ሉቃሳ 9:2-33 in Dawro

² ፆሳ ካዉቴꬃባ ኦዳናዉኔ ሃርጋንቻቱዋ ፓꬃና ማላ ኡንቱንታ ኪቴዳ።

³ ኢ ኡንቱንታ ኪቲዴ፥ «ኦጊያ ቢዴ፥ ፃምዓ ጊዲናካ፥ ዎይ ቃርጪቲያ፥ ዎይ ቁማ፥ ዎይ ሚሻ ጊዲናካ ኣያኔ ኦይቆፒቴ፤ ላዔꬂያ ማዩዋካ ኦይቆፒቴ።

⁴ ሂንቴና ኣሳይ ሃቃን ሞኮፔኔ፥ ሄዋፔ ኬሳና ጋካናው፥ ሂንቴንቱ ጌሌዳ ጎሊያን ጋሚዒቴ።

⁵ ሄ ካታማ ኣሳይ ሂንቴና ሞኬናን ኢፆፔ፥ ሄዋፔ ኬሲዴ፥ ኡንቱንቱ ሂንቴና ሞኬናን ኢፆዎ ማርካ ጊዳና ማላ፥ ሂንቴንቱ ጌዲያፔ ባና ሾጪ ዲጊዴ ቢቴ» ያጌዳ።

⁶ ኣ ካሊያዋንቱ ቢዴ፥ ቄሪ ካታማ ኡባን ሚሺራቹዋ ቃላ ኦዲዴኔ ሃርጋንቻ ፓꬂዴ ዩዬዲኖ።

⁷ ሃዒ ጋሊላ ቢታ ካቲያ ሄሮዲሴካ ሃኔዳ ዬዉዋ ሲሲዴ ያቲ ጌዳ። ጋሶቴꬃይኔካ ኢቲ ኢቲ ኣሳይ፥ «ዮሃኒሲ ሃይቁዋፔ ዴንዴዳ» ያጌ።

⁸ ሃራ ኣሳይ፥ «ኤላሲ ኬሲዴ ቤቴዳ» ያጊያ ዎዴ፥ ሃራንቱ ቃሲ፥ «ቤኒ ናባቱዋፔ ኢቱ ሃይቁዋፔ ዴንዴዳ» ያጊኖ።

⁹ ሄሮዲሴካ፥ «ታኒ ዮሃኒሳ ቆꬊያ ቃንፂሳ ዲጋዲሺን፥ ሃዋዳን ኣሳይ ሃሳዪያ ቢታኒ ኦኔ?» ያጊዴ፥ ዬሱሳ ቤዓናው ኮዬዳ።

¹⁰ ዬሱሲ ኪቶዋንቱ ሲሚዴ፥ ኡንቱንቱ ኦꬄዳዋ ኡባባ ዬሱሳው ኦዴዲኖ። ኢካ ኡንቱንታ ኣኪዴ፥ ቤቴሳይዳ ያጌቲያ ካታማ ማታን ዴዒያ ታካሳ ቤዳ።

¹¹ ኣሳይ ኢ ዴዒያሳ ኤሪዴ ካሊና፥ ኡንቱንታ ሞኪ ኣኪዴ ፆሳ ካዉቴꬃባ ኦዴዳ፤ ሃርጊያፔ ፓፃናው ቤሲያዋንታካ ፓꬄዳ።

¹² ሳዓይ ኦማርሲያ ዎዴ፥ ዬሱሳ ካሊያ ታማኔ ላዓቱ ኣኮ ዪዴ፥ «ሃ ኣሳይ ኡባይ ኑ ዩሹዋን ዴዒያ ሄራ ጊዶኔ ቄሪ ካታማቱዋ ጊዶ ቢዴ፥ ኣቂያሳኔ ቁማ ዴማና ማላ ሞዪዛ፤ ኣያው ጎፔ ኑኒ ሃዋን ኣሳይ ባይናሳን ዴዔቶ» ያጌዲኖ።

¹³ ሺን ዬሱሲ ኡንቱንታ፥ «ኣሳው ሜቴቲያባ ሂንቴንቱ ኢሚቴ» ያጌዳ። ኡንቱንቱ ዛሪዴ፥ «ኣኔ ቢዴ፥ ሃ ኡባ ኣሳው ቁማ ሻሜናን ꬋዮፔ ኑሲ ኢቼሹ ሶሉዋፔኔ ላዑ ሞሊያፔ ሃራይ ባዋ፤ ሄዋሲ ኑኒ ሃ ጮራ ኣሳው ቁማ ሻማና ማላ ኮያይ?» ያጌዲኖ።

¹⁴ ጋሱካ፥ ሄዋን ዴዒያ ኣሳይ ኢቼሹ ሻዓ ኬና ዬሱሲ ባሬና ካሊያዋንታ፥ «ኢሻታሙ ኢሻታሙ ኣሳ ጪታን ጪታን ሻኪ ሻኪ ኡቲሲቴ» ያጌዳ።

¹⁵ ኡንቱንቱካ ኢ ጎዋዳን ኡባ ኣሳካ ኡቲሴዲኖ።

¹⁶ ዬሱሲካ ኢቼሹ ሶሉዋኔ ላዑ ሞሊያ ኦይቂዴ፥ ፑዴ ሳሉዋ ቦንጎቲ ፄሊዴ ፆሳ ጋላቴዳ፤ ዱꬂዴ፥ ኣሳው ጊሻና ማላ ኣ ካሊያዋንቶ ኢሜዳ።

¹⁷ ኣሳይ ኡባይካ ሚዴ ካሌዲኖ። ኡንቱንቱፔ ኣቴዳ ዶካ፥ ታማኔ ላዑ ሳምፓ ኩሜዳዋ ዴንꬄዲኖ።

¹⁸ ኢቲ ጋላሲ ዬሱሲ ባሬካ ዎሲያ ዎዴ፥ ኣ ካሊያዋንቱካ ኣናና ኢቲፔ ዴዒሺን፥ «ኣሳይ ታና ኦና ጊኖ?» ጊዴ ኡንቱንታ ኦቼዳ።

¹⁹ ኡንቱንቱ ዛሪዴ፥ «ኣሳይ ኔና ፃማቂያ ዮሃኒሳ ያጌ፤ ሃራ ኣሳይ ቃሲ ኤላሳ ያጌ፤ ሃራይ ቃሲ ቤኒ ናባቱዋፔ ኢቱ ዴንዴዳ ያጌ» ያጌዲኖ።

²⁰ ዬሱሲ ኡንቱንታ፥ «ሂንቴሺ፥ ታና ኦና ጊቴ?» ያጌዳ። ጴፂሮሲካ ዛሪዴ፥ «ኔኒ ፆሳይ ኦኬዳ ኪሪስቶሳ» ያጌዳ።

²¹ ዬሱሲካ ኡንቱንታ፥ «ሃዋ ኦሲኔ ኦዶፒቴ» ያጊ ሚኒሲ ኣዛዚዴ፥

²² «ታኒ፥ ኣሳ ናዓይ፥ ዳሮ ሜቱዋ ኣካናው ቤሴ፤ ጪማቱዋን፥ ቄሳቱዋ ካፓቱዋኒኔ ሙሴ ሂጊያ ታማሪሲያዋንቱን ኢፄታናው ኮሼ፤ ኡንቱንቱ ታና ዎꬋናዋንታ፤ ታኒካ ሄዜንꬆ ጋላሲ ሃይቁዋፔ ዴንዳናው ቤሴ» ያጌዳ።

²³ ዬሱሲካ ኣሳ ኡባ፥ «ታና ካላናው ዶሲያዌ ዴዖፔ፥ ባሬ ሁጲያ ካዶ፤ ባሬ ማስቃሊያ ጋላሳን ጋላሳን ቶኪዴ ታና ካሎ።

²⁴ ባሬ ሼምፑዋ ኣሻናው ዶሲያዌ ኡባይ ባዪዜ፤ ሺን ታ ዲራው ባሬ ሼምፑዋ ባዪዚያዌ ኡባይ ኣሼ።

²⁵ ኢቲ ኡራይ ሃ ኣላሚያባ ኡባ ኣሺዴ ባሬ ሼምፑዋ ባዪዞፔ ዎይ ባሬው ፓጪሶፔ፥ ኣያ ማዲ?

²⁶ ኣሳይ ታናኒኔ ታቃላን ዬላቶፔ፥ ታኒ ኣሳ ናዓይ፥ ታ ቦንቹዋናኔ ጌሻ ኪታንቻቱዋ ቦንቹዋና ዪያ ዎዴ ኣኒ ዬላታናዋ።

²⁷ ታኒ ሂንቴንቶ ቱሙዋ ያጋይ፤ ሃዋን ዴዒያ ኣሳፔ፥ ፆሳ ካዉቴꬃ ቤዓና ጋካናው ሃይቁዋ ሃይቄናዋንቱ ኢቱ ኢቱ ዴዒኖ» ያጌዳ።

²⁸ ዬሱሲ ሃዋ ጎዋፔ ጉዪያን፥ ኢቲ ሳሚንታ ኬና ጋሚዒዴ፥ ጴፂሮሳኔ ዮሃኒሳ፥ ያዪቆባካ ኣኪዴ፥ ዎሳናው ዴሪያ ሁጲያ ኬሴዳ።

²⁹ ኢ ዎሲሺን፥ ኣ ዴሙዋ ማላይ ላሜቴዳ፤ ኣ ማዩካ ቦፂዴ ጶልቄዳ።

³⁰ ቆፔናን ላዑ ኣሳቱ፥ ሙሴኔ ኤላስ ኬሲ ቤቲዴ፥ ዬሱሳና ሃሳይ ዴዒኖ።

³¹ ኡንቱንቱ ቦንቹዋን ቆንጪ ቤቲዴ፥ ዬሱሲ ፆሳ ቆፋ ፖላናው ዬሩሳላሜን ሃይቃናዋ ኣናና ሃሳዬዲኖ።

³² ጴፂሮሳኔ ኣናና ኢቲፔ ዴዒያዋንታ ጌሚዒሹ ጌሮዬዳሺን፥ ኤሌካ ቤጎቲዴ ኣ ቦንቹዋኔ ኣናና ጋꬆ ኤቄዳ ላዑ ኣሳቱዋ ቤዔዲኖ።

³³ ሄ ላዑ ኣሳቱ፥ ዬሱሳ ሚዪያፔ ሻኬቲያ ዎዴ፥ ጴፂሮሲ ዬሱሳ፥ «ጎዳው፥ ሃዋን ዴዒያዌ ኑሲ ሎዓ ጊዲያ ዲራው፥ ሄዙ ዳሲያ ኢቱዋ ኔው፥ ኢቱዋ ሙሴው፥ ኢቱዋ ኤላሳው ኬፃና» ያጌዳ።

² Xoossaa kawutethaabaa odanawunne hargganchchatuwaa pathana mala unttuntta kiitteedda.

³ I unttuntta kiittiidde, “Ogiyaa biidde, xam77aa gidinakka, woy qarcciitiyaa, woy qumaa, woy miishshaa gidinakka ayaanne oyqqoppite; laa7ethiyaa mayuwaakka oyqqoppite.

⁴ Hinttena asay haqan mokkooppenne, hewaappe kesana gakkanaw, hinttenttu geleedda golliyan gami77ite.

⁵ He katamaa asay hinttena mokkennaan ixxooppe, hewaappe kesiidde, unttunttu hinttena mokkennaan ixxowoo markka gidana mala, hinttenttu gediyaappe baanaa shoci diiggiide biite” yaageedda.

⁶ A kaalliyaawanttu biide, qeeri katamaa ubbaan mishiraachchuwaa qaalaa odiiddenne hargganchchaa pathiidde yuuyyeeddino.

⁷ Ha77i Galiilaa biittaa kaatiyaa Heroodisekka haneedda yewuwaa sisiide yatti geedda. Gaasotethaynneekka itti itti asay, “Yohaannisi hayquwaappe denddeedda” yaagee.

⁸ Hara asay, “Eelaasi kesiide beetteedda” yaagiyaa wode, haranttu qassi, “Beni nabatuwaappe ittu hayquwaappe denddeedda” yaagiino.

⁹ Heroodisekka, “Taani Yohaannisa qoodhiyaa qanxxissa diggaaddishshin, hawaadan asay haasayiyaa bitani oonee?” yaagiide, Yesuusa be7anaw koyyeedda.

¹⁰ Yesuusi kiittowanttu simmiide, unttunttu ootheeddawaa ubbabaa Yesuusaw odeeddino. Ikka unttuntta akkiide, Beetesayda yaagettiyaa katamaa matan de7iyaa takkasaa beedda.

¹¹ Asay I de7iyaasaa eriide kaallina, unttuntta mokki akkiide Xoossaa kawutethaabaa odeedda; harggiyaappe paxanaw bessiyaawanttakka patheedda.

¹² Sa7ay omarssiyaa wode, Yesuusa kaalliyaa tammanne laa77atuu aakko yiide, “Ha asay ubbay nu yuushshuwaan de7iyaa heeraa giddonne qeeri katamatuwaa giddo biide, aqiyaasaanne qumaa demmana mala moyizza; ayaw gooppe nuuni hawaan asay baynnasan de7eetto” yaageeddino.

¹³ Shin Yesuusi unttuntta, “Asaw meetettiyaabaa hinttenttu immite” yaageedda. Unttunttu zaariide, “Ane biide, ha ubba asaw qumaa shammennaan dhayooppe nuussi ichcheshu soolluwaappenne laa77u moliyaappe haray baawa; hewaassi nuuni ha cora asaw qumaa shammana mala koyyay?” yaageeddino.

¹⁴ (Gaasuukka, hewaan de7iyaa asay ichcheshu sha77aa keena) Yesuusi barena kaalliyaawantta, “Ishatamu ishatamu asaa citan citan shaakki shaakki utissite” yaageedda.

¹⁵ Unttunttukka I gowaadan ubba asaakka utisseeddino.

¹⁶ Yesuusikka ichcheshu soolluwanne laa77u moliyaa oyqqiide, pude saluwaa bonggotti xeelliidde Xoossaa galateedda; duuthiide, asaw gishana mala A kaalliyaawanttoo immeedda.

¹⁷ Asay ubbaykka miide kalleeddino. Unttunttuppe atteedda dokkaa, tammanne laa77u samppaa kumeeddawaa dentheeddino.

¹⁸ Itti gallassi Yesuusi barekka woossiyaa wode, A kaalliyaawanttukka aananna ittippe de7ishshin, “Asay taana oona giinoo?” giide unttuntta oochcheedda.

¹⁹ Unttunttu zaariide, “Asay neena xammaqiyaa Yohaannisa yaagee; hara asay qassi Eelaasa yaagee; haray qassi beni nabatuwaappe ittu denddeedda yaagee” yaageeddino.

²⁰ Yesuusi unttuntta, “Hintteshi, taana oona giitee?” yaageedda. Phexiroosikka zaariide, “Neeni Xoossay okkeedda Kiristtoosa” yaageedda.

²¹ Yesuusikka unttuntta, “Hawaa oossinne odoppite” yaagi minissi azaziidde,

²² “Taani, Asaa Na7ay, daro metuwaa akkanaw bessee; cimatuwan, qeesatuwaa kaappatuwaaninne Muse higgiyaa tamaarissiyaawanttun ixettanaw koshshee; unttunttu taana wodhanawantta; taanikka heezzentho gallassi hayquwaappe denddanaw bessee” yaageedda.

²³ Yesuusikka asaa ubbaa, “Taana kaallanaw dosiyaawe de7ooppe, bare huuphiyaa kaddo; bare masqqaliyaa gallassaan gallassaan tookkiide taana kaallo.

²⁴ Bare shemppuwaa ashshanaw dosiyaawe ubbay bayizzee; shin ta diraw bare shemppuwaa bayizziyaawe ubbay ashshee.

²⁵ Itti uray ha alamiyaabaa ubbaa ashshiide bare shemppuwaa bayizzooppe woy barew pacissooppe, ayaa maaddii?

²⁶ Asay taananinne taqaalaan yeellatooppe, taani Asaa Na7ay, ta bonchchuwaannanne geeshsha kiitanchchatuwa bonchchuwanna yiyaa wode aani yeellatanawaa.

²⁷ Taani hinttenttoo tumuwaa yaagay; hawaan de7iyaa asaappe, Xoossaa kawutethaa be7ana gakkanaw hayquwaa hayqqennawanttu ittu ittu de7iino” yaageedda.

²⁸ Yesuusi hawaa goowaappe guyyiyan, itti saaminttaa keena gami77iide, Phexiroosanne Yohaannisa, Yayiqoobakka akkiide, woossanaw deriyaa huuphiyaa keseedda.

²⁹ I woossishshin, A deemuwaa malay laametteedda; A mayuukka booxxiide pholqqeedda.

³⁰ Qoppennaan laa77u asatuu, Musenne Eelaas kesi beettiide, Yesuusanna haasay de7iino.

³¹ Unttunttu bonchchuwan qoncci beettiide, Yesuusi Xoossaa qofaa polanaw Yeerusalaamen hayqqanawaa aananna haasayeeddino.

³² Phexiroosanne aananna ittippe de7iyaawantta gemi77ishuu geeroyeeddashshin, ellekka beegottiide A bonchchuwanne aananna gatho eqqeedda laa77u asatuwaa be7eeddino.

³³ He laa77u asatuu, Yesuusa miyyiyaappe shaakettiyaa wode, Phexiroosi Yesuusa, “Godaw, hawaan de7iyaawe nuussi lo77a gidiyaa diraw, heezzu daasiyaa ittuwaa new, ittuwaa Musew, ittuwaa Eelaasaw keexxana” yaageedda.