ሉቃሳ 8:2-21 in Gofa

² ቃሲ ቱና ኣያናፔኔ ዱማ ዱማ ሃርጊያፌ ፓፂዳ ኢሲ ኢሲ ማጫሳቲ ኢያራ ዴዖሶና። ኤንቲካ፥ ላፑን ቱና ኣያናቲ ኬዪዳ ማግዴላ ማይራሞ፥

³ ሄሮዲሳ ሹማ ኩዛ ማቺው ዮሃና፥ ሶሲናራኔ ቃሲ ሃራ ዳሮቲ ኤንታና ሚሼን ማዴይሳቲ ዴዖሶና።

⁴ ዳሮ ኣሳይ ዱማ ዱማ ካታማፔ ኢያኮ ሺቂን ሌሚሶን ኤንታው ኦዲስ።

⁵ «ኢሲ ጎሻንቾይ ዜሬꬂ ዜራናው ኬዪስ። ኢ ዜሪሺን ኢሲ ኢሲ ዜሬꬃይ ኦጌ ጋፃን ዎꬊዲ ዬꬌቲስ፥ ሳሎ ካፎቲ ማፂዶሶና።

⁶ ሃራቲ ሻሎይ ጋርሳን ዴዒያ ቢታ ቦላ ዎꬊዶሶና። ቡሮ ዶሊዳ ሜላ ቢታን ላሆይ ባይና ጊሾ ሚጪዶሶና።

⁷ ሃራ ዜሬꬃይ ቃሲ ኣጉንꬃ ጊዶን ዎꬊስ። ኣጉንꬃራ ዎላ ዲጪዳ ጊሾ ኣጉንꬃይ ጩሊዲ ቤሳን ኣሺስ።

⁸ ሃራቲ ሎዖ ቢታ ቦላ ዎꬊዶሶና። ዶሊዳ ዎዴ ፄቱ ኩሼ ኣይፊዶሶና።» ሄሳ ኦዲ ኦንጊዲ፥ ባ ቃላ ꬎቁ ኦꬂዲ፥ «ሲዒያ ሃይꬂ ዴዒያ ኡባይ ሲዖ» ያጊስ።

⁹ ኢያ ታማሬቲ፥ «ሃ ሌሚሱዋ ቢርሼꬃይ ኣይቤ?» ያጊዲ ኦይቺዶሶና

¹⁰ ኢ፥ «ፆሳ ካዎቴꬃ ፁራ ኤራና ሜላ ሂንቴው ኢሜቲስ። ሺን ሃራቲ ቤዒሼ ዴሞና ሜላ፥ ሲዒሼ ኣኬኮና ሜላ ሌሚሶን ኦዳይስ።

¹¹ «ሂዛ፥ ሃ ሌሚሱዋ ቢርሼꬃይ ሃይሳ፡ ዜሬꬂ ያጌቲዳይ ፆሳ ቃላ።

¹² ኦጌ ጋፃን ዎꬊዳ ዜሬꬃይ ቃላ ሲዔይሳታ። ጊዶሺን፥ ኤንቲ ኣማኒዲ ኣቶና ሜላ ፃላሄይ ቃላ ኤንታ ዎዛናፔ ማፂ ዲጌስ።

¹³ ሻሎይ ጋርሳን ዴዒያ ቢታ ቦላ ዎꬊዳ ዜሬꬃይ ቃላ ሲዒዲ ኡፋይሳን ኤኬይሳታ። ኤንቲ ሃዒስ ኣማኖሶናፔ ኣቲን ፃጶይ ባይና ጊሾ ፓጬይ ጋኪያ ዎዴ ኤሌሲዲ ካዶሶና።

¹⁴ ኣጉንꬃ ጊዶን ዜሬቲዳይሳቲ ቃላ ሲዔይሳታ። ኤንቲካ ኣላሚያ ቆፋን፥ ዱሬቴꬃኒኔ ሳዓ ዱሳ ሚኮቴꬃን ጩሌቲዲ ቤሴይሳዳ ኣይፊቦኮና።

¹⁵ ሎዖ ቢታን ዎꬊዳ ዜሬꬃይ ሎዖ ዎዛናን ቃላ ሲዒዲ ናጌይሳታኔ ዳንዳዓን ሚኒዲ ኣይፌ ኣይፌይሳታ።

¹⁶ «ፆምፔ ፆምፒዲ፥ ዳቾ ካሜይ ዎይኮ ኣርሳፌ ጋርሳን ዎꬄይ ዴና። ጌሊያ ኣሲ ቤዓና ሜላ ꬎቃ ቤሳን ዎꬄስ።

¹⁷ «ሄሳ ጊሾ፥ ቆንጬ ኬዮና ቆሴቲዲ ኣቲያባይ፥ ኤሬቶና ጌሚዲ ኣቲያባይ ዴና።

¹⁸ «ሂዛ፥ ሂንቴ ቃላ ዋቲ ሲዒያኮ ኣኬኪቴ። ዴዒያ ኡባስ ጉዤቲዲ ኢሜታና፥ ባይናይሳስ ሃሪ ኣቶሺን ኢያው ዴዒያ ጉꬂያካ ኢያፔ ኤኬታና» ያጊስ።

¹⁹ ዬሱሳ ኣዬራኔ ኢሻታራ ኢያኮ ዪዶሶና። ሺን ኣሳ ዳሮቴꬃፌ ዴንዶይሳን ኢያ ዴማናው ዳንዳዒቦኮና።

²⁰ ኢሲ ኣሲ ዬሱሳኮ፥ «ኔ ኣዬራኔ ኔ ኢሻታራ ኔና ኮዪዲ ካሬን ናጎሶና» ያጊስ።

²¹ ዬሱሲ ዛሪዲ፥ «ፆሳ ቃላ ሲዒዲ ኦሶን ፔሼይሳቲ ኡባይ ታው ኣዮኔ ታው ኢሻ» ያጊስ።

² Qassi tuna ayyaanaappenne dumma dumma harggiyafe paxida issi issi maccasati iyara de7oosona. Enttika, laappun tuna ayyaanati keyida Magdela Mayraamo,

³ Heroodisa shuumaa Kuuza machchiw Yohaanna, Soosinnaranne qassi hara daroti enttana miishen maaddeyssati de7oosona.

⁴ Daro asay dumma dumma katamaappe iyaakko shiiqin leemison enttaw odis.

⁵ “Issi goshshanchchoy zerethi zeranaw keyis. I zerishin issi issi zerethay oge gaxan wodhdhidi yedhdhettis, salo kafoti maxidosona.

⁶ Harati shaalloy garssan de7iya biitta bolla wodhdhidosona. Buroo dolida mela biittan laahoy baynna gisho miccidosona.

⁷ Hara zerethay qassi aguntha giddon wodhdhis. Agunthaara wolla diccida gisho agunthay cuullidi bessan ashshis.

⁸ Harati lo77o biitta bolla wodhdhidosona. Dolida wode xeetu kushe ayfidosona.” Hessa odi onggidi, ba qaala dhoqqu oothidi, “Si7iya haythi de7iya ubbay si7o” yaagis.

⁹ Iya tamaareti, “Ha leemisuwa birshshethay aybee?” yaagidi oychchidosona

¹⁰ I, “Xoossaa kawotethaa xuuraa erana mela hinttew imettis. Shin harati be7ishe demmonna mela, si7ishe akeekonna mela leemison odays.

¹¹ “Hiza, ha leemisuwa birshshethay hayssa: zerethi yaagettiday Xoossaa qaala.

¹² Oge gaxan wodhdhida zerethay qaala si7eyssata. Gidoshin, entti ammanidi attonna mela Xalahey qaala entta wozanaappe maxi digees.

¹³ Shaalloy garssan de7iya biitta bolla wodhdhida zerethay qaala si7idi ufayssan ekkeyssata. Entti ha77is ammanoosonappe attin xaphoy baynna gisho paacey gakkiya wode ellesidi kaddoosona.

¹⁴ Aguntha giddon zerettidayssati qaala si7eyssata. Enttika alamiya qofan, duretethaaninne sa7aa duussaa miikkotethan cuulettidi besseyssada ayfibookkona.

¹⁵ Lo77o biittan wodhdhida zerethay lo77o wozanan qaala si7idi naageyssatanne dandda7an minnidi ayfe ayfeyssata.

¹⁶ “Xomppe xomppidi, daachcho kammey woykko arssafe garssan wothey deenna. Geliya asi be7ana mela dhoqqa bessan wothees.

¹⁷ “Hessa gisho, qoncce keyonna qosettidi attiyaabay, erettonna geemmidi attiyaabay deenna.

¹⁸ “Hiza, hintte qaala waati si7iyakko akeekite. De7iya ubbaas guzhetidi imettana, baynnayssas hari attoshin iyaw de7iya guuthiyaka iyappe ekettana” yaagis.

¹⁹ Yesuusa aayeranne ishatara iyaakko yidosona. Shin asaa darotethaafe denddoyssan iya demmanaw dandda7ibookkona.

²⁰ Issi asi Yesuusakko, “Ne aayeranne ne ishatara nena koyidi karen naagoosona” yaagis.

²¹ Yesuusi zaaridi, “Xoossaa qaala si7idi ooson peeshsheyssati ubbay taw aayonne taw isha” yaagis.