ሉቃሳ 23:3-42 in Gofa

³ ጲላፆሲ ዬሱሳ፥ «ኔኒ ኣይሁዴታ ካዎዬ?» ያጊዲ ኦይቺስ። ዬሱሲ፥ «ኤ፥ ኔ ጊዳይሳ ሜላ» ያጊስ።

⁴ ጲላፆሲ ካሂኔ ሃላቃታኮኔ ኣሳኮ፥ «ሃ ኡራ ቦላ ታኒ ኢሲ ባላካ ዴማቢኬ» ያጊስ።

⁵ ሺን ኤንቲ፥ «ሃ ኡራይ ጋሊላፔ ዶሚዲ ሃይሳ ጋካናው ዪሁዳ ኩሜꬃ ኢታባስ ዴንꬄꬄስ» ያጊዲ ሚንꬂ ኦዲዶሶና።

⁶ ጲላፆሲ ሄሳ ሲዒዳ ዎዴ ዬሱሲ ጋሊላ ኣሴኮ ኤራናው ኮዪዲ ኢያ ኦይቺስ።

⁷ ዬሱሲ ሄሮዲሳ ቢታፌ ዪዳ ኣሲ ጊዴይሳ ጲላፆሲ ኤሪዳ ዎዴ ሄሮዲሲ ሄ ዎዴ ዬሩሳላሜን ዴዒያ ጊሾ ኢያኮ ዬዲስ።

⁸ ሄሮዲሲ ዬሱሳ ቤዓናው ዳሮ ዎዴፔ ኮዪሼ ዴዒያ ጊሾ ኢያ ቤዒዳ ዎዴ ዳሮ ኡፋይቲስ። ኣይስ ጊኮ፥ ኢያባ ሲዒዳ ጊሾ ማላሊሲያባ ኦꬂን ቤዓናው ኣሞቲሼ ዴዔስ።

⁹ ሄሮዲሲ ዬሱሳ ዳሮ ኦይሾታ ኦይቺስ፥ ሺን ኢ ኣይኮካ ዛሪቤና።

¹⁰ ካሂኔታ ሃላቃቲኔ ሂጌ ኣስታማሬቲ ያን ኤቂዲ ሚንꬂዲ ኢያ ሞቶሶና።

¹¹ ሄሮዲሳራኔ ኢያ ዎታዳሬታራ ዬሱሳ ካꬊዶሶናኔ ሌቂሲዶሶና። ቦንቾ ኣፊላ ማይዚዲ ጲላፆሳኮ ዛሪዲ ዬዲዶሶና።

¹² ሄሮዲሳራኔ ጲላፆሳራ ካሴ ሞርኬሺን ሄ ጋላስ ዎላ ጊጊዶሶና።

¹³ ጲላፆሲ ካሂኔ ሃላቃታ፥ ኣሳ ሃሬይሳታኔ ኣሳ ፄጊዲ፥

¹⁴ « ‹ሃ ኡራይ ኣሳ ጌላቴꬃስ ዴንꬄꬄስ› ጊዲ ታኮ ኤሂዴታ። ታካ ሂንቴ ሲንꬃን ፒልጋዳ ሂንቴ ሺሺዳ ሞቱዋስ ኣይቢ ባላካ ዴማቢኬ።

¹⁵ ሄሮዲሲ፥ ሄሳꬆ ኣይቢ ባላካ ኢያ ቦላ ዴሚቦና ጊሾ ኑኮ ዬዲስ። ቱማካ ሃ ኡራይ ሃይቆስ ጋꬂያ ኣይቢ ባላካ ኦꬂቤና።

¹⁶ ሄሳ ጊሾ፥ ኢያ ጋራፋዳ ቢላ ዬዳና» ያጊስ።

¹⁷ ሄሳ ኢ ጊዳይ ፋሲካ ባሌ ዎዴ ኢሲ ኣሲ ኤንታው ቢላናይሲ ኢያው ኣቶናባ ጊዲያ ጊሾሳ።

¹⁸ ዴሬይ ኡባይ ኢሲ ቦላ፥ «ሃ ኡራ ጌዴ ዲጋ፥ ኑስ ባርባና ቢላ» ያጊዲ ዋሲዶሶና።

¹⁹ ባርባኒ ካታማ ጊዶን ኣሳ ኢታባስ ዴንꬄꬂዲ ኣሴ ዎꬊዲ ቃሼቲዳ ኣሲ።

²⁰ ጲላፆሲ ዬሱሳ ቢላናው ኮዪዲ ኣሳስ ዛሪ ኦዲስ።

²¹ ጊዶሺን፥ ኣሳይ፥ «ካቃ! ካቃ!» ያጊዲ ዋሲዶሶና።

²² ጲላፆሲ ሄꬓንꬆ፥ «ሃ ኡራይ ቆሂዳባይ ኣይቤ? ዎꬎስ ጋꬂያ ባላ ታ ዴማቢኬ። ሄሳ ጊሾ፥ ጋራፋዳ ዬዳ ኣጋና» ያጊስ።

²³ ኤንቲ ባንታ ቃላ ꬎቁ ኦꬂዲ፥ «ካቄታናው ቤሴስ» ጊዲ ሚንꬂ ዋሲዶሶና። ኤንታ ዋሶይካ ፆኒስ።

²⁴ ኤንታ ኦይሻ ጊሾ ጊዲ ጲላፆሲ ኢያ ቦላ ፒርዲስ።

²⁵ ኣሳ ኢታባስ ዴንꬄꬄይሳኔ ኣሴ ዎꬊዲ ቃሼቲዳይሳ ቢላና ሜላ ዎሲዳ፥ ሄ ኡራ ኤንታው ቢሊስ። ሺን ዬሱሳ ኤንቲ ኮዪዳባ ኦꬃና ሜላ ኤንታው ኣꬂ ኢሚስ።

²⁶ ዬሱሳ ኦይኪዲ ኤፊሺን ሲሞና ጊያ ቄሬና ቢታ ኣዴይ ጋፃሬፔ ዪሺን፥ ዴሚዲ ማስቃሊያ ቶሲዲ ዬሱሳ ካሊዲ ባና ሜላ ኡንዔꬂዶሶና።

²⁷ ዳሮ ኣሳይኔ ባንታ ቲራ ኢጪሼ ዬኪያ ማጫሳቲ ኢያ ጉዪያራ ካሎሶና።

²⁸ ሺን ዬሱሲ ኤንታኮ ጉዬ ሲሚዲ፥ «ሂንቴኖ፥ ዬሩሳላሜ ማጫሳቶ፥ ሂንቴ ሁዔሲኔ ሂንቴ ናይታስ ዬኪቴፔ ኣቲን ታው ዬኮፊቴ።

²⁹ ‹ሄኮ ማይንꬃቲ፥ ዬሎና ኡሎቲኔ ꬋንꬆና ꬋንꬃቲ ኣንጄቲዶሶና› ሂንቴ ያጋና ጋላሳይ ያና።

³⁰ ሄ ዎዴ ዴሬታ፥ ‹ኑ ቦላ ኩንዲቴ›፥ ዙማታካ፥ ‹ኑና ካሚቴ› ያጋና።

³¹ ሂዛ፥ ቃዬ ሚꬃ ሄሳꬆ ኦꬂኮ ሜላ ሚꬃ ዋታንዴሻ?» ያጊስ።

³² ኢያራ ዎꬋናው ሃራ ናምዑ ዎራንꬖታ ኤፊዶሶና።

³³ ቄራኒዮ ጌቴቲያ ቤሳ ጋꬂዲ ካቂዶሶና። ዎራንꬖታፔ ኢሱዋ ኡሻቻ ባጋራ ሃንኩዋ ሃዲርሳ ባጋራ ካቂዶሶና።

³⁴ ዬሱሲ፥ «ታ ኣዋው፥ ኤንቲ ኣይ ኦꬂያኮ ኤሮና ጊሾ ኔኒ ኤንታው ኣቶ ያጋ» ያጊስ። ኤንቲ ኢያ ኣፊላ ቦላ ሳማ ዬጊዲ ሻኬቲዲ ኤኪዶሶና።

³⁵ ኣሳይ ኤቂዲ ፄሎሶና፥ ሺን ዴሪያ ሃሬይሳቲ፥ «ሃራታ ኣሺስ፤ ፆሳይ ዶሪዳ ኪሪስቶሲ ኢያ ጊዲኮ ኣኔ ባና ኣሾ» ያጊዲ ሌቂሲዶሶና።

³⁶ ዎታዳሬቲ ኢያኮ ሺቂዲ፥ ጫላ ዎይኔ ኡሻ ኢሚዶሶና።

³⁷ ያቲዲ፥ «ኔኒ ኣይሁዴታ ካዎ ጊዲኮ ኔ ሁዒያ ኣሻ» ያጊዲ ሌቂሲዶሶና።

³⁸ ኢያው ሁዔ ባጋራ፥ «ሃይሲ ኣይሁዴታ ካዎ» ያጊያ ፁፌይ ዴዔስ።

³⁹ ካቄቲዳ ዎራንꬖታፔ ኢሶይ ጫሼ ሳዓራ ጎቺሼ፥ «ኣኔ ኔኒ ኪሪስቶሳ ጊዲኮ፥ ኔናካ ኑናካ ኣሻ» ያጊስ።

⁴⁰ ሺን ሃንኮ ዎራንꬖይ፥ «ኔኒ ሃይሳ ሜላ ፒርዳን ዴዓሼ ሃሪ ኣቶሺን፥ ፆሳስ ያዪኪ?

⁴¹ ኑኒ ኑ ባላስ ቤሲያ ፒርዳ ኤኮስ፥ ሺን ሃ ኡራይ ኢሲ ኢታባካ ኦꬂቤና» ያጊዲ ሃንቄቲስ።

⁴² ቃሲካ፥ «ዬሱሳ፥ ኔ ኔ ካዎቴꬃራ ያ ዎዴ ታና ቆፓ» ያጊስ።

³ Philaaxoosi Yesuusa, “Neeni Ayhudeta kawoyye?” yaagidi oychchis. Yesuusi, “Ee, ne gidayssa mela” yaagis.

⁴ Philaaxoosi kahine halaqatakkonne asaakko, “Ha uraa bolla taani issi balakka demmabiikke” yaagis.

⁵ Shin entti, “Ha uray Galiilappe doomidi hayssa gakkanaw Yihuda kumethaa iitabaas denthethees” yaagidi minthi odidosona.

⁶ Philaaxoosi hessa si7ida wode Yesuusi Galiila aseekko eranaw koyidi iya oychchis.

⁷ Yesuusi Heroodisa biittaafe yida asi gideyssa Philaaxoosi erida wode Heroodisi he wode Yerusalaamen de7iya gisho iyaakko yeddis.

⁸ Heroodisi Yesuusa be7anaw daro wodeppe koyishe de7iya gisho iya be7ida wode daro ufayttis. Ays giikko, iyabaa si7ida gisho malaalisiyabaa oothin be7anaw amottishe de7ees.

⁹ Heroodisi Yesuusa daro oyshota oychchis, shin I aykkoka zaaribeenna.

¹⁰ Kahineta halaqatinne higge asttamaareti yan eqqidi minthidi iya mootosona.

¹¹ Heroodisaranne iya wotaaddaretara Yesuusa kadhidosonanne leqisidosona. Bonchcho afilaa mayzidi Philaaxoosakko zaaridi yeddidosona.

¹² Heroodisaranne Philaaxoosara kase morkkeshin he gallas wolla giigidosona.

¹³ Philaaxoosi kahine halaqata, asaa haareyssatanne asaa xeegidi,

¹⁴ “ ‘Ha uray asaa geellatethas denthethees’ gidi taakko ehideta. Takka hintte sinthan pilggada hintte shiishida mootuwas aybi balakka demmabiikke.

¹⁵ Heroodisi, hessatho aybi balakka iya bolla demmiboonna gisho nuukko yeddis. Tumakka ha uray hayqos gathiya aybi balakka oothibeenna.

¹⁶ Hessa gisho, iya garaafada billa yeddana” yaagis.

¹⁷ Hessa I giday Faasikka Baale wode issi asi enttaw billanayssi iyaw attonnabaa gidiya gishossa.

¹⁸ Derey ubbay issi bolla, “Ha uraa gede digga, nuus Barbbaana billa” yaagidi waassidosona.

¹⁹ Barbbaani katamaa giddon asaa iitabaas denthethidi ase wodhdhidi qashettida asi.

²⁰ Philaaxoosi Yesuusa billanaw koyidi asaas zaari odis.

²¹ Gidoshin, asay, “Kaqqa! Kaqqa!” yaagidi waassidosona.

²² Philaaxoosi heedzantho, “Ha uray qohidabay aybe? Wodhos gathiya bala ta demmabiikke. Hessa gisho, garaafada yedda aggana” yaagis.

²³ Entti bantta qaala dhoqqu oothidi, “Kaqettanaw bessees” gidi minthi waassidosona. Entta waasoykka xoonis.

²⁴ Entta oyshaa gisho gidi Philaaxoosi iya bolla pirddis.

²⁵ Asaa iitabaas denthetheyssanne ase wodhdhidi qashettidayssa billana mela woossida, he uraa enttaw billis. Shin Yesuusa entti koyidabaa oothana mela enttaw aathi immis.

²⁶ Yesuusa oykkidi efishin Simoona giya Qereena biitta addey gaxareppe yishin, demmidi masqaliya toossidi Yesuusa kaallidi baana mela un77ethidosona.

²⁷ Daro asaynne bantta tiraa iccishe yeekkiya maccasati iya guyiyara kaalloosona.

²⁸ Shin Yesuusi enttako guye simmidi, “Hinttenoo, Yerusalaame maccasato, hintte huu7esinne hintte naytas yeekkiteppe attin taw yeekkofite.

²⁹ ‘Hekko maynthati, yelonna ulotinne dhanthonna dhanthati anjjettidosona’ hintte yaagana gallasay yaana.

³⁰ He wode dereta, ‘Nu bolla kunddite’, zumatakka, ‘Nuna kammite’ yaagana.

³¹ Hiza, qaye mithaa hessatho oothiko mela mithaa waatanddeshsha?” yaagis.

³² Iyara wodhanaw hara nam77u worandzota efidosona.

³³ Qeeraniyo geetettiya bessaa gathidi kaqqidosona. Worandzotappe issuwa ushachcha baggara hankkuwa haddirssa baggara kaqqidosona.

³⁴ Yesuusi, “Ta aawaw, entti ay oothiyako eronna gisho neeni enttaw atto yaaga” yaagis. Entti iya afilaa bolla saama yeggidi shaakettidi ekkidosona.

³⁵ Asay eqqidi xeellosona, shin deriya haareyssati, “Harata ashshis; Xoossay doorida Kiristtoosi iya gidikko ane bana ashsho” yaagidi leqisidosona.

³⁶ Wotaaddareti iyaakko shiiqidi, caala woyne ushshaa immidosona.

³⁷ Yaatidi, “Neeni Ayhudeta kawo gidikko ne huu7iya ashsha” yaagidi leqisidosona.

³⁸ Iyaw huu7e baggara, “Hayssi Ayhudeta kawo” yaagiya xuufey de7ees.

³⁹ Kaqettida worandzotappe issoy cashshe sa7ara goochchishe, “Ane neeni Kiristtoosa gidikko, nenakka nunakka ashsha” yaagis.

⁴⁰ Shin hankko worandzoy, “Neeni hayssa mela pirddan de7ashe hari attoshin, Xoossaas yayyikii?

⁴¹ Nuuni nu balaas bessiya pirdda ekkoos, shin ha uray issi iitabaakka oothibeenna” yaagidi hanqettis.

⁴² Qassika, “Yesuusa, ne ne kawotethaara yaa wode tana qoppa” yaagis.