Mantá Tanla 7:44-47

⁴⁴Junni Esteban Diosichi mantate pamin tsachi pila chutecaca tsanque manpatobi, itsantinue: —Junni aman niyanlanantiya chutunun tobi canenato, Moisés Diosichi tenchi jali ya quinue tinue. Diosi yabe cuenta quito, itsanque ya quede! tica jominue tinue. Junni Moisés jun tsanquenan Diosichi tenchi jali ya quinue. Tsanque chiquilachi matu to familiala Diosichi yaca taminlanue tinue. Jun yaca quirato, tsarasica Diosica tenca cantsan jominue tinue.

⁴⁵Aman yalari puyanunbi, yalachi nalalaman Diosichi jali yaca taminlanue. Junto Josué yalachi miya joto, Diosichi jali yaca in toca tanjalainue tinue. Aman jun mate uyan ni tsachila in tobi chumin jominlanue tinue. Junni Diosi patsa yalaca larito suerenue yape israelítalari inte chularasa. Tsanque Diosichi jali ya in tote chuminue tinue David israelítalachi miya ino fecári.

⁴⁶Diosi Davica seque tenca camin jominue. Junni Daviri Diosibe itsanque rocainue tinue: Matu to Jacobo sonnano male nechi israelítala nube penenaminla joyoe. Junto nuchi tenchi tsa ya quino muquee tinue tinue.

⁴⁷David mantimini Diosichi ya quino podeitusanan, yachi nao Salomón Diosichi yaca quinue tinue.