ሉቃሳ 22:19-52 in Dawro

¹⁹ ቃሲ ማጋጌ ኡኪꬃ ኣኪዴ፥ ፆሳ ጋላቴዳ፤ ሄ ኡኪꬃ ሜንꬂ ኡንቱንቶ ኢሚዴ፥ «ሃዌ ሂንቴንቶ ኢሜቲያዌ ታ ኣሹዋ፤ ሃዋን ታና ቆፓና ማላ ሃዋ ሚቴ» ያጌዳ።

²⁰ ካዉዋ ሞዋፔ ጉዪያን፥ ካሴዋዳን ፁዓ ዴንꬂ ኡንቱንቶ ኢሚዴ፥ ሃዋዳን ያጌዳ፡ «ሃ ፁዓይ፥ ታ ሂንቴንቱ ዲራው ጉሲያ ታ ሱꬃ ቆፔꬂያ ኦራꬃ ጫቁዋ።

²¹ ሺን ቤዒቴ፥ ታና ኣꬂ ኢማናው ዴዒያ ቢታኒ ጋዪታን ታናና ኢቲፔ ሜ።

²² ኣያው ጎፔ፥ ታኒ ኣሳ ናዓይ ፆሳይ ጎዋዳን ባይ፤ ሺን ታና ኣꬂዴ ኢሚያ ኡራው ኣው ኣዬ» ያጌዳ።

²³ ኡንቱንቱ ጊዶፔ ሄዋ ኦꬃናው ዴዒያዌ ኦና ጊዳኔንቶ፥ ባሬንቱ ጊዶን ኦሻ ዶሜዲኖ።

²⁴ ቃሲ ባሬንቱ ጊዶፔ ኦኒ ኣꬌንቶ ያጌቲያ ፓሉማይ ኡንቱንቱ ጊዶን ኬሴዳ።

²⁵ ዬሱሲ ኡንቱንታ ያጌዳ፡ «ሃ ኣላሚያ ሞዲያዋንቱ ባሬንቱ ኣሳ ቦላ ጎዳቲኖ፤ ኡንቱንታ ሞዲያዋንቱ ኬካቱዋ ጌቴቲኖ።

²⁶ ሺን ሂንቴንቱ ሃዋዳን ሃኖፒቴ፤ ዬዉዋን ቃሲ ሂንቴንቱፔ ꬎቃ ጊዴዳዌ ሂንቴ ኡባፔ ጉፂያዋ፤ ሂንቴንታ ሞዲያዌካ፥ ሂንቴንቶ ቆማዳን ሃኖ።

²⁷ «ቁማ ማናው ኡቴዳዋፔኔ ቁማ ኣሳው ኣꬂያዋፔኔ ኦኒ ቦንቼቲ? ቁማ ማናው ኡቴዳዋ ጊዴኔ? ታኒ ቃሲ ሂንቴንቱ ጊዶን ቁማ ኣꬂያ ቆማ ማላ።

²⁸ ቃሲ ታኒ ፓጬቲያ ዎዲያን ሂንቴንቱ ታናና ኢቲፔ ሚኒ ኤቄዳዋንታ።

²⁹ ኣ ካዉቴꬃ ኦይዲያን ኡታና ማላ ታ ኣቡ ታና ሱንꬆዋዳን፥ ታኒ ቃሲ ታ ካዉቴꬃን ታ ጋይታፔ ማናዳኒኔ ኡሻናዳን፥ ታማኔ ላዑ ኢስራዔሊያ ያራቱዋ ቦላ ፒርዲዴ፥ ካዉቴꬃ ኦይዲያን ኡታና ማላ ሂንቴንታ ሱንꬃዲ» ያጌዳ።

³¹ ጎዳይ፥ «ሲሞና፥ ሲሞና፥ ታኒ ኦዲያዋ ሲሳ፤ ፃላሂ ሂንቴንታ ኣሳይ ዛርጋ ሃልዒያዋዳን፥ ሃልዓናው ፆሳ ዎሴዳ።

³² ሺን ታኒ ኔ ኣማኑ ባዬናዳን ኔ ዲራው ጋናታዲ። ኔኒ ታኮ ሲሚያ ዎዴ ኔ ኢሻቱዋ ሚኒሳ» ያጌዳ።

³³ ሲሞኒ ዛሪዴ፥ «ጎዳው፥ ታኒ ኔናና ቃሼታናዉኔ ኔናና ኢቲፔ ሃይቃናው ጊጋ ኡታዲ» ያጌዳ።

³⁴ ዬሱሲ ቃሲ፥ «ጴፂሮሳ፥ ታኒ ኔው ያጋይ፤ ሃቼ ቢላሂያን፥ ኩቱ ዋሳናሲ ሄዙ ጌዴ ታና ኔኒ፥ ‹ኣ ታኒ ኤሪኬ› ጋዴ ካዳናሳ» ያጌዳ።

³⁵ ዬሱሲ ባሬና ካሊያዋንቶ፥ «ኮሮጁ፥ ቃርጪቲኔ ጫማይ ባንታን ታኒ ሂንቴንታ ኪቶ ዎዴ፥ ሂንቴንቶ ኢቲባይ ፓጮዌ ዴዒ?» ያጌዳ። ኡንቱንቱካ፥ «ኢቲ ባይኔ ኑሲ ፓጪ ቤና» ያጌዲኖ።

³⁶ ኢካ ዛሪዴ፥ «ሃዒ ቃሲ ኮሮጁ ዴዒያዌ ኣኪ ቦ፤ ቃርጪቲ ዴዒያዌካ ሄዋዳን ኡዶ፤ ባይናዌ ቃይ ባሬ ማዩዋ ዛሊዒዴ ማሻ ሻሞ።

³⁷ ኣያው ጎፔ ታ ሂንቴው ያጋይ፥ ‹ሃዌ ማካላንቻቱና ኢቲፔ ፓይዴቴዳ› ያጌቲ ፆሳ ማፃፋን ፃፌቴዳዌ፥ ታናን ፖሌቴናን ኣቴና። ኤ፥ ታው ጌቴቴዳዌ ሃዒ ፖሌታናዋ» ያጌዳ።

³⁸ ኣ ካሊያዋንቱ፥ «ጎዳው፥ ሃዋን ላዑ ማሻይ ዴዔ» ያጊና ኢካ፥ «ሄዌ ጊዳናዋ» ያጌዳ።

³⁹ ዬሱሲ ካታማፔ ኬሲዴ፥ ሃራ ጋላሲ ቢያዋዳንካ ዴብሬ ዛይቴ ቤዳ። ቃሲ ኣ ካሊያዋንቱካ ኣ ጌዱዋ ቤዲኖ።

⁴⁰ ሄ ሳዓ ጋኪዴ፥ «ፓጪያን ሂንቴንቱ ጌሌናን ኣታና ማላ፥ ዎሲቴ» ያጌዳ።

⁴¹ ሹቻ ኦሊና ጋኪያሳ ኬና ኡንቱንቱፔ ሃኪ ቤዳ። ጉልባቲዴ፥

⁴² «ታ ኣቦ፥ ኔኒ ኮዪያዋ ጊዶፔ፥ ሃ ሜቱዋ ፁዓ ታፔ ዲጋ፤ ሺን ታ ሼኔ ጊዶፖ፤ ኔ ሼኔ ጊዶፔ ኣቲን» ያጊዴ ዎሴዳ።

⁴³ ሳሉዋፔ ዪዴ ሚኒሲያ ኪታንቻይ ኣው ቤቴዳ።

⁴⁴ ባሬ ዎዛና ጊዶን ሴሌቲዴ፥ ዳሪ ዎሴዳ። ኢ ጫዎቲያ ጫዉካ ሳዓ ቦላን ፆኪያ ሱꬃ ማላቴዳ።

⁴⁵ ዎሳፔ ዴንዲዴ፥ ባሬና ካሊያዋንቱኮ ጉዬ ቢዴ፥ ኡንቱንቱ ዳሮፔ ቃሬቴዳ ዲራው፥ ዳቡሪዴ ጌሚዒሾዋንታ ፄሊዴ፥

⁴⁶ «ኣያው ጌሚዒሺቴ? ፓጪያን ጌሌናዳን ዴንዲ ዎሲቴ» ያጌዳ።

⁴⁷ ዬሱሲ ሄዋ ሃሳይ ዴዒሺን፥ ጮራ ኣሳይ ዬዲኖ። ታማኔ ላዑ ኣ ካሊያዋንቱፔ ኢቱዋ ጊዴዳ ዪሁዳ ጌቴቲያዌ ሄ ኣሳ ካሌꬂዴ ዬራናው ዬሱሳኮ ሺቄዳ።

⁴⁸ ዬሱሲ ቃይ፥ «ዪሁዳው፥ ኔኒ ታና ኣሳ ናዓ ዬራዴ ኣꬃ ኢማይ?» ያጌዳ።

⁴⁹ ኣ ዩሹዋን ዴዒያ ኣ ካሊያዋንቱ ሃኔቲያ ዬዉዋ ቤዖ ዎዴ ኣ፥ «ጎዳው፥ ሃ ኣሳ ኑኒ ማሻን ቃንፃኔ?» ያጌዲኖ።

⁵⁰ ኡንቱንቱፔ ኢቱ፥ ቄሳቱዋ ኡባቱዋ ካፑዋ ቆማ ሾጪዴ፥ ኣ ኡሼቻ ሃይꬃ ቃንፂ ኦሌዳ።

⁵¹ ዬሱሲ ቃይ ዛሪዴ፥ «ኣጊቴ፥ ባሺቴ» ያጌዳ። ቢታኒያ ሃይꬃካ ቦቺዴ ፓꬄዳ።

⁵² ዬሱሲካ ባሬኮ ዬዳ ቄሳቱዋ ካፓቶ፥ ጌሻ ጎሊያ ናጊያዋንቶ፥ ሱንꬃቱዋሲኔ ጋዲያ ጪማቶ፥ «ፓኑዋ ኦይቂያዋዳን ማሻኔ ፃምዓ ኦይቂዴ ዪቴ?

¹⁹ Qassi magaage ukithaa akkiide, Xoossaa galateedda; he ukithaa menthi unttunttoo immiidde, “Hawe hinttenttoo imettiyawe ta ashuwaa; hawaan taana qoppana mala hawaa miite” yaageedda.

²⁰ Kawuwaa moowaappe guyyiyan, kasewaadan xuu7aa denthi unttunttoo immiide, hawaadan yaageedda: “Ha xuu7ay, ta hinttenttu diraw gussiyaa ta suuthaa qopethiyaa ooratha caaquwaa.

²¹ Shin be7ite, taana aathi immanaw de7iyaa bitani gayitaan taananna ittippe mee.

²² Ayaw gooppe, taani Asaa Na7ay Xoossay goowaadan bay; shin taana aathiide immiyaa uraw aw aayyee” yaageedda.

²³ Unttunttu giddoppe hewaa oothanaw de7iyaawe oona gidanentto, barenttu giddon ooshaa doommeeddino.

²⁴ Qassi barenttu giddoppe ooni aadhentto yaagettiyaa palumay unttunttu giddon keseedda.

²⁵ Yesuusi unttuntta yaageedda: “Ha alamiyaa mooddiyaawanttu barenttu asaa bolla godattiino; unttuntta mooddiyaawanttu keekatuwaa geetettiino.

²⁶ Shin hinttenttu hawaadan hanoppite; yewuwaan qassi hinttenttuppe dhoqqa gideeddawe hintte ubbaappe guxxiyawaa; hinttentta moddiyaawekka, hinttenttoo qoomaadan hano.

²⁷ “Qumaa maanaw utteeddawaappenne qumaa asaw aathiyaawaappenne ooni bonchchettii? Qumaa maanaw utteeddawaa gidennee? Taani qassi hinttenttu giddon qumaa aathiyaa qoomaa mala.

²⁸ Qassi taani paacettiyaa wodiyaan hinttenttu taananna ittippe minni eqqeeddawantta.

²⁹ A kawutethaa oydiyaan uttana mala Ta aabbu taana sunthowaadan, Taani qassi Ta kawutethaan ta gaytaappe maanaadaaninne ushanaadan, tammanne laa77u Israa7eeliyaa yaratuwaa bolla pirddiidde, kawutethaa oydiyaan uttana mala hinttentta sunthaaddi” yaageedda.

³¹ Goday, “Simoonaa, Simoonaa, taani odiyaawaa sisa; xalahii hinttentta asay zarggaa hal77iyaawaadan, hal77anaw Xoossaa woosseedda.

³² Shin taani ne ammanuu bayennaadan ne diraw gaannataaddi. Neeni taakko simmiyaa wode ne ishatuwaa minissa” yaageedda.

³³ Simooni zaariide, “Godaw, taani neenanna qashettanawunne neenanna ittippe hayqqanaw giiga uttaaddi” yaageedda.

³⁴ Yesuusi qassi, “Phexiroosa, taani new yaagay; hachche bilahiyan, kuttuu waassanaassi heezzu gede taana neeni, ‘A taani erikke’ gaade kaadanaassa” yaageedda.

³⁵ Yesuusi barena kaalliyaawanttoo, “Korojuu, qarcciitiinne caammay banttaan taani hinttentta kiitto wode, hinttenttoo ittibay paccowe de7ii?” yaageedda. Unttunttukka, “Itti baynne nuussi pacci beenna” yaageeddino.

³⁶ Ikka zaariide, “Ha77i qassi korojuu de7iyaawe akki bo; qarcciiti de7iyaawekka hewaadan udo; baynnawe qay bare mayuwaa zali77iide mashshaa shammo.

³⁷ Ayaw gooppe ta hinttew yaagay, ‘Hawe makkalanchchatunna ittippe paydetteedda’ yaagetti Xoossaa Maxaafan xaafetteeddawe, taanan polettennaan attenna. E, taw geetetteeddawe ha77i polettanawaa” yaageedda.

³⁸ A kaalliyaawanttu, “Godaw, hawaan laa77u mashshay de7ee” yaagina ikka, “Hewe gidanawaa” yaageedda.

³⁹ Yesuusi katamaappe kesiide, hara gallassi biyaawaadankka Debre Zayte beedda. Qassi A kaalliyaawanttukka A geeduwaa beeddino.

⁴⁰ He sa7aa gakkiide, “Paaciyaan hinttenttu gelennaan attana mala, woossite” yaageedda.

⁴¹ Shuchchaa olina gakkiyaasaa keena unttunttuppe haakki beedda. Gulbbatiide,

⁴² “Ta Aabboo, neeni koyyiyaawaa gidooppe, ha metuwaa xuu7aa taappe digga; shin ta shene gidoppo; ne shene gidoppe attin” yaagiide woosseedda.

⁴³ Saluwaappe yiide minissiyaa kiitanchchay aw beetteedda.

⁴⁴ Bare wozanaa giddon seelettiidde, darii woosseedda. I cawottiyaa cawuukka sa7aa bollan xokiyaa suuthaa malateedda.

⁴⁵ Woosaappe denddiide, barena kaalliyaawanttukko guyye biide, unttunttu daroppe qaretteedda diraw, daaburiide gemi77ishowantta xeelliide,

⁴⁶ “Ayaw gemi77ishiitee? Paaciyaan gelennaadan denddi woossite” yaageedda.

⁴⁷ Yesuusi hewaa haasay de7ishshin, cora asay yeeddino. Tammanne laa77u A kaalliyaawanttuppe ittuwaa gideedda Yihudaa geetettiyaawe he asaa kaalethiide yeranaw Yesuusakko shiiqeedda.

⁴⁸ Yesuusi qay, “Yihudaw, neeni taana Asaa Na7aa yeraade aatha immay?” yaageedda.

⁴⁹ A yuushshuwaan de7iyaa A kaalliyaawanttu hanettiyaa yewuwaa be7o wode A, “Godaw, ha asaa nuuni mashshaan qanxxanee?” yaageeddino.

⁵⁰ Unttunttuppe ittu, Qeesatuwaa ubbatuwaa kaappuwaa qoomaa shociide, A ushechcha haythaa qanxxi oleedda.

⁵¹ Yesuusi qay zaariide, “Aggite, bashite” yaageedda. Bitaniyaa haythaakka bochchiide patheedda.

⁵² Yesuusikka barekko yeedda qeesatuwaa kaappatoo, geeshsha golliyaa naagiyaawanttoo, sunthatuwaassinne gadiyaa cimatoo, “Paanuwaa oyqqiyaawaadan mashshaanne xam77aa oyqqiide yiitee?