ሉቃሳ 6:1-46 in Gofa

¹ ኢሲ ሳምባታ ጋላስ ዬሱሲ ጊስቴ ጋዴ ጊዶራ ኣꬌስ። ዬሱሳ ታማሬቲ ቲያ ባንጋ ዱꬂዲ ባንታ ኩሼን ሺርኪዲ ሞሶና።

² ሺን ፋሪሳዌታ ጊዶፌ ኢሶቲ ኢሶቲ፥ «ሳምባታ ጋላስ ኦꬃናው ቤሶናባ ኣይስ ኦꬄቲ?» ያጊዶሶና።

³ ዬሱሲ ኤንታኮ ዛሪዲ፥ «ዳዊቴይ ኮሻቲዳ ዎዴ ባራ ዴዔይሳታራ ኢሲፌ ኦꬆይሳ ናባቢቤኬቲ?

⁴ ፆሳ ኬꬂ ጌሊዲ ኣይሁዴ ካሂኔታ ፃላላስ ቤሲያ ዳቡዋ ሚስ፤ ባራ ዴዔይሳታስካ ኢሚስ» ያጊስ።

⁵ ቃሲ ዬሱሲ፥ «ኣሳ ናዓይ ሳምባታ ጎዳ» ያጊስ።

⁶ ሃራ ሳምባታ ጋላስ ዬሱሲ ኣይሁዴ ዎሳ ኬꬂ ጌሊዲ ታማርሴስ። ሄ ቤሳን ኡሻቻ ኩሼይ ጉንዲዳ ኢሲ ኣሲ ዴዔስ።

⁷ ሂጌ ኣስታማሬቲኔ ፋሪሳዌቲ ኢያ ሞታናው ጋሶ ኮዪዲ ሳምባታ ጋላስ ፓꬂኮ ቤዓና ጊዲ ናጎሶና።

⁸ ሺን ዬሱሲ ኤንታ ቆፋ ኤሪዲ ኩሼይ ጉንዲዳ ኡራኮ፥ «ዴንዳዳ ኣሳ ጊዱዋን ኤቃ» ያጊስ። ኡራይካ ዴንዲ ኤቂስ።

⁹ ዬሱሲ፥ «ኣኔ ታ ሂንቴና ኢሲባ ኦይቻይስ፤ ሳምባታ ጋላስ ኦꬃናው ቤሴይ ሎዖባዬዬ ኢታባዬ? ሼምፖ ኣሾዬ ዎይኮ ꬋይሶ?» ያጊስ።

¹⁰ ቃሲ ዬሱሲ ኢያ ዩሹዋን ዴዒያ ኣሳ ዩሺ ፄሊዲ ኡራኮ፥ «ኔ ኩሺያ ፒዲ ኦꬃ» ያጊስ። ኡራይካ ኢ ጊዳይሳዳ ኦꬂን ኩሼይ ፓፂስ።

¹¹ ሺን ሂጌ ኣስታማሬቲኔ ፋሪሳዌቲ ዳሮ ዪሎቲዶሶና። ዬሱሳ ቦላ ኣይ ኦꬂኖ ጊዲ ባንታ ጊዶን ማቄቲዶሶና።

¹² ሄ ዎዴ ጋላሳታፔ ኢሱዋን ዬሱሲ ዎሳናው ዴሪያ ቦላ ኬዪስ። ቃማ ኩሜꬃ ፆሳ ዎሲሼ ኣቂስ።

¹³ ዎንቴꬄ ባ ታማሬታ ፄጊዲ ኤንታ ጊዶፌ ታማኔ ናምዓታ ዶሪዲ፥ ኤንታና፥ «ሃዋሬታ» ጊዲ ሱንꬂስ።

¹⁴ ኤንቲካ፥ ጴፂሮሳ ጊዲ ሱንꬂዳ ሲሞና፥ ኢያ ኢሻ ኢንዲሪያሳ፥ ያይቆባ፥ ዮሃኒሳ፥ ፊልጶሳ፥ ባርቶሎሚዮሳ፥

¹⁵ ማቶሳ፥ ቶማሳ፥ ኢልፊዮሳ ናዓ ያይቆባ፥ ባ ቢታስ ሚሼቲያ ሲሞና፥

¹⁶ ያይቆባ ናዓ ዪሁዳኔ ዬሱሳ ኣꬂ ኢሚዳ ኣስቆሮታ ዪሁዳ።

¹⁷ ዬሱሲ ኤንታራ ኢሲፌ ዴሪያፔ ዎꬊዲ ዴንባ ቤሳን ኤቂስ። ኢያ ታማሬታፔ ዳሮቲ ሄ ቤሳን ዴዖሶና ዪሁዳ ቢታ ኡባፌ ዬሩሳላሜፔ፥ ፂሮሳፔኔ ሲዶና ኣባ ጋፃፔ ዪዳ ዳሮ ኣሳይ ዴዔስ።

¹⁸ ኤንቲ ዪዳይ ኢ ታማርሲያባ ሲዓናዉኔ ባንታ ሃርጊያፌ ፓፃናሳ። ቱና ኣያናን ዋዬቲያ ኣሳቲካ ፓፂዶሶና።

¹⁹ ዎልቃይ ኢያፔ ኬዪዲ ኣሳ ኡባ ፓꬂያ ጊሾ ኣሳይ ኢያ ቦቻናው ኮዮሶና።

²⁰ ባ ታማሬታኮ ፄሊዲ ሃይሳዳ ያጊስ፡ «ሂንቴኖ፥ ማንቆቶ፥ ሂንቴ ኣንጄቲዳይሳታ፤ ፆሳ ካዎቴꬃይ ሂንቴሳ።

²¹ ሂንቴ ሃዒ ኮሻቴይሳቲ ኣንጄቲዳይሳታ፥ ሂንቴ ካላና። ሂንቴ ሃዒ ዬኬይሳቲ ኣንጄቲዳይሳታ ሂንቴ ሚጫና።

²² ኣሳይ ሂንቴና ኣሳ ናዓ ጊሾ ኢፂያ ዎዴ ሂንቴና ሂሊያ ዎዴ ሂንቴና ኤንቲ ቶቺያ ዎዴኔ፥ ኢታ ሱንꬂ ኤንቲ ሂንቴው ኢሚያ ዎዴ ሂንቴ ኣንጄቲዳይሳታ።

²³ «ሄኮ፥ ሂንቴ ዎይቶይ ሳሎን ጊታ ጊዲያ ጊሾ ሄ ዎዴ ኡፋይሳን ጉፒቴ። ኣይስ ጊኮ፥ ቤኒ ኤንታ ኣዋቲ ናቤታ ቦላ ሄሳዳ ኦꬂዶሶና።»

²⁴ «ሺን ዱሬቶ ሂንቴና ኣዬ፤ ሂንቴ ሃዒ ሎዖ ዱሳ ኤኪዴታ።

²⁵ ሃዒ ካሊዳይሳቶ ሂንቴና ኣዬ፤ ሂንቴ ኮሻታና። ሃዒ ሚጬይሳቶ ሂንቴኖሾ ሂንቴ ካዮታናኔ ዬካና።

²⁶ ኣሲ ኡባይ ሂንቴ ሎዖቴꬃ ፃላላ ኦዲያ ዎዴ ሂንቴና ኣዬ። ኤንታ ኣዋቲ ቤኒ ዎርዳንቾ ናቤታ ቦላ ሄሳዳ ኦꬂዶሶና።

²⁷ «ሺን ታና ሲዒያ ሂንቴስ ታ ኦዳይስ፤ ሂንቴ ሞርኬታ ሲቂቴ፤ ሂንቴና ኢፄይሳታስ ሎዖባ ኦꬂቴ።

²⁸ ሂንቴና ቃንጌይሳታ ኣንጂቴ፥ ሂንቴና ናቄይሳታስ ዎሲቴ።

²⁹ ኢሲ ባጋ ሻካላ ባቄይሳስ ሃንኮ ባጋካ ቤሳ። ኔ ላፃና ኤካና ጌይሳስ ኔ ሻሚዚያካ ጉጃዳ ኢማ።

³⁰ ኔና ዎሲያ ኡባስ ኢማ፤ ኔፔ ኤኪዳ ኦናካ ዛሮ ጋዳ ኦይቾፋ።

³¹ ኣሳይ ሂንቴው ኦꬃና ሜላ ሂንቴ ኮያባ ኡባ ሂንቴካ ኣሳስ ኦꬂቴ።

³² «ሂንቴ ሂንቴና ዶሲያ ኣሳታ ፃላላ ዶሲኮ፥ ኣይ ጋላቲ ሂንቴው ዴዒ? ሃሪ ኣቶሺን፥ ናጋራንቾቲካ ባንታና ሲቄይሳታ ሲቆሶና።

³³ ሂንቴው ሎዖባ ኦꬄይሳታ ፃላላስ ሎዖባ ኦꬂኮ ሂንቴው ኣይ ጋላቲ ዴዒ? ናጋራንቾቲካ ሄሳዳ ኦꬆሶና።

³⁴ ታልዔ ዛራና ኣሳ ፃላላስ ሂንቴ ታልዒኮ ኣይ ዱማ ጋላቴቴቲ? ናጋራንቾቲካ ጉዬ ዛራና ኣሲ ቤዒዲ ታልዖሶና።»

³⁵ «ሺን ሂንቴ ሞርኬታ ሲቂቴ፤ ኤንታው ሎዖባ ኦꬂቴ። ጉዬ ኤካናው ቆፖና ታልዒቴ። ሄሳን ሂንቴ ኤካና ዎይቶይ ጊታ ጊዳና። ሂንቴ ኡባፌ ቦላ ፆሳ ናይታ ጊዳና። ኢ ባና ጋላቶናይሳታሲኔ ኢታታስ ኬሃ።

³⁶ ሂንቴ ኣዋይ ኬሃ ጊዶይሳዳ ሂንቴካ ኬሃ ጊዲቴ።

³⁷ «ኣሳ ቦላ ፒርዶፊቴ፤ ሂንቴ ቦላ ፒርዴቴና። ሂንቴ ቦሬቶና ሜላ ኦናካ ቦሮፒቴ። ኣቶ ጊቴ፤ ፆሳይ ሂንቴው ኣቶ ጋና።

³⁸ ኢሚቴ፤ ሂንቴው ኢሜታና። ሂንቴ ማኪዳባን ሂንቴው ዛሪ ማኬታና፥ ኡባራካ ሎዖ ማኪያባን ባቂዲ፥ ሱዲ ኩንꬂዲ፥ ላሌታና ጋካናው ሂንቴው ማኬቲ ኢሜታና» ያጊስ።

³⁹ ቃሲካ ዬሱሲ ያጊዲ ኤንታው ሌሚሶ ኦዲስ፤ «ቆቄይ ቆቄ ካሌꬃናው ዳንዳዒ? ካሌꬂኮ ናምዓይካ ዎሊ ኤኪዲ ኣፎን ዉሎኮናዬ?

⁴⁰ ታማሬይ ኣስታማሬፔ ኣꬌና። ሺን ሎይꬂ ታማሪዳ ኡራይ ባ ኣስታማሪያꬆ ሃኔስ።

⁴¹ «ኔ ኢሻ ኣይፊያን ዴዒያ ቡሪያ ኣይስ ቤዓይ? ኔ ኣይፊያን ዴዒያ ቱሲ ዳኔይሳ ኣይስ ቤዒኪ?

⁴² ኔ ኣይፊያን ዴዒያ ቱሲ ዳኔይሳ ቤዖና ኔ ኢሻኮ፥ ‹ታ ኢሻው ኔ ኣይፊያን ዴዒያ ቡሪያ ኬሶ› ጋናው ዋና ዳንዳዓይ? ኔኖ ጩቡዋው፥ ኮይሮታዳ ኔ ኣይፊያን ዴዒያ ቱሲ ዳኔይሳ ኬሳ። ሄሳፌ ጉዬ፥ ኔ ኢሻ ኣይፊያን ዴዒያ ቡሪያ ኬሳናው ጌሻዳ ፄላና።

⁴³ «ሎዖ ሚꬂ ኢታ ኣይፌ ኣይፌና፤ ሄሳዳካ ኢታ ሚꬂ ሎዖ ኣይፌ ኣይፌና።

⁴⁴ ኣይፌ ኣይፊያ ሚꬂ ኡባይ ባ ኣይፊያን ኤሬቴስ። ኣጉንꬃፌ ባላሴ ሚꬃ ኣይፌይ ማፄቴና ቃሲ ላዴፔ ዎይኔ ኣይፌይ ማፄቴና።

⁴⁵ ሎዖ ኣሲ ባ ዎዛናን ኩሚዳ ሎዖባፔ ሎዖባ ኬሴስ። ኢታ ኣሲ ባ ዎዛናን ኩሚዳ ኢታባፔ ኢታባ ኬሴስ። ኣሲ ባ ዎዛናን ኩሚዲ ፓላሂዳባፔ ባ ዶናን ሃሳዬስ።

⁴⁶ «ታ ጌይሳ ኦꬄኬታ፥ ሺን ያቲን ኣይስ ታና፥ ‹ጎዳው፥ ጎዳው፥ ጌቲ?›

¹ Issi Sambbaata gallas Yesuusi gistte gade giddora aadhdhees. Yesuusa tamaareti tiya bangga duuthidi bantta kushen shirkkidi moosona.

² Shin Farisaaweta giddofe issoti issoti, “Sambbaata gallas oothanaw bessonnabaa ays ootheetii?” yaagidosona.

³ Yesuusi enttako zaaridi, “Dawitey koshattida wode baara de7eyssatara issife oothoyssa nabbabibeekketii?

⁴ Xoossa Keethi gelidi Ayhude kahineta xalaalas bessiya daabbuwa mis; baara de7eyssataskka immis” yaagis.

⁵ Qassi Yesuusi, “Asa Na7ay Sambbaata Goda” yaagis.

⁶ Hara Sambbaata gallas Yesuusi Ayhude Woosa Keethi gelidi tamaarssees. He bessan ushachcha kushey gunddida issi asi de7ees.

⁷ Higge asttamaaretinne Farisaaweti iya mootanaw gaaso koyidi Sambbaata gallas pathiko be7ana gidi naagoosona.

⁸ Shin Yesuusi entta qofaa eridi kushey gunddida uraakko, “Denddada asaa gidduwan eqqa” yaagis. Uraykka denddi eqqis.

⁹ Yesuusi, “Ane ta hinttena issibaa oychchays; Sambbaata gallas oothanaw bessey lo77obayeyye iitabaye? Shemppo ashoyye woykko dhaysso?” yaagis.

¹⁰ Qassi Yesuusi iya yuushuwan de7iya asaa yuushshi xeellidi uraakko, “Ne kushiya piddi ootha” yaagis. Uraykka I gidayssada oothin kushey paxis.

¹¹ Shin higge asttamaaretinne Farisaaweti daro yilotidosona. Yesuusa bolla ay oothinoo gidi bantta giddon maqettidosona.

¹² He wode gallasatappe issuwan Yesuusi woossanaw deriya bolla keyis. Qamma kumethaa Xoossaa woossishe aqis.

¹³ Wonttethe ba tamaareta xeegidi entta giddofe tammanne nam77ata dooridi, enttana, “Hawaareta” gidi sunthis.

¹⁴ Enttika, Phexiroosa gidi sunthida Simoona, iya ishaa Inddiriyasa, Yayqooba, Yohaannisa, Filphoosa, Bartolomiyoosa,

¹⁵ Maatoosa, Toomasa, Ilfiyoosa na7aa Yayqooba, ba biittaas mishettiya Simoona,

¹⁶ Yayqooba na7aa Yihudanne Yesuusa aathi immida Asqoroota Yihuda.

¹⁷ Yesuusi enttara issife deriyappe wodhdhidi denbba bessan eqqis. Iya tamaaretappe daroti he bessan de7oosona Yihuda biitta ubbaafe Yerusalaameppe, Xiroosappenne Sidoona abbaa gaxappe yida daro asay de7ees.

¹⁸ Entti yiday I tamaarssiyabaa si7anawunne bantta harggiyafe paxanaassa. Tuna ayyaanan waayettiya asatikka paxidosona.

¹⁹ Wolqqay iyappe keyidi asa ubbaa pathiya gisho asay iya bochchanaw koyoosona.

²⁰ Ba tamaaretakko xeellidi hayssada yaagis: “Hinttenoo, manqoto, hintte anjjettidayssata; Xoossaa kawotethay hinttessa.

²¹ Hintte ha77i koshatteyssati anjjettidayssata, hintte kallana. Hintte ha77i yeekkeyssati anjjettidayssata hintte miicana.

²² Asay hinttena Asa Na7aa gisho ixxiya wode hinttena hiliya wode hinttena entti toochchiya wodenne, iita sunthi entti hinttew immiya wode hintte anjjettidayssata.

²³ “Hekko, hintte woytoy salon gita gidiya gisho he wode ufayssan guppite. Ays giikko, beni entta aawati nabeta bolla hessada oothidosona.”

²⁴ “Shin dureto hinttena ayye; hintte ha77i lo77o duussaa ekkideta.

²⁵ Ha77i kallidayssato hinttena ayye; hintte koshattana. Ha77i miiceyssato hinttenoshsho hintte kayottananne yeekkana.

²⁶ Asi ubbay hintte lo77otethaa xalaala odiya wode hinttena ayye. Entta aawati beni worddanchcho nabeta bolla hessada oothidosona.

²⁷ “Shin tana si7iya hinttes ta odays; hintte morkketa siiqite; hinttena ixxeyssatas lo77obaa oothite.

²⁸ Hinttena qanggeyssata anjjite, hinttena naaqqeyssatas woossite.

²⁹ Issi bagga shakalaa baqqeyssas hankko baggaaka bessa. Ne laxana ekkana geyssas ne shaamiziyakka gujjada imma.

³⁰ Nena woossiya ubbaas imma; neeppe ekkida oonakka zaaro gada oychchofa.

³¹ Asay hinttew oothana mela hintte koyabaa ubbaa hintteka asaas oothite.

³² “Hintte hinttena dosiya asata xalaala dosikko, ay galati hinttew de7ii? Hari attoshin, nagaranchchotikka banttana siiqeyssata siiqoosona.

³³ Hinttew lo77obaa ootheyssata xalaalas lo77obaa oothiko hinttew ay galati de7ii? Nagaranchchotikka hessada oothoosona.

³⁴ Tal77e zaarana asa xalaalas hintte tal77iko ay dumma galatetteetii? Nagaranchchotikka guye zaarana asi be7idi tal77osona.”

³⁵ “Shin hintte morkketa siiqite; enttaw lo77obaa oothite. Guye ekkanaw qopponna tal77ite. Hessan hintte ekkana woytoy gita gidana. Hintte Ubbaafe Bolla Xoossaa nayta gidana. I bana galatonnayssatasinne iitatas keeha.

³⁶ Hintte aaway keeha gidoyssada hintteka keeha gidite.

³⁷ “Asa bolla pirddofite; hintte bolla pirddettenna. Hintte borettonna mela oonakka boroppite. Atto giite; Xoossay hinttew atto gaana.

³⁸ Immite; hinttew imettana. Hintte makkidaban hinttew zaari makettana, ubbarakka lo77o makkiyaban baqqidi, suuddi kunthidi, laalettana gakkanaw hinttew maketi imettana” yaagis.

³⁹ Qassika Yesuusi yaagidi enttaw leemiso odis; “Qooqey qooqe kaalethanaw dandda7ii? Kaalethiko nam77ayka woli ekkidi aafon wullokonayye?

⁴⁰ Tamaarey asttamaareppe aadhdhenna. Shin loythi tamaarida uray ba asttamaariyatho hanees.

⁴¹ “Ne ishaa ayfiyaan de7iya buuriya ays be7ay? Ne ayfiyaan de7iya tuussi daaneyssa ays be7ikki?

⁴² Ne ayfiyaan de7iya tuussi daaneyssa be7onna ne ishaakko, ‘Ta ishaw ne ayfiyaan de7iya buuriya kesso’ gaanaw waana dandda7ay? Neno cubbuwaw, koyrottada ne ayfiyaan de7iya tuussi daaneyssa kessa. Hessafe guye, ne ishaa ayfiyaan de7iya buuriya kessanaw geeshshada xeellana.

⁴³ “Lo77o mithi iita ayfe ayfenna; hessadakka iita mithi lo77o ayfe ayfena.

⁴⁴ Ayfe ayfiyaa mithi ubbay ba ayfiyaan erettees. Agunthafe balase mitha ayfey maxettenna qassi laadeppe woyne ayfey maxettenna.

⁴⁵ Lo77o asi ba wozanan kumida lo77obaappe lo77obaa kessees. Iita asi ba wozanan kumida iitabaappe iitabaa kessees. Asi ba wozanan kumidi palahidabaappe ba doonan haasayees.

⁴⁶ “Ta geyssa ootheketa, shin yaatin ays tana, ‘Godaw, Godaw, geeti?’