2 Len onoh ano, Jises kuhi Pita, Jemis ma hawe Jon a hawen, ma Jises kuhi oro ala bwele-e mandrei ari loken labai, ya oro le ado aliy. Oro ado, oro anyolom ili bada Jises ndratubuniy ndra randrah ja.
3 Ma awin tan ndra nyikilikin asahan i belen ma sakalawi belen ta lakou mari badu munyak dah, i buku kasikine.
4 Eme oro lau tan ma taloh nane dah atou Alaija uru Moses asahan, ma asehek sahou hawen.
5 Eme Pita atou lakou doh ya iy asehek ta Jises i buku doh, “Ndramak ta leheya, mwasin handru ta aso are ndra kada-ah, ya aso katahi taloh mandron kudu dah, ra-em tam, ra-em ta Moses, ma ra-em ta Alaija.”
6 Pita asehek sahou doh, tasah iy hawe uru nane anoh, eme iy bala tanan sahou nane iy asehek bwe.
7 Eme ma asi kandrah asahan ma tubuluhi oro, ya sahou ari asahan bolo asi kandrah nane asehek i buku doh, “Idah naduk handru. Jo aseken iy labai, ya ado kanuhun sahou tan.”
8 Eme suwi labai oro anyolom ili, ma oro batou ari lau hawe oro bwe, arile Jises le ari.
9 Eme oro are bwele-e mandrei ame andri, Jises batanau oro i buku doh, “Saba lakou ado ndratou ma ndranuhun, ado sasehek sala ta ari ndramak, ili winiya le Nadu Ndramak Awas amak ereu bolo lek tan eme loken.”
10 Eme oro basehek bwe, toro le, eme udu ndrokowa oro le, oro ndremenya oro ta saba moson, “Ta amak ta imek tan,” ma i buku sah handru.
11 Eme oro ndremenya Jises i buku doh, “Buku sah iri lau ta leheya kandriyen tiri Juwis anya Alaija kameh eme bwena op?”
12 Eme iy tiye i toro anya, “Sahou badeh, handru. Alaija eme bwena handru ta lowosa iri lakou mari. Ya i buku sah handru ja sahou mene torowenei anya idah kameh Nadu Ndramak Awas kameh akohok sisi-in solo-an ma iri kameh bwale iri iy?
13 Arile jo asehek tado i buku doh, Alaija ndrame, arile iri an hamon ta budon tiri amwenen, ya iri amekes iri kandriyen mari i badan, i buku none ndratorowenei sihiden.”
14 Eme oro ame hawe oro lau ra-on ja ta Jises, eme oro anyolom lau solo-an solo-an awudi oro ma iri lau ta leheya kandriyen tiri Juwis ame andres hawe oro lau ta Jises.
15 Eme nawin bwe, iri lau atou Jises ma mani iri atur ma iri sakaliye ala hawen ma sekesek ma anyumos badan.
16 Eme ya Jises ndremenya oro lau tan, “Ado andres hawe iri ta sasah handru?”
17 Eme ndramak ari udu bolo iri anya, “Ndramak ta leheya, jo atiye naduk eme hawem ai, tasah malawin ndra-in udu la-un, ya iy winiyan basehek sahou bwe.
18 I buku none asahan, malawin ndra-in kameh moraha iy i andri bada ndren, ma bubusi bohon eme len ma iy andrebek lihin ale, ma iy sorokok en. Eme jo tiye oro lau tam katikahei malawin ndra-in doh ki-iu, arile oro winiyan batikahei ba-au bwe.”
19 Eme Jises tiye i toro, “Ado lau mwan ma badih batehei budon tado handru bame tek bwe. Len sabe kameh jo kereu hawe ado, ano ado barala tanan boto-on ta Kindrei? Ado katiyani nah badeh, keme hawek.”
20 Eme oro tiyani iy i hawen. Eme malawin ndra-in anyolom Jises, ma iy morohani nah dah i andri bada ndren ma iy tundrundru ma bubusi bohon atau.
21 Eme Jises ndremenya tama i nah nane dah, “Malawin ndra-in udu la-un len sabe handru?” Eme iy anya, “Iy ma nadu bwisik le badeh, asahan ai.
22 San solo-an iy moraha iy i jih ma i gwa anya kamekes iy kimek. Ya i buku none saba lakou ou winiyan mesekei, ya ou tikisi aso, ma ou sebenei aso!”
23 Eme Jises tiye i tan i buku doh, “I buku sah handru ou anya, i buku jo winiyan? Lakou mari winiyan asahan i tare lau i buku none budon tan handru in tek.”
24 Eme tama nah nane dah aloh, “Laban, jo badeh, budon tek sese le in tam, arile ou aseben jo ja ya budon tek handru ki tam.”
25 Eme ya Jises anyolom iri lau solo-an solo-an sakaliye a le se ame, eme iy tiye sahou boto-on i ta malawin ndra-in anya, “Ou malawin ndra-in, ou bohom bwe, ou ndranyem siu, jo tiye tam, ou ame len tan ma ou same hamon ja ai!”
26 Ano malawin ndra-in nane anyar ma iy morohani i nah dah i andri ma iy amei, eme ma malawin ndra-in nane udu bwele-en eme len, ya i nah mwan dah sorokok i buku none iy ndramak, eme iri lau solo-an anya ja, “Iy ndramak.”
27 Arile Jises tawi minen, ma suri iy eme loken.
28 Eme Jises iu i asiu, ma oro lau tan ndremenya iy anya, “Buku sah handru ya aso winiyan batikahei malawin ndra-in nane iu bwe?”
29 Eme iy tiye i toro, “Lakou i buku dah winiyan batikahei bame len na saba san ja bwe, arile na salom i ta Kindrei le winiyan ai.”
30 Eme ma, Jises hawe oro lau tan ruwani kon doh ame len, ma oro adek ales au ala bolo Galili. Ya Jises bwalen lau sala tanan ta iy udu heh handru.
31 Tasah iy anya kaleheya oro lau tan, “Iri kameh atehei Nadu Ndramak Awas ili mine iri lau. Ya iri lau kameh adai iy imek. Ano len ma taloh ja kameh iy amak ja.”
32 Arile budon toro baleu ta sahou tan nane bwe, eme oro anoh ta ndremenya iy.
