ሉቃሳ 17:2-33 in Gofa

² ሄ ኡራይ ካሎታፔ ኢሱዋ ባሌꬃናፔ ዎፃ ባ ቆꬌን ቃቺዲ ኣባን ዉሊኮ ኢያው ሎዖ።

³ ሄሳ ጊሾ ናጌቲቴ። «ኔ ኢሻይ ናጋራ ኦꬂኮ ሃንቄታ፤ ቂሮቲዲ ማሮቴꬃን ሲሚኮ፥ ኢያው ኣቶ ያጋ።

⁴ ኢሲ ጋላሳን ላፑን ቶሆ ቆሂዲ፥ ላፑን ቶሆ፥ ‹ታኒ ታ ባላ ኤራስ ታና ማራ› ያጊዲ ኔኮ ዪኮ ኢያው ኣቶ ጋ።»

⁵ ሃዋሬቲ ጎዳኮ፥ «ኣማኖ ኑስ ጉጃርኪ» ያጊዶሶና።

⁶ ጎዳይ፥ «ጋሼ ኣይፌ ሜላ ኣማኖይ ሂንቴው ዴዒኮ ‹ሃይሳ ዎላ ሾዴታዳ ኣባ ጊዶን ቶኬታ› ያጊኮ ሂንቴው ኪቴታና» ያጊስ።

⁷ ጉጂዲካ ዬሱሲ፥ «ሂንቴ ጊዶፌ ኢሱዋስ ጎሻንቾይ ዎይኮ ዶርሴ ሄሚያ ኣይሌይ ዴዒኮ ኦሶ ጋዴፔ ዎይኮ ዉዴፔ ሶ ሲሚያ ዎዴ ‹ኤሌ ሃያዳ ካꬂ ማናው ኡታ› ያጌይ ዴዒ?

⁸ ዴና፥ ‹ታው ካሆ ጊጊሳ፤ ታኒ ማዳ፥ ኡያዳ ኣጋና ጋካናው ኤቃዳ ሙዛ። ሄሳፌ ጉዬ፥ ኔኒ ቃሲ ማሳኔ ኡያሳ› ያጌኔዬ?

⁹ ሂዛ፥ ጎዳይ፥ ኣይሌይ ኪታ ፖሊዳ ጊሾ ኣንጂዬ?

¹⁰ ሄሳ ጊሾ፥ ሂንቴካ ኪቴቶይሳ ኡባ ፖሊዳ ዎዴ ‹ኑ ፓꬆና ኣይሌታ፤ ኦꬃናው ቤሲያ ኦሱዋ ፖሊዳ› ያጊቴ» ያጊስ።

¹¹ ዬሱሲ ዬሩሳላሜ ቢሼ ሳማሪሲኔ ጋሊላ ቢታስ ጊዶራ ካንꬂዲ ኣꬊስ።

¹² ኢሲ ጉታ ጌሊያ ዎዴ ባሮ ሃርጌን ኦይኬቲዳ ታሙ ኣሳቲ ኢያ ዴሚዶሶና። ኤንቲካ ሃሆን ኤቂዲ፥

¹³ «ጎዳ ዬሱሳ፥ ኑስ ቃꬌታርኪ» ያጊዲ ዋሲዶሶና።

¹⁴ ኢ ኤንታ ቤዒዳ ዎዴ «ቢዲ ሂንቴናቴꬃ ኣይሁዴ ካሂኔ ቤሲቴ» ያጊስ። ኤንቲ ኦጊያ ቦላ ቢሼ ፓፂዶሶና።

¹⁵ ኤንታፌ ኢሶይ ባ ፓፁዋ ቤዒዳ ዎዴ ꬎቁ ጊዳ ቃላን ፆሳ ቦንቺሼ ዬሱሳኮ ሲሚስ።

¹⁶ ኢ ሳማሬ ቢታ ኣሲ፥ ሺን ዬሱሳ ቶሁዋ ቦላ ጉፋኒዲ ኢያ ጋላቲስ።

¹⁷ ዬሱሲ፥ «ፓፂዳይ ታሙ ኣሳታ ጊዶኮናዬ? ያቲን፥ ኡዱፉናቲ ኣው ቢዶና?

¹⁸ ሃ ኣላጋ ኡራፔ ኣቲን ሃሪ ሲሚዲ ፆሳ ጋላቴይ ዴና ጉሴዬ?» ያጊዲ ኦይቺስ።

¹⁹ ኡራኮ፥ «ኔ ኣማኖይ ኔና ፓꬂስ፤ ዴንዳዳ ባ» ያጊስ።

²⁰ ፋሪሳዌቲ፥ «ፆሳ ካዎቴꬃይ ኣዉዴ ያኔ?» ጊዲ ዬሱሳ ኦይቺዶሶና። ኢ፥ «ፆሳ ካዎቴꬃይ ቤንቲያ ማላን ዬና።

²¹ ቃሲካ ኢዮ፥ ‹ሃኒና ዎይኮ ሂኒና ያጋናው ዳንዳዔና። ኣይስ ጊኮ፥ ፆሳ ካዎቴꬃይ ሂንቴ ጊዶን ዴዔስ› » ያጊዲ ዛሪስ።

²² ዬሱሲ ባ ታማሬታኮ፥ «ኣሳ ናዓ ጋላሳታፔ ኢሱዋ ቤዓናው ሂንቴ ኣሞቲያ ዎዴይ ያና፥ ሺን ሂንቴ ቤዔኬታ።

²³ ኣሳይ፥ ‹ኢ ያን ዴዔስ› ዎይኮ፥ ‹ሃይሳን ዴዔስ› ያጋና፥ ሺን ኤንታና ካሊዲ ቦፒቴ።

²⁴ ዎልዓንꬂ ዎልዓሚዲ ሳሉዋ ጋፃፔ ጋፃ ፖዒሲያ ሜላ ኣሳ ናዓ ዩሳ ጋላሳይ ሄሳዳ ሃናና።

²⁵ ሺን ሄሲ ሃናናፔ ሲንꬄ ኣሳ ናዓይ ዳሮ ዋያናዉኔ ሃ ዬሌቴꬃን ኢፄታናው ቤሴስ።

²⁶ ኖሄ ዎዴ ሃኒዳይሳ ሜላ ኣሳ ናዓ ዎዲያንካ ሄሳዳ ሃናና።

²⁷ ኖሄይ ማርካቢያን ጌሊዳ ቃማ ጋካናው ኣሳይ ሚሼኔ ኡዪሼ፥ ኤኪሼኔ ጌሊሼ ዴዒሺን ꬋዮ ሃꬃይ ዪዲ ኡባ ꬋይሲስ።

²⁸ ሎፄ ላይꬃንካ ሄሳꬆ ሃኒስ። ኣሳይ ሚሼኔ ኡዪሼ፥ ሻሚሼኔ ባይዚሼ፥ ቶኪሼኔ ኬፂሼ፥ ጋምዒዶሶና።

²⁹ ሎፄይ ሶዶሜፔ ኬዪዳ ጋላስ ዲኔ ጌቴቲያ ፁጊያባይ ሳሎፔ ቡኪዲ ኡባ ꬋይሲስ።

³⁰ ኣሳ ናዓይ ቆንጪያ ዎዴካ ሄሳዳ ሃናና።

³¹ «ሄ ጋላሳን ኦኒካ ካሬን ዴዔይ ኬꬃ ጊዶን ዴዒያባ ኤካናው ሶ ጌሎፖ። ሄሳዳካ፥ ጋዴን ዴዒያ ኣሲ ኣይኮስካ ሶ ሲሞፎ።

³² ሎፄ ማቺው ኣኬኪቴ፤

³³ ባ ሼምፒው ኣሻናው ኮያ ኣሲ ኦኒካ ꬋይሳና፤ ባ ሼምፒው ኣꬂ ኢሚያ ኦኒካ ኢ ኣሻና።

² He uray kaalotappe issuwa balethanaappe woxa ba qoodhen qachchidi abban wulliko iyaw lo77o.

³ Hessa gisho naagettite. “Ne ishay nagara oothiko hanqetta; qiirottidi maarotethan simmiko, iyaw atto yaaga.

⁴ Issi gallasan laappun toho qohidi, laappun toho, ‘Taani ta balaa eras tana maara’ yaagidi neekko yiikko iyaw atto ga.”

⁵ Hawaareti Godaakko, “Ammano nuus gujjarkkii” yaagidosona.

⁶ Goday, “Gaashe ayfe mela ammanoy hinttew de7ikko ‘Hayssa wolaa shodettada abbaa giddon toketta’ yaagikko hinttew kiitettana” yaagis.

⁷ Gujjidikka Yesuusi, “Hintte giddofe issuwas goshshanchchoy woykko dorsse heemmiya aylley de7ikko ooso gadeppe woykko wudeppe soo simmiya wode ‘Elle haayada kathi maanaw utta’ yaagey de7ii?

⁸ Deenna, ‘Taw kaho giigisa; taani mada, uyada aggana gakkanaw eqqada muza. Hessafe guye, neeni qassi maasanne uyaasa’ yaagenneyye?

⁹ Hiza, goday, aylley kiitaa polida gisho anjjiyye?

¹⁰ Hessa gisho, hintteka kiitettoyssa ubbaa polida wode ‘Nu pathonna aylleta; oothanaw bessiya oosuwa polida’ yaagite” yaagis.

¹¹ Yesuusi Yerusalaame bishe Samaarisinne Galiila biittaas giddora kanthidi aadhdhis.

¹² Issi gutaa geliya wode baro harggen oykettida tammu asati iya demmidosona. Enttika haahon eqqidi,

¹³ “Godaa Yesuusa, nuus qadhettarkii” yaagidi waassidosona.

¹⁴ I entta be7ida wode “Bidi hinttenatethaa Ayhude kahine bessite” yaagis. Entti ogiya bolla bishe paxidosona.

¹⁵ Enttafe issoy ba paxuwa be7ida wode dhoqqu gida qaalan Xoossaa bonchchishe Yesuusakko simmis.

¹⁶ I Samaare biitta asi, shin Yesuusa tohuwa bolla gufannidi iya galatis.

¹⁷ Yesuusi, “Paxiday tammu asata gidokkonaayye? Yaatin, uddufunati aw bidonaa?

¹⁸ Ha allaga uraappe attin hari simmidi Xoossaa galatey deenna guusseyye?” yaagidi oychchis.

¹⁹ Uraakko, “Ne ammanoy nena pathis; denddada ba” yaagis.

²⁰ Farisaaweti, “Xoossaa kawotethay awude yaanee?” gidi Yesuusa oychchidosona. I, “Xoossaa kawotethay benttiya mallan yeenna.

²¹ Qassika iyo, ‘Hannina woykko hinina yaaganaw dandda7enna. Ays giikko, Xoossaa kawotethay hintte giddon de7ees’ ” yaagidi zaaris.

²² Yesuusi ba tamaaretakko, “Asa Na7aa gallasatappe issuwa be7anaw hintte amottiya wodey yaana, shin hintte be7ekketa.

²³ Asay, ‘I yan de7ees’ woykko, ‘Hayssan de7ees’ yaagana, shin enttana kaallidi booppite.

²⁴ Wol77anthi wol77ammidi saluwa gaxappe gaxa poo7isiya mela Asa Na7aa yuussaa gallasay hessada hanana.

²⁵ Shin hessi hananaappe sinthe Asa Na7ay daro waayanawunne ha yeletethan ixettanaw bessees.

²⁶ Nohe wode hanidayssa mela Asa Na7aa wodiyankka hessada hanana.

²⁷ Nohey Markkabiyan gelida qammaa gakkanaw asay mishenne uyishe, ekkishenne gelishe de7ishin dhayo haathay yidi ubbaa dhayssis.

²⁸ Looxe laythankka hessatho hanis. Asay mishenne uyishe, shammishenne bayzishe, tokkishenne keexishe, gam77idosona.

²⁹ Looxey Soodomeppe keyida gallas diinne geetettiya xuuggiyabay saloppe bukkidi ubbaa dhayssis.

³⁰ Asa Na7ay qoncciya wodekka hessada hanana.

³¹ “He gallasan oonikka karen de7ey keethaa giddon de7iyabaa ekkanaw soo geloppo. Hessadakka, gaden de7iya asi aykkoskka soo simmofo.

³² Looxe machchiw akeekite;

³³ ba shemppiw ashshanaw koyaa asi oonikka dhayssana; ba shemppiw aathi immiya oonikka I ashshana.