ሉቃሳ 22:4-24 in Dawro

⁴ ኢካ ቢዴ፥ ዬሱሳ ዎቲ ኣꬂ ኢማኔንቶ ቄሳቱዋ ካፓቱዋናኔ ጌሻ ጎሊያ ናጊያዋንቱ ካፓቱዋና ኢቲፔ ሃሳዬዳ።

⁵ ኡንቱንቱካ ናሼቲዴ፥ ሚሻካ ዪሁዳው ኢማናው ዉሌቴዲኖ።

⁶ ኢካ ኤኖ ጌዳ፤ ኣሳይ ባይና ሳን ዬሱሳ ኣꬂ ኢማናው ኢንጄቲያ ዎዲያ ኮዬ።

⁷ ማጋጌ ኡኪꬃ ሚያ ባላ ቦንቺያ ዎዲ ጋኬዳ፤ ሄ ዎዲካ ፓሲጋው ዶርሳ ሹካናው ቤሲያ ዎዲያ።

⁸ ዬሱሲ ጴፂሮሳኔ ዮሃኒሳ፥ «ፓሲጋ ቁማ ኑኒ ማናዳን ቢዴ ጊጊሲቴ» ጊዴ ኪቴዳ።

⁹ ኡንቱንቱካ ዛሪዴ፥ «ሃቃን ጊጊሳናዳን ኮያይ?» ያጊ ኦቼዲኖ።

¹⁰ ኢካ፥ «ሂንቴንቱ፥ ካታማ ጌሊያ ዎዴ ኦቱዋና ሃꬃ ቶኬዳ ቢታኒ ሂንቴንቱና ጋኬታናዋ፤ ኢ ጌሊያ ጎሊያ ኣ ካሊዴ ጌሊቴ፤

¹¹ ሄ ጎሊያዋካ፥ ‹ታማሪሲያዌ ኔና፥ «ታኒ፥ ታና ካሊያዋንቱና ኢቲፔ ፓሲጋ ቁማ ሚያ ኢማꬃ ኪፊሊ ሃቃ ባጋና ዴዒ?» ያጌ› ጊቴ።

¹² ሄ ቢታኒካ ፖቂያ ቦላን ዴዒያ ሂፄቲ ኡቴዳ ኣኮ ኪፊሊያ ሂንቴንታ ቤሳናዋ፤ ሄዋኒካ ሳዓ ጊጊሲቴ» ያጌዳ።

¹³ ኡንቱንቱ ቢዴ፥ ዬሱሲ ጎዋዳንካ ቢታኒያ ዴሚዴ ፓሲጋ ቁማ ጊጊሴዲኖ።

¹⁴ ፓሲጋ ቁማይ ሜቴቲያ ሳቲ ጋኮ ዎዴ፥ ታማኔ ላዑ ኪቴቶዋንቱና ኢቲፔ ቁማ ማናው ኡቴዳ።

¹⁵ ኢካ፥ «ታና ሜቱ ጋካናፔ ካሲያን ሂንቴንቱና ሃ ፓሲጋ ቁማ ማናው ዳሮ ኣሞታዴ ዴዓይ።

¹⁶ ኣዪሲ ጎፔ፥ ታ ሂንቴው ኦዲያዌ፥ ሃዌ ፆሳ ካዉቴꬃን ፖሌታና ጋካናው፥ ታኒ ላዔꬁዋ ሃዋፔ ሚኬ» ያጌዳ።

¹⁷ ፁዓ ኣኪዴ፥ ፆሳ ጋላቲዴ፥ «ሃዋ ሄይቴ፥ ሂንቴንቱ ጊዱዋን ጊሼቲ ኡሺቴ።

¹⁸ ኣዪሲ ጎፔ፥ ታ ሂንቴንቶ ያጋይ፥ ፆሳ ካዉቴꬃይ ያና ጋካናው፥ ሃቼፔ ዶማዴ ዎዪኒያ ኤሳ ኡሺኬ» ያጌዳ።

¹⁹ ቃሲ ማጋጌ ኡኪꬃ ኣኪዴ፥ ፆሳ ጋላቴዳ፤ ሄ ኡኪꬃ ሜንꬂ ኡንቱንቶ ኢሚዴ፥ «ሃዌ ሂንቴንቶ ኢሜቲያዌ ታ ኣሹዋ፤ ሃዋን ታና ቆፓና ማላ ሃዋ ሚቴ» ያጌዳ።

²⁰ ካዉዋ ሞዋፔ ጉዪያን፥ ካሴዋዳን ፁዓ ዴንꬂ ኡንቱንቶ ኢሚዴ፥ ሃዋዳን ያጌዳ፡ «ሃ ፁዓይ፥ ታ ሂንቴንቱ ዲራው ጉሲያ ታ ሱꬃ ቆፔꬂያ ኦራꬃ ጫቁዋ።

²¹ ሺን ቤዒቴ፥ ታና ኣꬂ ኢማናው ዴዒያ ቢታኒ ጋዪታን ታናና ኢቲፔ ሜ።

²² ኣያው ጎፔ፥ ታኒ ኣሳ ናዓይ ፆሳይ ጎዋዳን ባይ፤ ሺን ታና ኣꬂዴ ኢሚያ ኡራው ኣው ኣዬ» ያጌዳ።

²³ ኡንቱንቱ ጊዶፔ ሄዋ ኦꬃናው ዴዒያዌ ኦና ጊዳኔንቶ፥ ባሬንቱ ጊዶን ኦሻ ዶሜዲኖ።

²⁴ ቃሲ ባሬንቱ ጊዶፔ ኦኒ ኣꬌንቶ ያጌቲያ ፓሉማይ ኡንቱንቱ ጊዶን ኬሴዳ።

⁴ Ikka biide, Yesuusa wooti aathi immanentto qeesatuwaa kaappatuwaannanne geeshsha golliyaa naagiyaawanttu kaappattuwaanna ittippe haasayeedda.

⁵ Unttunttukka nashettiide, miishshaakka Yihudaw immanaw wuletteeddino.

⁶ Ikka eeno geedda; asay baynna saan Yesuusa aathi immanaw injjetiyaa wodiyaa koyyee.

⁷ Magaage Ukithaa Miyaa Baalaa bonchchiya wodii gakkeedda; he wodiikka Paasigaw dorssaa shukkanaw bessiyaa wodiyaa.

⁸ Yesuusi Phexiroosanne Yohaannisa, “Paasigaa qumaa nuuni maanaadan biide giigissite” giide kiitteedda.

⁹ Unttunttukka zaariide, “Haqan giigissanaadan koyyay?” yaagi oochcheeddino.

¹⁰ Ikka, “Hinttenttu, katamaa geliyaa wode otuwaanna haathaa tookkeedda bitani hinttenttunna gakettanawaa; I geliyaa golliyaa A kaalliide gelite;

¹¹ He golliyaawaakka, ‘Tamaarissiyaawe neena, “Taani, taana kaalliyaawanttunna ittippe Paasigaa qumaa miyaa imathaa kifili haqa bagganna de7ii?” yaagee’ giite.

¹² He bitaniikka pooqiyaa bollan de7iyaa hiixetti utteedda aako kifiliyaa hinttentta bessanawaa; hewaanikka sa7aa giigissite” yaageedda.

¹³ Unttunttu biide, Yesuusi goowaadankka bitaniyaa demmiide Paasigaa qumaa giigisseeddino.

¹⁴ Paasigaa qumay meetettiyaa saati gakko wode, tammanne laa77u kiitettowanttunna ittippe qumaa maanaw utteedda.

¹⁵ Ikka, “Taana metuu gakkanaappe kasiyan hinttenttunna ha Paasigaa qumaa maanaw daro amottaadde de7ay.

¹⁶ Ayissi gooppe, ta hinttew odiyaawe, hawe Xoossaa kaawutethan polettana gakkanaw, taani laa7ethuwaa hawaappe miikke” yaageedda.

¹⁷ Xuu7aa akkiide, Xoossaa galatiide, “Hawaa heyte, hinttenttu gidduwan gishetti ushite.

¹⁸ Ayissi gooppe, ta hinttenttoo yaagay, Xoossaa Kawutethay yaana gakkanaw, hachcheppe doommaade woyiniyaa eessaa ushikke” yaageedda.

¹⁹ Qassi magaage ukithaa akkiide, Xoossaa galateedda; he ukithaa menthi unttunttoo immiidde, “Hawe hinttenttoo imettiyawe ta ashuwaa; hawaan taana qoppana mala hawaa miite” yaageedda.

²⁰ Kawuwaa moowaappe guyyiyan, kasewaadan xuu7aa denthi unttunttoo immiide, hawaadan yaageedda: “Ha xuu7ay, ta hinttenttu diraw gussiyaa ta suuthaa qopethiyaa ooratha caaquwaa.

²¹ Shin be7ite, taana aathi immanaw de7iyaa bitani gayitaan taananna ittippe mee.

²² Ayaw gooppe, taani Asaa Na7ay Xoossay goowaadan bay; shin taana aathiide immiyaa uraw aw aayyee” yaageedda.

²³ Unttunttu giddoppe hewaa oothanaw de7iyaawe oona gidanentto, barenttu giddon ooshaa doommeeddino.

²⁴ Qassi barenttu giddoppe ooni aadhentto yaagettiyaa palumay unttunttu giddon keseedda.