ሉቃሳ 20:19-34 in Dawro

¹⁹ ሙሴ ሂጊያ ፃፊያዋንቱኔ ቄሳቱዋ ካፓቱ ዬሱሲ ሃሳዬዳ ሌሚሱ፥ ኡንቱንቱ ቦላን ጌቴቶዋ ኤሮ ዲራው፥ ሄ ሳቲያንካ ኣ ኦይቃናው ኮዬዲኖ። ሺን ኣሳው ያዬዲኖ።

²⁰ ዬሱሳ፥ ሄ ጋዲያ ሞዲያዋሲኔ ኣ ማታሲ ኣꬂዴ ኢማናው ኣ ዶናፔ ኬሲያ ቃላን ኦይቃናው ኢንጄቲያ ዎዲያ ናጊኖ። ሄዋ ዲራው ጌሻ ማላቲዴ ኦይꬃናው ዎቺያዋንታ ኪቴዲኖ።

²¹ ሄ ኪቴቶዋንቱካ ዬሱሳ፥ «ታማሪሲያዎ፥ ኔኒ ቱማ ዬዉዋ ሃሳዪያዋኔ ታማሪሲያዋ፥ ሄዋዳንካ ቃይ ፆሳ ኦጊያ ቱማቴꬃን ታማሪሲያዋኔ ኦሲኔ ዱማዬናዋ ኑኒ ኤሬቶ።

²² ቃሲካ ኡንቱንቱ፥ ሮማ ካቲያ ቄሳሬው ጊራ ጪጋናው ኮሺ ዎይ ኮሼኔ?» ያጊ ኦቼዲኖ።

²³ ኢ ቃሲ ኡንቱንቱ ዴሻቴꬃ ኤሪዴ፥

²⁴ «ኣኔ ታና ኢቲ ዲናሪያ ቤሲቴ፤ ሄዋ ቦላን ዴዒያ ሚሲሊኔ ፃፌቶዌ ኦና ቤሲ?» ጌዳ።

²⁵ ኡንቱንቱካ፥ «ቄሳሬዋ» ጊዴ ዛሬዲኖ። ኢኔካ፥ «ሄዋ ጊዶፔ፡ ቄሳሬዋ፥ ቄሳሬው ኢሚቴ፤ ፆሳዋ፥ ፆሳው ኢሚቴ» ያጌዳ።

²⁶ ኡንቱንቱካ፥ ኢ ሃሳዬዳ ቃላን ኣሳ ሲንꬃን ኦይቃናው ዳንዳዪ ቤይኪኖ። ኣ ዛሩዋን ማላሌቲዴ ጮዑ ጌዲኖ።

²⁷ ሳዱቃዋናቱፔ ኢቱ ኢቱ ዬሱሳኮ ዪዴ፥ ኦሻ ኣው ሺሼዲኖ።

²⁸ ኡንቱንቱካ ዬሱሳ፥ «ታማሪሲያዎ፥ ኢቲ ቢታኒ ማቻቶ ኣኪዴ ናዓ ዬሌናን ሃዪያዋ ጊዶፔ፥ ሚሺራቶ ሄዋ ኢሻይ ላታ ኣኪ ናዓ ዬሊዴ ባሬ ኢሻው ዜሬꬃ ዎꬃና ማላ ሙሴ ኑሲ ፃፌዳ።

²⁹ ኢቲ ዎዲያን ላፑ ኢሻቱ ዴዒያዋንቱፔ፥ ባይራይ ማቻቶ ኣኪዴ ዬሌናን ሃይቂ ኣጌዳ።

³⁰ ላዔꬂያዌካ ኢዞ ላቴዳ።

³¹ ሄዜንꬂያዌካ ቃሲ ኢዞ ኣኬዳ፤ ላፑናቱካ ኢዞ ኣኪዴ ናዓ ዬሌናን ሃይቄዲኖ።

³² ዉርሴꬃን ሚሺራታካ ሃይቃ ኣጋዱ።

³³ ሲሚ ላፑናቱካ ሄ ሚሺራቶ ኣኬዳ ዲራው፥ ሃይቁዋፔ ዴንዴዳ ዎዴ፥ ኢዛ ኦሲ ማቼ ጊዳኔ?» ያጊ ኦቼዲኖ።

³⁴ ዬሱሲካ፥ «ሃ ኣላሚያ ናናይ ኣኪኖኔ ኣኬቲኖ።

¹⁹ Muse higgiyaa xaafiyaawanttunne qeesatuwaa kaappatuu Yesuusi haasayeedda leemisuu, unttunttu bollan geetettowaa ero diraw, he saatiyankka A oyqqanaw koyyeeddino. Shin asaw yayyeeddino.

²⁰ Yesuusa, he gadiyaa mooddiyawaassinne A maataassi aathiide immanaw A doonaappe kesiyaa qaalaan oyqqanaw injjetiyaa wodiyaa naagiino. Hewaa diraw geeshshaa malatiidde oythanaw wochchiyaawantta kiitteeddino.

²¹ He kiitettowanttukka Yesuusa, “Tamaarissiyaawoo, neeni tuma yewuwaa haasayiyaawaanne tamaarissiyaawaa, hewaadankka qay Xoossaa ogiyaa tumatethaan tamaarissiyaawaanne oossinne dummayennawaa nuuni ereetto.

²² Qassikka unttunttu, Roomaa kaatiyaa Qeesaarew giiraa cigganaw koshshii woy koshshennee?” yaagi oochcheeddino.

²³ I qassi unttunttu deshatethaa eriide,

²⁴ “Ane taana itti diinaariyaa bessite; hewaa bollan de7iyaa misiliinnee xaafettowe oona bessii?” geedda.

²⁵ Unttunttukka, “Qeesaarewaa” giide zaareeddino. Inneekka, “Hewaa gidooppe: Qeesaarewaa, Qeesaarew immite; Xoossaawaa, Xoossaw immite” yaageedda.

²⁶ Unttunttukka, I haasayeedda qaalaan asaa sinthan oyqqanaw danddayi beykkino. A zaaruwan maalalettiide co77u geeddino.

²⁷ Saduqaawanatuppe ittu ittuu Yesuusakko yiide, ooshaa aw shiishsheeddino.

²⁸ Unttunttukka Yesuusa, “Tamaarissiyaawoo, itti bitani machchatto akkiide na7aa yelennaan hayyiyaawaa gidooppe, mishiratto hewaa ishay laataa akki na7aa yeliide bare ishaw zerethaa wothana mala Muse nuussi xaafeedda.

²⁹ Itti wodiyaan laappu ishatuu de7iyaawanttuppe, bayray machchatto akkiide yelennaan hayqqii aggeedda.

³⁰ Laa7ethiyaawekka izo laatteedda.

³¹ Heezzenthiyaawekka qassi izo akkeedda; laappunatuukka izo akkiide na7aa yelennaan hayqqeeddino.

³² Wursethaan mishirattakka hayqqaa aggaaddu.

³³ Simmi laappunatuukka he mishiratto akkeedda diraw, hayquwaappe denddeedda wode, iza oossi machche gidanee?” yaagi oochcheeddino.

³⁴ Yesuusikka, “Ha alamiyaa naanay akkiinonne akettiino.