2 A bwisin sɔ̃ɔsiru swɑɑ dɑkio. A kookɑri koowo yu kɑ nun yeeri.
3 A bwisi kɑsuo, kpɑ ɑ lɑɑkɑri nɑɑ ɡirɑ.
4 A ye kpuro kɑsuo nɡe sii ɡeesu, ǹ kun mɛ nɡe ɑrumɑni ye yɑ beruɑ.
5 À n kuɑ mɛ, kɑɑ tubu nɡe mɛ kɑɑ kɑ Gusunɔ nɑsiɑ, kpɑ ɑ nùn ɡiɑ.
6 Yinni Gusunɔwɑ u rɑ tɔnu bwisi wɛ̃. Wiyɑ u rɑ mɑɑ nùn yɛ̃ru kɑ lɑɑkɑri wɛ̃.
7 U rɑ tɑɑrɛ sɑriruɡibu nɑsɑrɑ wɛ̃, kpɑ u n be bɑ ɡem swĩi kɔ̃su nɡe tɛrɛru.
8 U rɑ be bɑ ku rɑ ben berusebu kɔ̃sɑ kue kɔ̃su, kpɑ u wiɡii be bɑ nùn mɛm nɔɔwɛ kpɑrɑ.
9 Nɛn bii, ɑ̀ n nɛn ɡɑri wurɑ, kɑɑ ɡem tubu. Kɑɑ n yɛ̃ ye yɑ sɑ̃ɑ dee dee. Ye kpurowɑ yɑ koo de ɑ n ɡeɑ mɔ̀.
10 Kɑɑ n bwisi mɔ, kpɑ yɛ̃ru tu nun nuku dobu wɛ̃.
11 Bwisi kɑ lɑɑkɑri yɑ koo nun kɔ̃su,
12 kpɑ yu kɑ nun ɡbɑrɑ swɑɑ kɔ̃sɑn di, kpɑ yu nun yɑrɑ ɡɑri kɔ̃siɡiin nɔmɑn di,
13 kɑ sere mɑɑ be bɑ swɑɑ ɡeɑ derin min di, bɑ swɑɑ kɔ̃sɑ swĩi.
14 Kɔ̃sɑn kobu bu rɑ bu nuku dobu wɛ̃, kpɑ bɑ n yɛ̃ɛrimɔ torɑnun sɔ̃.
15 Ben swɛɛ kɑ ben sɑnu sɑnusu ku rɑ n dɛɛre.
16 Nɡe mɛyɑ yi koo mɑɑ de ɑ kurɔ tuko dukɑ suuri wi u nun kɔkirimɔ kɑ ɡɑri dori.
17 Wi, wi u win durɔ ɡbiikoo yinɑ, u ɑrukɑwɑni duɑri ye u kɑ nùn bɔkuɑ Gusunɔn wuswɑɑɔ.
18 Mɑ win yɛnu ɡɑ ɡɔɔ dɔɔ, win swɛɛ yi kɑ nùn dɔɔ ɡɔribun wɑ̃ɑ yerɔ.
19 Tɔn durɔ wi u dɑ win mi, u ku rɑ wurɑmɛ. U ku rɑ mɑɑ wɑ̃ɑrun swɑɑ wɑ.
