Mak 6:4-14

⁴Ende qamb abari menman ibag ne wurinob qamar: “Eng segagam, Qenu qob qamarau munon wonou ginam qenen end der qob wurinob qamb mi abar qamb qemeriner eng qob ombarirambour, a ginam taut end is mi eng gagar ebeiner eng munon qob igotoubour.”

⁵Ende qamb ne mi bubun ger bo ginam qenen end me abau, toar munon gari-gari wurimusiarei.

⁶Wo wonou ginam qenent eng wot me igub qomon eng abari gab iet wogub bo iua ginam qani-qani eng gagar qob wuriimbig qib igoai.

⁷Ende at qib wogub ne wonou wuriimbig qib igo munon yurau eng wuriba qiumuni wogub wuriimurima ombur-ombur sig munon ginam-ginam qoamirei. Wuriimurimb qamb ete wurinob qamar: “An munon ginam-ginam isari ye annonogursi igimine ai munon igaramor eng qerismindou munon wuribopuri igo eng gagar qiribiten wurimusiari uberburubour,” ende qamb ne bo qamar: “An isub qamb mind ger me baiar, a mi niau ger me baiar, ne norogum abau qiyo nomon qur ger ue ar qib igoarar. Aninou tugotau eng gari qas ba maut-maut qib igoarar.

⁹Goten yau eng nagar, ne mingoan bubun ger bo me baiar.”

¹⁰Ende wurinob qamb ne qamar: “An ginam aib geret weib isari munon ger anamar mor isa gab eng mor end qas igo wogub bo der tumbigi isar.

¹¹Isi yarab ginam isunon eng me animbag qiyo qob qamarari me igub abari gab eng an bo ginam end me gugurt me abar. Ar wurimerimotar wogub irumban nogounon eng bai arir wogub saranang isar. Ende abari ne wurinou ansiorunor end misir igubour,” ende qamarei.

¹²Ne wuriimurima ginam-ginam isub wurinob qamamir: “An qomon boru-boru ebet igoumon eng gagar see aninob quraun end qinining ne mom wagar,”

¹³ende qamb ne munon qei toar boru-boru igab ne ai igaramor eng gagar wurimusub ende at qib igurei.

¹⁴Ende at qib igamari igoi ne Yuda munon baraitari aib unum Herot wo igor eng Yisas unum mom aibt munon ginam-ginam isorei. Ne munon qei der qamamir: “Wa, Yon munon ya obotar qib igoar eng bo igomot der wonou sarau baab qib igoar eng bo aba eng.”