12 Mewö jigetka uruŋan lömböriiga osoŋgombuk qeiga jiyök, “O ambazip nalö kewöŋe gölmenöŋ maljei, iŋini mönö wuanöŋgöra Anutugö aiwesök asuhumapköra kapaŋ kölakze? Nöŋön keu ölŋi kun kewö jibi mötme: Anutunöŋ aiwesök mewöŋi mi qahö memba kondel eŋgima. Ombaŋ saumbaŋ!”
13 Mewö jiba eŋgömosöta kunbuk gwarekurupŋi yembuk waŋgenöŋ öŋgöba aŋgö kutuba likepŋe aŋgotket. Mewö.
14 Miaŋgöreŋ aŋgota semön membingö ölum eŋguiga beret mohot-töp mia waŋgenöŋ memba tatket.
15 Tatketka Jisösnöŋ kewö jim kutum eŋgiyök, “Iŋini Köna keugö kapaŋkölköl (Farisi) yeŋgö wösökömbukŋini aka Herodkö gipmi kakŋi mietköra mönö galömŋini meme. Mi ölöpŋaŋök qahö kewöta andö qegetka mietkön mönö yist ewö qariba mem bölim eŋgimahot.”
16 Jiiga keu pasetŋi mi qahö möt asariba sutŋine kewö eraum mötket. “Beretnini qahöpköra jiza me denöwö?”
17 Mi eraum mötket kezapŋe geiga kewö jii mötket, “Wuanöŋgöra beretnini qahö jiba eraum mötze? Nöŋgö könaŋamni mi wuanöŋgöra qahö möt kutuze? Mi tok qahö möt asarize me? Urukezapŋinan gwözöŋda tatza me?
18 Jeŋini ahözapmö, töndup qahö ek kutuze me? Kezapŋini ahözapmö, töndup qahö möt asarize me? Yuai asuhuyöhi, mi ölum eŋguza me qahö?
19 Nöŋön beret 5 mi 5000 yeŋgöra mindipköbiga miaŋgö kitipŋi qezakögetka könde dawiknöŋ geba numbuŋine qeyök?” Qesim eŋgiiga “Könde 12,” jiget.
20 Jigetka toroqeyök, “Nöŋön beret 7 mi 4000 yeŋgöra mindipköbiga miaŋgö kitipŋi qezakögetka sakap dawiknöŋ geba kokolak qeyök?” Qesim eŋgiiga sakap 7 jiget.”
21 Jigetka jii mötket, “Miaŋgöra könaŋamni mi mönö tok qahö möt asarize me?” Mewö
22 Jisösnöŋ gwarekurupŋi yembuk Betsaida taonöŋ kaget. Miaŋgöreŋ kaba jegömöl azi kun waŋgita Jisösgöreŋ kaŋgota böröŋan misirimapkö köuluköm waŋgiget.
23 Köuluköm waŋgigetka jegömöl azi mi böröŋe memba waŋgita miri yaigepŋe anohot. Anda söutnezit jeŋe ala böröŋi nöröpŋe ala qesim waŋgiyök, “Yuai kun ekzan me qahö?”
24 Qesim waŋgiiga jeŋi ui öŋgöiga jiyök, “Ambazip eŋgekzalmö, mi ip tandöktandök aketka imutimutŋanök eŋgekiga anda kaba kinje.”
25 Mewö jiiga kunbuk böröŋan jeyahötŋi misiriiga tohoyohotka törörök uiga asarim sölölöŋgöiga yuai pakpak ölöpŋanök ek teköyök.
26 Ek teköiga melaim waŋgiba kewö jii mörök, “Gi miri kungen kude anmanmö, diŋdiŋanök nangi mirige anman.” Mewö.
27 Jisösnöŋ Betsaida mosöta gwarekurupŋi yembuk Sisarea Filipai taongö kösutŋe anget. Könanöŋ anda gwarekurupŋi kewö qesim eŋgiyök, “Ambazipnöŋ nöŋgöra denöwö jimakze? Ni niŋia akzal?”
28 Jiiga meleŋda kewö jiget, “Tosatŋan ‘Gi Jon O-melun azia akzan,’ jimakzemö, tosatŋan ‘Gi Elaija akzan,’ jimakze aka tosatŋan toroqeba kewö jimakze, ‘Gi kezapqetok azi walŋi yeŋgöreŋök kun akzan.’
29 Mewö jigetka kewö qesim eŋgiyök, “Aka nanŋinak nöŋgöra denöwö jize? Ni niŋia akzal?” Qesim eŋgiiga Pitönöŋ kewö meleŋnök, “Gi Anutugöreŋ Amötqeqe Toŋi Kraist akzan.”
30 Mewö jiiga könaŋi aukŋe jiget kunŋan mötpapuköra soŋgo köhöikŋi al eŋgiyök.
31 Jisösnöŋ gwarekurupŋi könahiba kewö kusum eŋgiyök, “Suep gölmegö azi ölŋan mönö sihimbölö gwötpuk mötma. Kantrigö jitŋememe, jike nup galöm aka Köna keugö böhi yeŋön mönö andö qeba qegetka kömuma. Kömui wehön karöbut teköiga kömupnöhök wahötma.”
32 Jisösnöŋ keu mi qahö köyatiba aukŋe jiiga Pitönöŋ miaŋgöreŋök öröm waŋgiba göraŋe anda könahiba qetal waŋgiyök.
33 Qetal waŋgiiga liliŋgöba gwarekurupŋi uba eŋgeka Pitö qetala kewö jim waŋgiyök, “Gi keu mötmörizani, mi Anutugöreŋ keuya qahöpmö, gölme ambazip aka Satangö sihima. Miaŋgöra Satan, gi mönö dölki nöŋgö jemesoholneyök kesalnöŋ.” Mewö.
