikad binsa inadurgangi misgusad. Aka bur bule ega bonigan burgumai gualid.

⁵ Dule-niaburba-nikad yala-imbaganba neg-uangi binnasur gordii, na dukin akwagi sarsodii oiboar daed, ar degi-osedod dabalid.

⁶ Jesússe nonigu, yokorgi sindigar Jesús-abin signonikid.

⁷ Jesúsga binnasur sogded: —¡Mer ibgwensur be an-sao, Jesús Bab-Dummad-Bur-Dummadid-E-Machi! Napira Bab-Dummad-nuggi be anga soge, ise-mesagwar an be imakosurye.

⁸ Weyob Jesúsga niaburba-nikad sogsa-gusad, ar ade Jesús ega sogsad: “Niaburba dulegi be maid be noe.”

⁹ Degi Jesús a-dulese egichialid: —¿Igi be nuga? Dule, abin-sogded: —Bukidarad an nuga, ar ade anmar niamar-ichesulid.

¹⁰ Degi niamar Jesúsgi gannar-gannar wilenagusad: —Mer dikasur anmar-barmidoye.

¹¹ Deunni sinmar-bukidar yar-naba mas mananaid.

¹² Niaburbamar Jesúsgi wilenagusad, ega sogdemalad: —Sinmar-bukwadse be anmar-barmid, ase be anmar-ouboge.

¹³ Jesús niaburbamar-onisgu, niaburbamar-barmisad sinmar-bukwadse. Niaburbamar sinmargi ubodapgu, sinmar-milibo yar-wereged-naba-bukwadi, mata-dummadse batenonigu, bela sinmar gundilegar burgwismalad.

¹⁴ Sin-edarbemalad dobguar duurmakdemalad, igarba nadapgu, degi, neggweburse nonimargu, bela aimarga sogdemalad, igi sinmar gusa. Dulemar degi-neg-gusad daknonimarsunnad.

¹⁵ Jesússe nonimargu, dakarmalad dule-nia-bukidar-nika-gudii-daed nugus, mola nued yoi-sii. A-dulemar, dobe itodmalad.

¹⁶ Dulemar daksamalad, dule-nia-nika-gudigusad igi nugusa, degi, sinmar igi mata-dummadse bela babatis burgwisa, amar, dulemar-daksasurmaladga bela sogdemalad, igi igargan gusa.

¹⁷ Gadara-dulemar Jesúsgi nue wilenagusad, ega sogdemalad: “We-yargi-be-gudiid be nae.”

¹⁸ Jesús ur-naidse nonigu, dule nia-nika-gudigusad, Jesúsgi wilenagusad, eba naegar.

¹⁹ Jesús ega sogded: —Anba be naosur. Be-negse bur be nae, be-gwenadganse. Amarga be sogna, igi Bab Dummad nue wile be-daksa, ibiga nabir be-nudaksa.

²⁰ Dule-niaburba-nika-gudigusad nadsun, Decápolis-yargi neggweburmar-bukwadgi sunmakdii-gualid, igi Jesús wile e-dakedba e-nudaksa. Bela-dulemar geger dakmalad ibiyobi nabir nugusa.

²¹ Jesús gannar urgi mata-dummad-gaka-baidse obaksabargu, a-mata-gaka-naba dulemar-bukidar ese nonimalad.

²² Degi sii, Judiomar-onmaked-neg-daked-e-dummad-wargwen, Jairo-nugad, Jesússe nonikid. Jesús-dakargu, yokorgi sindigar e-asabin signonikid.

²³ Degi Jesúsgi nue wilenagusad, ega sogded: —An-bunagwa burgwedani maid. Anba be dage, be-argangi an-bunagwa be ebudage, adi mer burgwegar, yog nuguar guegar.

²⁴ Geb degi Jesús Jairoba nade-gusad. Dule-bukidar ali-ali na barmesnanai Jesúsba nade-gusmarmogad.

²⁵ Dulemar-bukidar-nadapmalad-abargi ome-gwensak birga-ambe-gakabogus boni-nalur-nika-gudiid nadap-gusmogad.

²⁶ A-ome nue wiles, na san-nunmaked abgadii ina-duledganse gusad. Aisaar nuguoeyob, inadurgan onodii, mani sabsur ukdii na san-ular gussoggu, mani bela ei bergussunnad, degisoggu wilearsunnad. Degite ome gwen bendaklessulid, aka-bur-bule ega bonigan burgumai-gualid.