Make 6:19-41 in Enga

¹⁹ Doko, enda Etotiasa dokome Jone imbu kayapala pyao kumasalanya piamopa kapa napea-pyaa.

²⁰ Doko, Etoteme Jone doko akali tolatae epe etete mende lamo lao kandatala baa paka kayapala auu pyoo isoo katea-pyaa. Baame Jonenya pii dupa sepala epao mona andeamoaka doko, baanya pii doko auu kayao sia-pyaa.

²¹ Jone pyapenge gii angi mende enda Etotiasa dokome kandao nyia-pyaa. Etotenya mandenge gii doko epeamopa baame akali andake dupapi, yanda singi amii isingi mupa dupapi, Galili tange akali andake dupapi dupanya nee yangakamaiya-pyaa.

²² Dopa piamopa nee nao peteamino dokonya Etotiasa wanenge doko ipao kolandatala lyia-pyaa. Dokopa Etote mauwapi dee baa-pipa awapa nee nao peteamino dupame etete auu kayami-pyaa. Dopa petala Kiŋi Etote dokome wanaku doko lamaiyoo, “Embame opale mende namba-kisa tee lateno doko embame latenoli pyoo nambame emba dyaapona,” lea-pyaa.

²³ Baame lao pituu, “Opale mende embame nambame isoo kalyo dokonya yangipa kapa lao tee lateli pyoo kiningi etete nambame dyaapona,” lea-pyaa.

²⁴ Dopa leamopa wanaku doko endangi peteasa pupala endangi pisoo, “Aki mende dina lao tee lawape?” lea-pyaa. Endangimi baa lamaiyoo, “Jone Kaimbu Pingi dokonya aiyomba doko dina lape,” lea-pyaa.

²⁵ Dokopa wanaku dokome pupae yapa kiŋi doko peteasa ipupala, “Embame Jone Kaimbu Pingi dokonya aiyomba doko kepao pelesa mendenya setapala epapuaka dipi laka lao masilyona,” lao tee lea-pyaa.

²⁶ Dopa leamopa kiŋi doko etete mona kenda kaya-pyaa. Dopa piamoaka doko, wambao baame etete kiningi lelyona leamo dokopi dee endakali baa-pipa awapa peteamino dupapi lao masetala wanaku dokonya pii nepala nayatoo lao masia-pyaa.

²⁷ Dopa lao masetala dokopaka yanda singi mendeme Jonenya aiyomba doko kepao nyala pena lea-pyaa. Dokopa yanda singi dokome anjingi andaka pupala Jonenya aiyomba doko kepao nyia-pyaa.

²⁸ Kepao nyepala pelesa mendenya setapala nyoo ipao wanaku doko maiya-pyaa. Wanaku dokome nyoo baanya endangi maiya-pyaa.

²⁹ Dokopa Jonenya disaipele dupame doko sepala baa nyoo pao malu piami-pyaa.

³⁰ Kote mendepa aposele dupa Jisasa kateamo dokonya ipao kambu pyatala nyakamame opale piami dupa pitakapi pii mana lamaiyamipi dupa dopa pipuma lao baa lamaiyami-pyaa.

³¹ Dokopa endakali longo dupa pata ipata piaminopa Jisasapi baanya disaipele dupapi nee napenge gii nasia-pyaa. Dopa piamosa baame dokaita lamaiyoo, “Naima iki endakali napalenge yuu mendakaita kuki koto nyemana mona ipupa,” lea-pyaa.

³² Dopa leamopa dokaita sipi mendenya pao pyakalyetala nyakama iki endakali napalenge yuu mendakaita peami-pyaa.

³³ Peaminopa endakali longo dupame dutupa lamo lao kandatala yuu taono dupa pitakanya tange endakali dupame mee kaitini alo pyatala nyakama wambao pao kateami-pyaa.

³⁴ Jisasame netesa pao pyakamatala endakali kambu andake mende kateamino kandea-pyaa. Dokaita sipisipi setao katenge akali mende nakatenge dopale joo kateamino kandatala kondome kumapala baame opale longonya lao mana lamaiya-pyaa.

³⁵ Indupa niki lenge landa pyalanya piamopa baanya disaipele dupame baa kateasa ipupala lao pituu, “Yuu dakenya endakali napalengema lamo. Dee indupa yuu kualanya pilyamoaka.

³⁶ Dopa pilyamona embame dokaita ee silyamo dupanyapi yuu taono yakane soo pelyamo dupanyapi nee akipi tange sambao nama pena laa,” leami-pyaa.

³⁷ Dopaka doko, baame yanu pyao dokaita lamaiyoo, “Nyakamameaka dokaita nee maiyepa,” lea-pyaa. Dokaitame baa lamaiyoo, “Naimame pupala muni kina andate lapoma dupame betesa sambapala endakali datupa nena lao maimape?” leami-pyaa.

³⁸ Dopa leaminopa baame dokaita lamaiyoo, “Betesa akipate silyape lao kanja pupa,” lea-pyaa. Dokaitame kandatala baa lamaiyoo, “Betesa yuungi wapaka lapoma pyoo silyamona,” leami-pyaa.

³⁹ Baame disaipele dupa lamaiyoo, “Tanu dupanya endakali dupa pitaka wakale wakale lao kambu pyao petena laapa,” lea-pyaa.

⁴⁰ Dokopa endakali dupa andate mendai lawapi kingi ita yuungi lawapi kambu pyao peteami-pyaa.

⁴¹ Dopa piaminopa baame betesa yuungi wapaka lapoma pyoo siamo dutupa nyepala kaiti-kisa kandalyetae katao yaka pilino lea-pyaa. Yaka pilino latala baame betesa dutupa konjepala baanya disaipele dupame mokosoo maina lao maiya-pyaa. Dopa petala baame wapaka lapoma dolapo endakali dupa pitakanya konjakamaiyaka-pyaa.

²¹ Erotenya mandenge gii doko epeamopa, baanya kalai akali andake dupapi, yanda singi mupa dupapi, Galilea tange akali andake dokaitanya nee yangakamaiya. Gii dokopa, Erodiasame kandeamopa, Jone pyapenge kaitini mende sia.

²² Dokopa nee nao peteamino dokonya Erodiasa wanenge doko ipao kolandatala, danisa lea. Dopa piamopa, Erotepi, baa-pipa apata nee nao peteamino dupame etete auu kaeyao kandeami. Kandatala Kiŋi Eroteme wanaku doko lamaiyoo, “Embame dopale mende namba-kisa tee latenopa, nambame latenoli pyoo, emba dyaapo.

²³ Embame nambanya isingi mate doko aopa lao konjepala, yangi dii lateno doko, dyaapoakana lao nambame kiningi etete lelyona” lea.

²⁴ Dopa leamopa, wanaku doko endangi peteasa pupala, baa tipa pyoo, “Aki mende dina lao tee laowape?” lea. Dopa leamopa, endangimi baa lamaiyoo, “Jone kaimbu pingi dokonya aiyomba doko dina lape” lea.

²⁵ Dokopa kiŋi doko peteasa wanaku doko alo pyao pupala, “Embame Jone kaimbu pingi dokonya aiyomba doko pelesa mendenya setapala, epapuaka dii” lea.

²⁶ Dopa leamopa, kiŋi doko etete mona kenda kaeyamoaka doko, wamba endakali dupanya enombanya kiningi etete maitoana leamo doko masetala, wanaku dokonya pii nepala naeyatoo lao masia.

²⁷ Dopa lao masetala dokopaka, yanda singi mendeme Jonenya aiyomba doko kepao nyala pena leamopa, baa anjetae andaka pupala, Jonenya aiyomba doko kepao nyia.

²⁸ Kepao nyepala pelesa mendenya setapala, nyoo ipao wanaku doko maitiamopa, wanaku dokome nyepala, endangi pao maiya.

²⁹ Dopa piamo doko sepala, Jonenya disaipolo dupame baanya yonge doko nyoo pao malu piami.

³⁰ Aposolo dupa Jisasa kateamo dokonya pilyetala, nyakamame kalai piamipi, mana lamaiyamipi, dupa dopa pipumana lao baa lamaiyami.

³¹ Dokopa endakali longo mendapu pao ipao piami dokome, Jisasapi, baanya disaipolo dupapi, nee napenge gii nasia. Dopa piamosa, Jisasame dokaita lamaiyoo, “Naima iki endakali napalenge yuu mendasa, kuki koto nyemana mona ipupa” lea.

³² Dopa lateamopa, nyakama sipi mendenya pao pyakalyetala, endakali napalenge yuu mendakaita peami.

³³ Peaminopa, endakali longo dupame nyakama dutupa dosa paanya pelyamino lao kandatala, taono dupa pitakanya tange dupame mee kaitini alo pyatala, wambao pao kateami.

³⁴ Jisasa sipinya pituu isa pyakanatala, endakali kambu andake mende kateamino kandea. Dokaita sipisipi setao katenge akali mende nakatenge joo kateaminosa, kondo kaeyapala, baame pii longo mendapuame mana lamaiya.

³⁵ Lamaiyoo kateamopa, niki lenge landa pyalanya pia. Dokopa baanya disaipolo dupame baa kateasa ipupala lao pituu, “Endakali napalenge panda dakenya yuu kuiyalanya pilyamona,

³⁶ embame dokaita maketa seta dupanya tange nee sambao nala pena laa” leami.

³⁷ Dopa leaminopa, baame pii yanu pyakamaiyoo, “Nyakamameaka nee maiyepa” lea. Dokopa dokaitame baa lamaiyoo, “Naimame muni andake anjataeme betesa sambapala, endakali longo dake nena lao maimape?” leami.

³⁸ Dopa leaminopa, baame dokaita lamaiyoo, “Betesa akipate silyape lao kanja pupa” lea. Pao kandatala dokaitame baa lamaiyoo, “Naimanya 5-pela betesa-pipa, pisa lapoma-pipa iki silyamona” leami.

³⁹ Dopa leaminopa, Jisasame disaipolo dupa lamaiyoo, “Tanu sakapae dupanya endakali dupa pitaka kambu pyao wakale-wakale petena lapa” lea.

⁴⁰ Leamoli pyoo, kambu mende 50 lao pitipa, 100 lao pitipa piami.

⁴¹ Dokopa Jisasame 5-pela betesa, pisa lapoma-pipa siamo dutupa nyepala, kaiti-kisa kandalyetae katao yaka pilino lea. Yaka pilino latala baame betesa dutupa konjepala, baanya disaipolo dupame mokosina lao maiya. Dopa petala baame pisa dolapo endakali dupa pitakanya konjakamaiyaka.