Maol Amom Aposeli 28:4-31 in Mufian

⁴ Eaꞌ esis amam nematawa wambelisi sati ul anamba nagumba lagol Poli aliꞌatin nail, eaꞌ saꞌi, “Endilisi, aman anamba naha epes sagagaꞌi. Anen ina afuna naoh embel, owaꞌatin. Apaꞌ god anamba apeꞌinai nagagwa waf usiꞌifii nandaiwaꞌma nogape namona wapani.”

⁵ Owaꞌ Pol nialiꞌ lagol ul peleꞌatana nafeꞌ nowala nasef nif eaꞌ anen ina awasina kwasakwasala, owaꞌatin.

⁶ Eaꞌ esis sape sasasa, saꞌi sigati lagol gogalota, aꞌa anen nogowa kwafalisa afuna, owaꞌ, owaꞌatin. Esis sape nogota laota eaꞌ ina sati anis maefah awasi satagaman, owaꞌatin. Eaꞌ sambema ukup saꞌi basef saꞌi, “Ahame, Pol anen anona dembinai God.”

⁷ Itap pagape felefeleꞌma anamba afaꞌ wagapomai itap apamba anona aman dembinaii nugumafi esis sagape ailan inimbai, agilinama Publius. Aman anamba nofaꞌafa wafeꞌ ipat ananitai numafiafa andeandeꞌ wape walomana nimaguf wanif.

⁸ Publius ahamana awasina naꞌoh. Alop ananipi nifip eaꞌ nakoꞌ embel atom. Eaꞌ Pol nafeꞌ nasa lagof alop ananipi eaꞌ nataga boꞌona wapani.

⁹ Aꞌi owaꞌ nandaꞌas naꞌamba owaꞌ, anis daias ailan inimbaisi awas nandaꞌasi safiꞌmai anen nandaꞌmas beten sataga boꞌwes wapani.

¹⁰ Eaꞌ esis sasoꞌafa hiahaom fasimi aꞌowaꞌ. Ama afaꞌ waꞌi ogafeꞌ owaꞌ, sasoꞌafa hiahawes hiasi afaꞌ waowaolasi eaꞌ sofaꞌas sambeꞌmafas anop sip afaꞌ ogafeꞌapi.

¹¹ Apaꞌ afaꞌ ataꞌ wape aomb wanemb ailan inimba. Ama main, walota sip apamba pagail ailan inimbai nogota atamba fufin luꞌwani nagaluwatai. Sip apamba Aleksandriai. Agilipa saꞌi sahomana owamana amom atom magape isag atogai, nogaopana anona god basoꞌamunai Sus. Eaꞌ afaꞌ wakwahogon wafeꞌ.

¹² Wafeꞌ wataga Sirakyus wape nimaguf wanif

¹³ wakwaha anamba wafeꞌ wataga Regium. Ama nemaf fagagiꞌi fufin luꞌunai nalo nafiꞌi awin negembaꞌma, ama nemaf fagagiꞌi eaꞌ wataga anis basis Puteoli.

¹⁴ Wambel ambalemba afaꞌ wati anis Kristen. Eaꞌ saꞌipafa wape walomas wik siꞌigai. Ama main, aꞌ wafeꞌ Rom.

¹⁵ Esis Kristen sagape Romi sameꞌ basefa afaꞌ wafiꞌi, anis safiꞌi sotambel Maket wambel Apiusi, apaꞌ anis safiꞌi sotambel wambel agol agalemba sagaꞌi ifagw wanogw sandaꞌ fiꞌi feꞌ sagapaugwi. Eaꞌ satolofa ufiaꞌw. Pol nati esis, nandagala nanifela God okom ananimi ambanagem.

¹⁶ Afaꞌ wafeꞌ wataga Rom, gavman Romunai naꞌi ahoꞌma Pol atona nogape anota ipat noloma anona soldia numafiana nogape atapina.

¹⁷ Nimaguf wanif fafeꞌ ma eaꞌ, Pol nofalai amom agufumi Judai mafiꞌi mandakolas. Eaꞌ naꞌipam naꞌamba naꞌi, “Ipaꞌ sahope, aeꞌ ina andaꞌ anin mae ahambombaga epes apeꞌisi ma egesambala waf amom bafapapa apeꞌimii, owaꞌatin. Apaꞌ owaꞌ amom dembami Judai mandaꞌ kalabusima aeꞌ Jerusalem eaꞌ mandaꞌe afiꞌi lagof amom Romi.

¹⁸ Amom Rom mameꞌ basefa kot aeꞌatai, aeꞌ basefa waf awafi kofagefa owaꞌatina mohe egagaꞌ. Eaꞌ maꞌi motagwahowe.

¹⁹ Owaꞌ amom Juda mosambala basef ifimba. Naꞌamba deiꞌ aeꞌ ufiaꞌw ake ma egafeꞌ wahifiwi. Eaꞌ efala gavman dembinai Sisar ma nogameꞌ basefa kot aeꞌatai. Apaꞌ aeꞌ ina endakotima epes aeꞌasi ma anis maefah, owaꞌatin.

²⁰ Basef kofagefa ifimba atif deiꞌ efalepa pafiꞌi. Aeꞌ aꞌi eseꞌepa anif basef. Aeꞌ ahapifif ape ehafa anen anamba apaꞌ Israel hiapai mape mogohafanai. Aeꞌ agahapifanai. Isimba atis kofagesa ma deiꞌ mandaꞌ sen inimba mowaꞌe.”

²¹ Eaꞌ amom maꞌipana maꞌi, “Owaꞌ anom amam Judaimi mosapaꞌi anif basefa mogaꞌipafa inaꞌa, owaꞌatin. Eaꞌ ina anona aman Judainai nafiꞌi nape naꞌipafa andeandeꞌma naꞌi anif basef awafi ma inaꞌ, owaꞌatin.

²² Apaꞌ afaꞌ waꞌi ataꞌ omeꞌ nomonas ineꞌisi atisa malogol ineꞌigili. Afaꞌ ogawa, walemb hiagoma esis amam nematawa sandaꞌ basef awafi ma miniꞌap apamba ineꞌipi.”

²³ Eaꞌ amam mandandepa anef nemafa amam hiami mugafiꞌmai Pol ipat ananitai. Eaꞌ mafiꞌi kuhimbita mape mape mataga wambomota, anen naꞌi basef kofagefa nawalapefa amom. Eaꞌ nawalapa basef alihifa epes sogawis nomona maol Godi nope Dembinai nugumafias. Anen nawalapa anif basefa muꞌuli fowaꞌ God nagasoꞌ Mosesafi faloma basef Godi amom profet fowaꞌ magaꞌiefi. Ama basef ifimba anen naꞌif banagambela nagasaꞌma ukup amamipi ma mogahapifa Jisas.

²⁴ Anom mahapifana ma basef ananifi, apaꞌ anom owaꞌ mohapifanaea.

²⁵ Eaꞌ nomonas sandapaom daindai aꞌ mandafeꞌ. Apaꞌ dokoꞌ liꞌ Pol naꞌipama anif basef naꞌamba naꞌi, “Ambal buꞌunai Godi naꞌi endilisi atisa amom akupapa apeꞌimi ma malogol profet Aisaiai. Fowaꞌ anen nagaꞌi naꞌamba naꞌi,

²⁶ ‘Inaꞌ foꞌmago esis amam nematawa isimba niꞌipas naꞌamba niꞌi. Atiasi ipaꞌ pepe pemeꞌ basef, apaꞌ ipaꞌ ina pegawa kofagefa, owaꞌ. Ipaꞌ pepe naep petawa, apaꞌ ipaꞌ ina atiasi piti anin mae pegawan, owaꞌatin.

²⁷ Deiꞌ main, ukup epes amam nematawa isimba pasoꞌas eaꞌ, ukup eaꞌ iwanipa sogameꞌ basefa aligah asasigahi, sasopama naep asasipi eaꞌ. Iꞌi owaꞌai, esis asiti hiahawes, eaꞌ semeꞌ basef aligah asasigahi a ukup pendandaꞌma basef kofagefa, eaꞌ sombema opalef sotanima sifiꞌmai aeꞌ ma atiasi endaꞌ esis boꞌwes wapani. Owaꞌ owaꞌatin.’”

²⁸ Eaꞌ Pol naꞌipam basef akutaifi naꞌi, “Deiꞌ aeꞌ aꞌi ipaꞌ pendegawa basefa God nofaꞌapa nokwahomapa waf awafi motanima magafiꞌmai anen, ifimba anen nasapaꞌef fafeꞌma anis amam nematawa sogololama Godi. Esis isimba daoꞌ, atiasi sila basef ifimba, apaꞌ ipaꞌ owaꞌ.”

²⁹ Pol naꞌipam basef ifimba ma eaꞌ, amom dembami Juda aꞌ mafeꞌ. Eaꞌ maꞌi basef luꞌwafi maꞌif mandaꞌ hihianamaef laꞌafena amom atom.

³⁰ Aꞌi owaꞌ main, Pol nape atapina afagof siꞌigufi biagof ipat atamba anen nagatalotai eaꞌ nasoꞌas opaf nandaꞌmas waf fasifi epes hiasi safiꞌi sagatolonai.

³¹ Anen nawalapa basef buꞌwafi ma epes sogawis nomona maol Godi nope Dembinai nugumafias. Eaꞌ nawalipasa basefa dembinai Jisas Krais. Anen ina ombal mahana, owaꞌ. Nawalapef naꞌif alihif eaꞌ ina anin epen nasopamana, owaꞌatin. Basef ifimba eaꞌ maꞌuf.

⁴ Eaꞌ esis amam nematawa wambelisi sati yul anama nanaꞌ lagel Poli nail, esis saꞌi, “Endilisi, aman anama naha epes sagaꞌi. Anan ina afuna naoh embel, owaꞌ. Eaꞌ god anama apeꞌinai nagwa waf andeandeꞌi nandaiwaꞌma nope ambal namunai wapoti.”

⁵ Eaꞌ Pol nialiꞌ lagel yul peleꞌatana nafeꞌ nowala nasef nif eaꞌ anan ina awesina, owaꞌ.

⁶ Eaꞌ esis sape sahafana saꞌi siti lagel nolata eaꞌ anan nowa afuna, owaꞌ. Esis sape satolona eaꞌ ina sati anom amamamaga matagamana, owaꞌ. Eaꞌ samboma ukup saꞌi basef saꞌi, “Ahalomafa, Pol anon anona dembinai god.”

⁷ Etap nape felefeleꞌma anama afaꞌ wapoma etap anama anona aman dembinai numafi esis sape ailan anamai, agilinama Publius. Aman anama nofaꞌafa wafeꞌ ipat ananinai numafiafa andeandeꞌ wape walomana nimeguf wanom.

⁸ Publius ahalomana awesina naꞌoh. Alop ananinai nifina eaꞌ naka embel atom. Eaꞌ Pol nafeꞌ nasa lagel alop ananinai nataga boꞌona wapotiꞌ.

⁹ Amama mataga eaꞌ, enis epes sape ailan anamai hiesi awes nandaꞌesi safiꞌmai anan nandaꞌmasa beten sataga boꞌwes wapotiꞌ.

¹⁰ Eaꞌ esis saseꞌafa amamaga buꞌwami waꞌi weafeꞌ, saseꞌafa amamaga hiami afaꞌ leifamami eaꞌ sofaꞌam sambeꞌmafam sip afaꞌ weafiꞌanai.

¹¹ Afaꞌ ataꞌ wape aomb wanom ailan anama. Anom nimeguf mafeꞌma eaꞌ walata sip anama nail ailan anama nogota anama uf luꞌunai naluwi. Sip anama Aleksandriai atona. Agilinama saꞌi sahalomana owalomana amam atom mape mambap atona. Amam amama nogamana biam anona god basoꞌomunai Sus. Eaꞌ afaꞌ wakwahogon wafeꞌ.

¹² Wafeꞌ wataga Sirakyus wape nimeguf wanom.

¹³ Wakwaha anama wafeꞌ wataga Regium. Ama nemaf nagiꞌi uf luꞌunai nalo nafiꞌi aon nowalama, eaꞌ wataga anom basis Puteoli.

¹⁴ Wambel anama afaꞌ wati enis Kristen. Eaꞌ saꞌipafa wape walomas wik siꞌinai. Wape eaꞌ wafeꞌ Rom.

¹⁵ Esis Kristen sape Romi sameꞌ basefa afaꞌ wafiꞌi, enis safiꞌi sotambel Maket wambel Apiusi, eaꞌ enis safiꞌi sotambel wambel agel anama saꞌi ifagw wanom sandaꞌ fiꞌi feꞌ sapeimi. Eaꞌ satolofa eaf. Pol nati esis, nandanifel nanifela God okom ananinai boꞌona.

¹⁶ Afaꞌ wafeꞌ wataga Rom, gavman Romunai naꞌi ahoꞌma Pol atona nope anona ipat noloma anona soldia numafiana nope laꞌelaꞌef.

¹⁷ Nimeguf wenif mafeꞌma eaꞌ, Pol nofalai amam agufumi Judai mafiꞌi mandatama etifigin. Eaꞌ naꞌipam naꞌama naꞌi, “Ipeꞌ sahope, aeꞌ ina andaꞌ anom amamaga ahambombaga epes apeꞌisi ma esambala waf amam bafapapa apeꞌimi, owaꞌ. Eaꞌ amam dambami Judai mandaꞌ kalabusima aeꞌ Jerusalem eaꞌ mandaꞌe afiꞌi lagof amam Romi.

¹⁸ Amam Rom mameꞌ basefa kot aeꞌanai, aeꞌ basefa waf aonai ofagema owaꞌetina moha egaꞌ. Eaꞌ maꞌi motagahe.

¹⁹ Eaꞌ amam Juda mosambala basef amama. Naꞌama deiꞌ aeꞌ eaf aꞌe ma efeꞌ wafifiwi. Eaꞌ efala gavman dembinai Sisar ma nomeꞌ kot aeꞌanai. Eaꞌ aeꞌ ina endaꞌ kotima epes aeꞌasi ma anom amamaga, owaꞌ.

²⁰ Basef ofagema amama atom deiꞌ efalepa pafiꞌi. Aeꞌ aꞌi iꞌipipa anom basef. Aeꞌ embaleꞌef ape ehafa anan anama apeꞌ Israel hiapai mape mohafanai. Aeꞌ embaleꞌefanai. Amama atom ofagema ma deiꞌ mandaꞌ sen anama mowaꞌe.”

²¹ Eaꞌ amam maꞌipana maꞌi, “Anom Judaimi ina mandaꞌ anom basef mafiꞌi ma maꞌipafa ineꞌ, owaꞌ. Eaꞌ ina anona aman Judainai nafiꞌi nape naꞌipafa andeandeꞌma naꞌi anom basef awami ma ineꞌ, owaꞌ.

²² Eaꞌ afaꞌ waꞌi omeꞌ okom ineꞌinai atoma malogel ineꞌinai. Afaꞌ ogawa, wambel hiagoma esis amam nematawa sandaꞌ basef awami ma epes hiesi wambota anama.”

²³ Eaꞌ amam mandandepa anona nemafa amam hiami mafiꞌi ipat Poli. Eaꞌ mafiꞌi kuhimbita mape mape mataga wambomota, anan naꞌi basef ofagema nawalipam. Eaꞌ nawalapa basef alihima epes siowis wambota Godi numafias. Anan nawalapa anom basefa miꞌuli fowaꞌ gani God nasoꞌ Mosesanai maloma basef Godi amam profet fowaꞌ maꞌiami. Ama basef amama anan naꞌipama basef laꞌifimi nafela ukup amamumi ma mombaleꞌefa Jisas.

²⁴ Anom mombaleꞌefana ma basef ananimi, eaꞌ anom owaꞌ mombaleꞌefana.

²⁵ Eaꞌ ukup mape naꞌama eaꞌ mafeꞌ. Doꞌok Pol naliꞌ naꞌipama anom basef naꞌama naꞌi, “Ambal Buꞌunai Godi naꞌi endilisi etisa amam akupapa apeꞌimi ma malogel profet Aisaia. Fowaꞌ anan naꞌi naꞌama naꞌi,

²⁶ ‘Ineꞌ foꞌmago esis amam nematawa isima niꞌipas naꞌama niꞌi. Anona nemaf ipeꞌ pepe pemeꞌ basef, eaꞌ ipeꞌ ina pegawa ofagema, owaꞌ. Ipeꞌ pepe naep motawa eaꞌ ipeꞌ ina piti anom amamaga pegawam, owaꞌ.

²⁷ Deiꞌ main, ukup epes amam nematawa isima maseꞌas eaꞌ. Ukup asasimi aoma someꞌ basefa aligah asasimi, sasopama naep asasimi. Iꞌi owaꞌ, esis siti amamaga eaꞌ someꞌ basef aligah asasimi ma ukup mopoma basef ofagema samboma opalef sotanima sifiꞌmai aeꞌ ma endaꞌ esis boꞌwes wapotiꞌ, owaꞌ.’ ”

²⁸ Eaꞌ Pol naꞌipam basef akutaimi naꞌi, “Deiꞌ aeꞌ aꞌi ipeꞌ pegawa basefa God nofaꞌapa nokwahomapa waf aonai motanima mufiꞌmai anan. Amama anan nasapaꞌam mafeꞌma esis amam nematawa sololama Godi. Esis isima nambimb sila basef amama, eaꞌ ipeꞌ owaꞌ.”

²⁹ Pol naꞌipam basef amama, amam dambami Juda mafeꞌ. Eaꞌ maꞌi basef luꞌwami maꞌiam mandahihianamam laꞌafena amam atom.

³⁰ Amama mafeꞌma eaꞌ, Pol nape laꞌelaꞌef afagof biam siꞌim ipat anama anan natalonai eaꞌ naseꞌas opaf nandaꞌmas waf buꞌunai epes hiesi safiꞌi satolonai.

³¹ Anan nawalapa basef buꞌwami ma epes siowis wambota Godi numafias. Eaꞌ nawalipasa basefa dembinai Jisas Krais. Anan ina umbamahana, owaꞌ. Nawalapam naꞌiam alihim eaꞌ ina enin epen nafiꞌi naꞌipana naꞌi owaꞌ.