ሉቃሳ 4:25-40 in Dawro

²⁵ «ዬዉዋን ቃሲ ቱሙዋ ኦዳይ፡ ኤላሳ ዎዲያን ሄዙ ላይꬃኔ ኡሱፑን ኣጌና ኢራይ ቡኬናን ኢፂና ሳዓ ኡባን ዎልቃማ ኮሻይ ጌሌዳ ዎዴ፥ ኢስራዔሌን ጮራ ኣምዓቱ ዴዒኖ።

²⁶ ኤላሲካ ሲዶና ጋዲያን ዴዒያ ሴራፍታ ሄራ ኢቲ ኣምዓቲኮ ኪቴቴዳፔ ኣቲን ኦኮኔ ኪቴቲ ቤና።

²⁷ ናቢያ ኤልሳዓ ዎዲያንካ ኢስራዔሊያን ጮራ ኦሉዋ ሃርጊያን ኦይቄቴዳዋንቱ ዴዒኖ፤ ሶሪያ ቢታን ዴዒያ ኒዒማኔፔ ኣቲን ኡንቱንቱፔ ኦኒኔ ፓፂ ቤና» ያጌዳ።

²⁸ ኣዪሁዳቱዋ ዎሳ ጎሊያን ዴዒያዋንቱ ኡባቱ ሃዋ ሲሲዴ ዳሪሲዴ ሃንቄቴዲኖ።

²⁹ ኡንቱንቱ ዴንዲዴ ዬሱሳ ካታማፔ ጋፃ ኬሲዴ ዱጌ ኦላናው ካታማይ ኬፄቴዳ ዴሪያ ሁጲያ ኣፌዲኖ።

³⁰ ሺን ዬሱሲ ኡንቱንቱ ጊዱዋና ኣꬊዴ ቤዳ።

³¹ ሄዋፔ ጉዪያን ዬሱሲ ጋሊላ ጋዲያን ዴዒያ ቂፊሪናሆማ ካታማ ቤዳ። ሳምባታ ጋላሳንካ ኣሳ ታማሪሴዳ።

³² ኢ ታማሪሲያ ቲሚርቲ ማታን ጊዲያ ዲራው ሲሴዳ ኣሳይ ኡባይ ማላሌቴዲኖ።

³³ ኣዪሁዳቱዋ ዎሳ ጎሊያን ኢታ ኣያናይ ኦይቄዳ ቢታኒ ዴዔ፤ ባሬ ኮሻ ꬎቁ ኡዲ ዋሲዴ፥

³⁴ «ሃያ ጎዶ ኣጋሪኪ ናዚሬቲያ ዬሱሳ፤ ኑሲ ኔናና ኣይ ኢቲፔቴꬃይ ዴዒ? ኑና ባዪዛናው ያዲ? ኔኒ ኦኔንቶ ኤራዲ፤ ኔኒ ፆሳ ኣዉ ኪቴዳ ጌሻ ጊዲኪ!» ያጌዳ።

³⁵ ዬሱሲካ፥ «ጮዑ ጋ፥ ኣፔካ ኬሳ» ያጊ ሴሬዳ። ኢታ ኣያናይ ቢታኒያ ኡንቱንቱ ጊዱዋን ኩንዲሲዴ ኣይኔ ቆሄናን ኣፔ ኬሴዳ።

³⁶ ኣሳይ ኡባይ ማላሌቲዴ ኢቱ ኢቶ፥ «ሃዌ ኣያ ቃሌ? ባሬው ዴዒያ ማታኒኔ ዎልቃን ኢታ ኣያናቱዋ ሴሬ፤ ቃሲ ኢታ ኣያናይካ ኬሴ» ያጊዴ ሃሳዬዲኖ።

³⁷ ኣ ዋሪካ ሄ ዩሹዋን ዴዒያ ጋዲያ ኡባ ጋኬዳ።

³⁸ ዬሱሲ ኣዪሁዳቱዋ ዎሳ ጎሊያፔ ዴንዲዴ ሲሞና ጎሊያ ጌሌዳ፥ ሲሞና ቦሎታታ ዎልቃማ ቆፁዋ ሃርጊያን ሃርጌታዴ ጊሴዳዉኒው ዬሱሲ ኢዞ ፓꬃናዳን ኣሳይ ኣ ዎሴዳ።

³⁹ ኢ ማታን ኤቂዴ ቆፁዋ ሃርጊያ ሴሪና፥ ሃርጊ ዬዲሼዳ፤ ሄዎዲያንካ ዴንዳዴ ኡንቱንቶ ኪቴታዱ።

⁴⁰ ኣዋይ ዉሎ ዎዲያን ዱማ ዱማ ሃርጊያን ኦይቄቴዳ ሃርጋንቻቱዋ ኡባ ኣኮ ኣሄዲኖ፤ ኢካ ኢቱዋ ኢቱዋ ቦላ ባሬ ኩሺያ ዎꬂዴ ፓꬄዳ።

²⁵ “Yewuwaan qassi tumuwaa oday: Eelaasa wodiyaan heezzu laythanne usuppun agenaa iray bukkennaan ixxina sa7aa ubbaan wolqqaama koshay geleedda wode, Israa7eelen cora am77atuu de7iino.

²⁶ Eelaasikka Sidoonaa gadiyaan de7iyaa Seraafta heeraa itti am77attikko kiitetteeddappe attin ookkonne kiitetti beenna.

²⁷ Nabiyaa Elssaa7a wodiyankka Israa7eeliyaan cora oolluwaa harggiyan oyqetteeddawanttu de7iino; Sooriyaa biittaan de7iyaa Ni7imaaneppe attin unttunttuppe ooninne paxi beenna” yaageedda.

²⁸ Ayihudatuwaa woosa golliyan de7iyaawanttu ubbatuu hawaa sisiide darissiide hanqqetteeddino.

²⁹ Unttunttu denddiide Yesuusa katamaappe gaxaa kessiide duge olanaw katamay keexetteedda deriyaa huuphiyaa afeeddino.

³⁰ Shin Yesuusi unttunttu gidduwanna aadhdhiide beedda.

³¹ Hewaappe guyyiyaan Yesuusi Galiilaa gadiyaan de7iyaa Qifirinaahooma katamaa beedda. Sambbata gallassaankka asaa tamaarisseedda.

³² I tamaarissiyaa timirttii maataan gidiyaa diraw siseedda asay ubbay maalaletteeddino.

³³ Ayihudatuwaa woosa golliyan iita ayyaanay oyqqeedda bitani de7ee; bare kooshshaa dhoqqu udi waassiide,

³⁴ “Hayya godo aggaarikki Naazireetiyaa Yesuusa; nuussi neenanna ay ittippetethay de7ii? Nuuna bayizzanaw yaaddi? Neeni oonentto eraaddi; Neeni Xoossaa Aawuu kiitteedda geeshshaa gidikkii!” yaageedda.

³⁵ Yesuusikka, “Co77u ga, aappekka kesa” yaagi seereedda. Iita ayyaanay bitaniyaa unttunttu gidduwan kunddissiide aynne qohennaan aappe keseedda.

³⁶ Asay ubbay maalalettiide ittu ittoo, “Hawe ayaa qaalee? Barew de7iyaa maataaninne wolqqaan iita ayyaanatuwaa seeree; qassi iita ayyaanaykka kesee” yaagiidde haasayeeddino.

³⁷ A waariikka he yuushshuwaan de7iyaa gadiyaa ubbaa gakkeedda.

³⁸ Yesuusi Ayihudatuwaa woosa golliyappe denddiide Simoona golliyaa geleedda, Simoona bollotatta wolqqaama qoxuwaa harggiyan harggettaade giseeddawunniw Yesuusi izo pathanaadan asay A woosseedda.

³⁹ I matan eqqiide qoxuwaa harggiyaa seerina, harggii yeddiisheedda; hewodiyankka denddaade unttunttoo kiitettaaddu.

⁴⁰ Away wullo wodiyaan dumma dumma harggiyan oyqetteedda harganchchatuwa ubbaa aakko aheeddino; ikka ittuwa ittuwa bolla bare kushiyaa wothiide patheedda.