Make 5:5-26 in Enga

⁵ Kuka kotakapi koteaka lao baa endakali malupi yuu mandapi dupanyaka paliuu katenge-pyaa. Baame puu lao ae lao katao baanya yonge doko tange kaname konjeta pingi-pyaa.

⁶ Jisasa londatili kateamopa baame kandatala alo pyao ipupala baa kateamo dosa luma lakea-pyaa.

⁷ Dopa petala baame puu lao ae latala, “Jisasa emba Gote Etete Ketae Katenge dokonya Ikiningi, embame namba aipa pitipi? Nambame Gotenya kenge doko lao embame namba tanda andake nandipoko,” lea-pyaa.

⁸ Doko, Jisasame baa lamaiyoo, “Enjele koo, embame akali dake yakinatala kamanda ipu,” leamosa dopa lea-pyaa.

⁹ Dokopa Jisasame baa pisoo, “Emba kenge apipi?” lea-pyaa. Dopa leamopa akali dokome yanu pyao, “Naima longo dokonya nambanya kenge Longo lengena,” lea-pyaa.

¹⁰ Dopa latala Jisasame enjele koo dutupame yuu dake yakinatala pena laa naena lao baame kongo lea-pyaa.

¹¹ Mena elyambu mende yuu manda kilikili dokonya nao kateami-pyaa.

¹² Dokopa enjele koo dupame Jisasa kandao, “Naima mena dupanya koko landa pyamana dupa kalyamino dokonya pupa lapoko,” leami-pyaa.

¹³ Dopa leaminopa Jisasame pena kaya-pyaa. Dokopa enjele koo dupame akali doko yakinatala mena dupa-kisa pao landa piami-pyaa. Dopa peteaminopa mena elyambu doko alo pyao pao papatale mendenya pyakatala endaki pete dokonya tumbitambi napala kumiami-pyaa. Mena dupa taosene lapoma jowapi mende-pyaa.

¹⁴ Dopa piamopa mena setao katenge akali dupa paka pupala yuu taono dokonyapi mee yuupi dupanya pao lamaiyami-pyaa. Dokopa endakali dupame piamo doko kanja epeami-pyaa.

¹⁵ Dupa Jisasa kateamo dokonya ipupala kandeaminopa wamba enjele koo longo paleta katenge akali doko indupa yonge pee dupa pyoo mona paliuu peteamo kandatala paka kayami-pyaa.

¹⁶ Piamo doko lengeme kandeamino endakali dupame enjele koo paleta akali doko-kisa piamo dokonya lawapi dee mena dupanya lawapi endakali epeamino dupa lamaiyami-pyaa.

¹⁷ Dokopa dupame Jisasa baa nyakamanya yuu doko yakinatala pena lao kongo leami-pyaa.

¹⁸ Dopa leaminopa baa sipi ongonya pyakalyiamopa wamba enjele koo paleta kateamo dokome baa apata buaako lea-pyaa.

¹⁹ Dopa leamopa Jisasame ongonya ŋee nalea-pyaa. Nee nalenya baa lamaiyoo, “Embame embanya andaka emba palu dupa katatamisa puu. Pupala Kamongo dokome embanya pyakalamo dupapi dee emba kondo kayalamo dokopi dutupa dupa lamaipina,” lea-pyaa.

²⁰ Dopa leamopa akali dokome pupala baa-kisa Jisasame piamo dupa pitaka Dekapolisa yuu dokonya panao lamaiya-pyaa. Dopa piamopa endakali dupa pitakame sepala mona andeami-pyaa.

²¹ Jisasa baa sipi dokonya pituu endaki pete dokonya yangitena dee pilyia-pyaa. Endaki pete lemba dokonya endakali kambu andake mendeme ipao baa kateasa limbiami-pyaa.

²² Dokopa Jutamanya losuu anda isingi akali dupanya mende Jaitasa lenge doko epea-pyaa. Ipao Jisasa kandatala baanya moko kateamo dosa tombauli sepala, kyoto joo dapa lao Jisasa-kisa tee lea-pyaa: “Nambanya wanenge doko kumalanya pilyamona, baa mee jetala saka pena embame ipao baa kingimi watandatalena,” lea-pyaa.

²³ Dopa leamopa Jisasa baa-pipa awapa peambi-pyaa.

²⁴ Dopa piaminopa endakali longome baa watao pupala katao tambukiniami-pyaa.

²⁵ Enda mende ee kana kingi ita mende-kisa dee lapoma dupanya andaka nao paliti-paliti singi mende katea-pyaa.

²⁶ Enda dokome dokosaa longo dupa-kisa tanda longo nao muni akipi dupa pitaka nepeamoaka doko, kuki yaka nanjoo etete koyamopa petea-pyaa.

⁵ Kuka kotakapi, koteaka lao baa endakali malupi, yuu mandapi, dupanyaka paliu katenge. Dupanya katapala ae latae katao, baanya yonge doko tange kaname konjeta pingi.

⁶ Jisasa londati joo kateamopa, akali dokome kandatala, alo pyao ipupala baa kateamo dosa luma lakea.

⁷ Luma lakapeamopa, Jisasame baa lamaiyoo, “Imambu koo, embame akali dake yakinatala puu!” lea. Dopa lateamopa, baame puu lao, “Jisasa, emba Gote Etete Ketae Katenge dokonya Ikiningi. Embame namba aipa pitipi? Embame Gotenya kenge dokonya kyeto joo, namba tanda andake nanditoo lao laa” lea.

⁹ Dokopa Jisasame baa tipa pyoo, “Emba kenge apipi?” lea. Dopa leamopa, akali dokome yanu pyao, “Naima imambu koo longo kalyamano. Tenge dokonya, namba kenge Longo lengena” lea.

¹⁰ Dopa latala, imambu koo dupame kongo latae katao, nyakama yuu dokonya pyao watala naena lao wii lao tee leami.

¹¹ Mena tausene lapomapi mende manda kili-kili dokonya nao kateami. Dokopa, imambu koo dupame Jisasa tee lao, “Naima mena dokaita-kisa landa pyalapa lapoko!” leami. Dopa leaminopa, mena dokaita-kisa kolandena leamopa, imambu koo dupame akali doko soo yakinatala, mena dupa-kisa pao landa piami. Landa pyateaminopa, mena elyambu doko pitaka alo pyao pao, endaki pete dokonya mangatala kumiami.

¹⁴ Kumateaminopa, mena setao katenge dupa taononyapi, mee akali palenge yuu dupanya paka pupala, dopa pyomona lao lamaiyami. Lamaitiaminopa, endakali dupame piamo dupa kanja epeami.

¹⁵ Dupa Jisasa kateamo dokonya ipupala kandeaminopa, wamba akali imambu koo longo paleta kateamo doko indupa yonge pee dupa petala, mona paliu peteamo kandatala, paka kaeyami.

¹⁶ Dokopa wamba kandeamino endakali dupame ene kanja epeamino dupa dopa pyomona lao lamaiyami.

¹⁷ Lamaitiaminopa, dupame kongo lao Jisasa baa nyakamanya yuu doko yakinatala, pena leami.

¹⁸ Dopa leaminopa, baa sipi dokonya pyakalyiamopa, wamba imambu koo paleta kateamo dokome baa apata buape lea.

¹⁹ Dopa leamopa, Jisasame daa latala, “Kamongome emba kondo kaeyapala, embanya pyakalamo dupa andaka pupala, emba tata dupa lamaipi” lea.

²⁰ Dopa lamaitiamopa, akali dokome pupala, baa-kisa Jisasame piamo dupa pitaka yuu Dekapolisa dokonya panao lamaiyamopa, endakali siamino dupa pitaka walu leami.

²¹ Jisasa baa sipi dokonya pituu, Galilea pete dokonya yangitena pilyetala kateamopa, endakali longo mendapu ipao kambu piami.

²² Dokopa Judamanya lotuu anda mendenya isingi akali Jairusa lenge doko epea. Ipao Jisasa kandatala, baanya moko siamo dosa tombauli sepala

²³ kongo lao, “Nambanya wanenge doko kumalanya pilyamona, embame baa-kisa kingi setapala, saka nyakala ipu” lao tee lea.

²⁴ Dopa leamopa, Jisasa baa-pipa apata peambinopa, endakali longome baa watao pupala, katao tambukiniami.

²⁵ Kateamino dupanya enda mende ee kana 12 dutupanya yuu gii dii lao angupae kandenge doko etala naeya.

²⁶ Dopa piamosa, enda dokome dokosa longo dupa-kisa muni longo nepeamoaka doko, dupame angi nisala naeyamopa, etete koeyala pea.