ሉቃሳ 8:3-18 in Dawro

³ ሄሮዲሳ ጎሊያን ሱንꬃ ጊዴዳ ኩዛ ማቻቲ ዮሃኖ፥ ሶሲና ጌቴቴዉናኔ ሃራ ጮራቱዋና ኢቲፔ ጊዲዴ፥ ዬሱሳኔ ኣ ካሊያዋንታ ሚሻን ማዴዲኖ።

⁴ ጮራ ኣሳይ ዳሮ ካታማቱዋፔ ሺቂዴ፥ ዬሱሳኮ ዬዳ ዎዲያን ሌሚሱዋን፥

⁵ «ዜሪያዌ ዜሬꬃ ዜራናው ኬሴዳ። ዜሪያ ዎዴ ኢቲ ኢቲ ዜሬꬃይ፥ ኦጊያ ዶናን ዎꬊዴ ዬꬌቴዳ። ያቲና ሳሉዋ ካፉ ሄዋ ሜዳ።

⁶ ሃራይ ቃይ ዛላ ቦላ ዎꬊዴ ዶሌዳ ዎዴ ኮሺያ ሃꬃ ዴሜና ዲራው ሜሌዳ።

⁷ ሃራ ዜሬꬃይ ኣጉንꬃ ጋርሳን ዎꬌዳ። ኣጉንꬃይ ኢቲፔ ዲጪዴ ሚቴዳ።

⁸ ሃራይ ሎዒያ ቱዔ ቢታን ዎꬌዳ። ዶሎዋፔ ጉዪያን፥ ዜሬቶዋፔ ፄቱ ኩሺያ ዳኩዋ ሞኬዳ» ያጌዳ። ዬሱሲ ሃዋ ሃሳዪዴ፥ «ሃይꬃይ ዴዒያ ኡባይ ሲሶ» ያጊ ቃላ ꬎቁ ኡዲዴ ዋሴዳ።

⁹ ኣ ካሊያዋንቱ፥ «ሃ ሌሚሱ ኣያ ጉሴ?» ያጊ ኣ ኦቼዲኖ።

¹⁰ ኢካ ዛሪዴ፥ «ሂንቴንቶ ፆሳ ካዉቴꬃ ፁራ ኤራይ ኢሜቴዳ፤ ሺን ሃራቶ፥ ፄሊዲካ ኤሬና ማላ፥ ሲሲዲካ ኣኬኬና ማላ ሌሚሱዋን ኦዳይ» ያጌዳ።

¹¹ ዬሱሲ፥ «ዜሬꬃ ሌሚሱ ሃዋ፡ ዜሬꬃይ ፆሳ ቃላ።

¹² ኦጊያ ጋፃን ዎꬌዳ ዜሬꬃይ፥ ጉꬃ ዎዴው ቃላ ሲሲያ ኣሳ፤ ኤሌካ ፃላሂ ዪኔ፥ ኡንቱንቱ ሲሶዋን ኣማን ኣቴና ማላኔ ቃላይ ዎዛናፔ ዶጌታና ማላ ኦꬄ።

¹³ ዛላ ቦላን ዎꬌዳ ዜሬꬃይ፥ ኮይሮ ቃላ ናሼቻን ሲሲያዋንታ። ሄዋንቱካ ጉꬃ ዎዲያ ኣማኒኔ ፓጪ ጋኪያ ዎዲያን ፃጱ ባንታ ዲራው ኤሌካ ኣማኑዋ ካዲኖ።

¹⁴ ኣጉንꬃ ጋርሳን ዎꬌዳ ዜሬꬃይ፥ ቃላ ሲሲያዋንታ፤ ሺን ዴዑዋ ሂርጋይኔ ዱሬቴꬃ ኢሻሉ ጩሌዳዋንታ። ሄዋንቱ ሎዖ ኣይፊያ ኢማናው ዳንዳዪኪኖ።

¹⁵ ሎዖ ቱዔ ቢታን ዎꬌዳ ዜሬꬃይ ቤሲያዌ፥ ሎዓኔ ፂሎ ዎዛናን ቃላ ሲሲዴ ናጊያ ኣሳኔ ሄ ቃላን ሚኒ ኤቂዴ ሎዖ ኣይፊያ ኣይፊያዋንታ።

¹⁶ «ፆምፒያ ሳꬂዴ ኢቲባን ቁምዒ ኣጊያዌ ዎይ ኣርሳፔ ጋርሳና ዎꬂያዌ ኦኒኔ ባዋ።

¹⁷ ቆንጬናን ቆሱዋን ኣቲያባይ ኢቲ ዬዉኔ ባዋ። ኤሬቴናኒኔ ቤቲያሳ ኬሴናን ኣታናባይ ኣይኔ ባዋ።

¹⁸ ሄዋ ጊዲያ ዲራው ሎይꬂ ኣኬካን ሲሲቴ። ዎዛናፔ ሲሲያዎ ኡባው ጉጂ ኣኬካይ ኢሜታና፤ ኣኬኬናዋፔ ሄ ኣው ዴዒያዋ ማላቲያ ኣኬካይካ ኣኬታናዋ» ያጌዳ።

³ Heroodisa golliyan suntha gideedda Kuuza machchatti Yohaanno, Soosina geetettewunnanne hara coratuwanna ittippe gidiide, Yesuusanne A kaalliyaawantta miishshaan maaddeeddino.

⁴ Cora asay daro katamatuwaappe shiiqiide, Yesuusakko yeedda wodiyaan leemisuwan,

⁵ “Zeriyaawe zerethaa zeranaw keseedda. Zeriyaa wode itti itti zerethay, ogiyaa doonan wodhdhiide yedhetteedda. Yatina saluwaa kafuu hewaa meedda.

⁶ Haray qay zaallaa bolla wodhdhiide doleedda wode koshshiyaa haathaa demmenna diraw meleedda.

⁷ Hara zerethay agunthaa garssan wodhdheedda. Agunthay ittippe dicciide mitteedda.

⁸ Haray lo77iyaa tu7e biittaan wodhdheedda. Dolowaappe guyyiyan, zerettowaappe xeetu kushiyaa dakkuwaa mokkeedda” yaageedda. Yesuusi hawaa haasayiidde, “Haythay de7iyaa ubbay siso” yaagi qaalaa dhoqqu udiide waasseedda.

⁹ A kaalliyaawanttu, “Ha leemisuu ayaa guussee?” yaagi A oochcheeddino.

¹⁰ Ikka zaariide, “Hinttenttoo Xoossaa kawutethaa xuuraa eray imetteedda; shin haratoo, xeelliiddikka erenna mala, sisiiddikka akeekenna mala leemisuwan oday” yaageedda.

¹¹ Yesuusi, “Zerethaa leemisuu hawaa: Zerethay Xoossaa qaalaa.

¹² Ogiyaa gaxaan wodhdheedda zerethay, guutha wodew qaalaa sisiyaa asaa; ellekka xalahii yiinne, unttunttu sisowaan amman attenna malanne qaalay wozanaappe dogettana mala oothee.

¹³ Zaallaa bollan wodhdheedda zerethay, koyro qaalaa nashechchaan sisiyaawantta. Hewanttukka guutha wodiyaa ammaninnee paacii gakkiyaa wodiyaan xaphuu bantta diraw ellekka ammanuwaa kaddiino.

¹⁴ Agunthaa garssan wodhdheedda zerethay, qaalaa sisiyaawantta; shin de7uwaa hirggaynne duretethaa ishaluu cuulleeddawantta. Hewanttu lo77o ayfiyaa immanaw danddayikkino.

¹⁵ Lo77o tu7e biittaan wodheedda zerethay bessiyaawe, lo77anne xillo wozanaan qaalaa sisiide naagiyaa asaanne he qaalaan minni eqqiide lo77o ayfiyaa ayfiyaawantta.

¹⁶ “Xomppiyaa sathiide ittibaan qum77i aggiyaawe woy arssaappe garssanna wothiyaawe ooninne baawa.

¹⁷ Qonccennaan qosuwan attiyaabay itti yewuunne baawa. Erettennaaninne beettiyaasaa kesennaan attanabay aynne baawa.

¹⁸ Hewaa gidiyaa diraw loythi akeekaan sisite. Wozanaappe sisiyaawoo ubbaw gujji akeekay imettana; akeekennawaappe he aw de7iyaawaa malatiyaa akeekaykka akettanawaa” yaageedda.