ሉቃሳ 1:67-79 in Gofa

⁶⁷ ዮሃኒሳ ኣዋይ ዛካሪያሲ ጌሻ ኣያናን ኩሚዲ ሃይሳዳ ያጊዲ ቲንቢቴ ኦዲስ።

⁶⁸ «ኢስራዔሊያ ጎዳይ ጋላቴቶ፥ ዪዲ ባ ኣሳ ዎዚስ።

⁶⁹ ባ ኣይሊያ ዳዊቴ ኬꬃን ኣቶቴꬃ ካጪያ ዴንꬂስ።

⁷⁰ ሄሲካ ቤኒ ዎዴ ጌሻ ናቤታ ዶናን ኦዴቲዳይሳ ሜላ፥

⁷¹ ኢያ ኣሾይ ኑ ሞርኬታፔኔ ኑራ ኤቄቲያ ኡባ ኩሺያፔ።

⁷² ሄሳ ኢ ኦꬂዳይ ኑ ኣዋታስ ባ ማሮታ ቤሳናሲኔ፥ ባ ጌሻ ጫቁዋ ናጋናሳ።

⁷³ ኑ ኣዋ ኣብራሃሜስ ጫቂዳ ጫቁዋ ቆፓናሲኔ

⁷⁴ ኑ ሞርኬታ ኩሼፔ ኬሲዲ ያሺ ባይና ኢያ ሃጋዛና ሜላሳ።

⁷⁵ ኑ ላይꬃ ኡባን ጌሻቴꬃኒኔ ፂሎቴꬃን ባ ሲንꬃን ኑና ኤሳናሳ።

⁷⁶ ቃሲ ላ ናዓው፥ ኔኒ ኡባፌ ቦላ ፆሳ ናቤ ጌቴታና። ጎዳ ኦጊያ ሎይꬃናው ኔ ኢያ ሲንꬃን ባና።

⁷⁷ ኤንታ ናጋራይ ቁሼቲን፥ ኤንቲ ኣቶቴꬂ ዴማናይሳ ኔ ጎዳ ዴሪያስ ኦዳና።

⁷⁸ ኑ ፆሳ ሎዖ ማሮቴꬃፌ ዴንዶይሳን ዎንታ ፃልቄይ ኑስ ሳሉዋፔ ኬዪስ።

⁷⁹ ሄሲካ ꬉማኒኔ፥ ሃይቆ ኩያ ጋርሳን ዴዔይሳታስ ፖዒሳናሳ፥ ኑ ቶሁዋካ ሳሮ ኦጊያኮ ዛራናሳ» ያጊስ።

⁶⁷ Yohaannisa aaway Zakkariyaasi Geeshsha Ayyaanan kumidi hayssada yaagidi tinbbite odis.

⁶⁸ “Isra7eeliya Goday galatetto, yidi ba asaa wozis.

⁶⁹ Ba aylliya Dawite keethan atotethaa kaciya denthis.

⁷⁰ Hessika beni wode geeshsha nabeta doonan odettidayssa mela,

⁷¹ Iya ashoy nu morkketappenne nuura eqettiya ubbaa kushiyappe.

⁷² Hessa I oothiday nu aawatas ba maarota bessanaasinne, ba geeshsha caaquwa naaganaassa.

⁷³ Nu aawa Abrahames caaqqida caaquwa qoppanasinne

⁷⁴ nu morkketa kusheppe kessidi yashshi baynna iya haggaazana melassa.

⁷⁵ Nu laytha ubban geeshshatethaninne xillotethan ba sinthan nuna essanaassa.

⁷⁶ Qassi laa na7aw, neeni Ubbaafe Bolla Xoossaa nabe geetettana. Godaa ogiya loythanaw ne iya sinthan baana.

⁷⁷ Entta nagaray qushettin, entti atotethi demmanayssa ne Godaa deriyas odana.

⁷⁸ Nu Xoossaa lo77o maarotethaafe denddoyssan wontta xalqey nuus saluwappe keyis.

⁷⁹ Hessika dhumaninne, hayqo kuya garssan de7eyssatas poo7isanaassa, nu tohuwakka saro ogiyakko zaaranaassa” yaagis.