ሉቃሳ 12:2-31 in Gofa

² ቆንጮና ቆሴቲዲ፥ ኤሬቶና ጌሚዲ ኣቲያባይ ኣይኮይካ ባዋ።

³ ሂዛ፥ ሂንቴ ꬉማን ኦዲዳባይ ኡባይ ፖዖን ሲዔታና፥ ቆልዓ ጋꬃን ካልካሺዳባይ ዳባባን ኦዴታና።

⁴ «ታ ባጋቶ፥ ታ ኦዴይሳ ሲዒቴ፤ ኣሹዋ ዎꬎሶናፔ ኣቲን ሃራ ኣይኮካ ኦꬃናው ዳንዳዖናይሳታስ ባቦፊቴ።

⁵ ሃኖሺን፥ ሂንቴ ባባናው ቤሴይሳ ታ ሂንቴው ቆንጪሳና። ሄሲካ ዎꬊዳፔ ጉዬ ጋናሜን ዬጋናው ዎልቃይ ዴዔይሳስ ኢያው ባቢቴ። ኤ፥ ቱማ ጋይስ፤ ኢያው ባቢቴ።

⁶ ኢቻሹ ቡቤቲ ኢሲ ሳንቲሜስ ባይዜቶኮናዬ? ሃኖፔ ኣቲን ኤንታፌ ኢሲናካ ፆሳ ሲንꬃን ዶጌቱኩ።

⁷ ሃሪ ኣቶሺን፥ ሂንቴ ሁዔ ቢናናይካ ፓይዴቲዲ ዴዔስ። ሂዛ፥ ባቦፊቴ፤ ዳሮ ቡቤታፔ ሂንቴ ኣꬌታ።

⁸ «ታ ኦዴይሳ ሲዒቴ፤ ኣሳ ሲንꬃን ታው ማርካቲያ ኡባስ ኣሳ ናዓይ ፆሳ ኪታንቾታ ሲንꬃን ማርካታና።

⁹ ኣሳ ሲንꬃን ታና ካዴይሳስ ፆሳ ኪታንቾታ ሲንꬃን ታ ኢያ ካዳና።

¹⁰ ኣሳ ናዓ ቦላ ካꬌ ቃላ ሃሳያ ኡባይ ማሮታ ዴማና፥ ሺን ጌሻ ኣያና ቦላ ካꬌ ቃላ ኦዴቴይሲ ማሬቴና።

¹¹ «ኣሲ ሂንቴና ኦይኪዲ ኣይሁዴ ዎሳ ኬꬃን፥ ዳይናታ ሲንꬃኒኔ ካዎታ ሲንꬃን ጎሼቺያ ዎዴ ኣይ ኦዳኔኮኔ ዎይጊ ዛራኔኮ ሂርጎፊቴ።

¹² ሄ ዎዴ ሂንቴ ኦዳናባ ጌሻ ኣያናይ ሂንቴና ታማርሳና» ያጊስ።

¹³ ኣሳ ጊዶፌ ኢሲ ኣሲ ዬሱሳኮ ዪዲ፥ «ታ ኢሻይ ታው ኑ ኣዋ ላታፔ ሻካና ሜላ ኢያው ኦዳ» ያጊስ።

¹⁴ ዬሱሲ ዛሪዲ፥ «ላ ኣዲያው፥ ሂንቴ ቦላ ታና ዳይናኔ ላታ ሻኪያ ጪማ ኦꬂዳይ ኦኔ?» ያጊስ።

¹⁵ ቃሲካ ዬሱሲ፥ «ኣሳ ዴዖይ ሻሎ ዳሮቴꬃን ጊዶና ጊሾ ያሬ ኣጊዲ ሚንꬂዲ ሂንቴና ናጊቴ» ያጊስ።

¹⁶ ካሊዲካ ሌሚሶን፥ «ጋዴይ ዳሮ ካꬂ ኢሚያ ኢሲ ዱሬ ኡራይ ዴዔስ።

¹⁷ ሄ ኡራይ፥ ‹ታ ካꬃ ታኒ ሺሻናው ቤሲ ጉፂዳ ጊሾ ኣይ ኦꬆ?› ያጊዲ ባ ዎዛናን ቆፒስ።

¹⁸ ሂዛፔ ያታና፤ ካሴ ዴዒያ ሻሌታ ላላዳ ሃራ ዳልጋ ሻሌታ ኬፃና። ካꬃኔ ታው ዴዒያባ ኡባ ኢያን ዬጋና።

¹⁹ ባ ሼምፔኮ፥ ‹ታ ሼምፔቴ፥ ዳሮ ላይꬃስ ኔው ጊዲያ ሻሎ ሺሻስ። ሂዛ፥ ሼምፓዳ ማ፥ ኡያ፥ ኡፋይታ› ያጋና።

²⁰ «ሺን ፆሳይ፥ ‹ላ፥ ኤያ ኣዲያው፥ ሃቺ ቃማ ኔ ሼምፒያ ኔፔ ኤኬታዉሱ። ሂዛ፥ ኔ ሺሺዳባይ ኦዴስ ጊዳኔ?› ያጊስ።

²¹ «ሄሳ ጊሾ፥ ባው ዱሬቴꬂ ሳዓን ሺሺያ ኣሳስ፥ ፆሳ ማታን ዱሬ ጊዶና ኣሳስ ዉርሴꬃይ ሃ ኡራይሳ ሜላ» ያጊስ።

²² ሄሳፌ ጉዬ፥ ዬሱሲ ባ ታማሬታኮ፥ «ሂዛ፥ ታ ኦዲያባ ሲዒቴ፥ ሂንቴ ሼምፑዋስ ኣይ ሚኖ ሂንቴ ቦላስ ኣይ ማዒኖ ያጊዲ ኡንዔቶፊቴ።

²³ ሼምፖይ ካꬃፌ ቦሊ ኣፊላፔ ኣꬌስ።

²⁴ ካፎታ ቤዒቴ ዜሮኮና፥ ኪሾኮና፥ ኤሌይካ ሻሌይካ ባዋ። ሺን ፆሳይ ኤንታና ሙዜስ። ሂንቴ ካፎታፔ ዳሮ ኣꬌታ።

²⁵ ሃኖሺን፥ ሂንቴፌ ኡንዔቲዲ ባ ላይꬃ ቦላ ኢሲ ቃማ ጉጃናው ዳንዳዔይ ኦኔ?

²⁶ ሂዛ፥ ሃ ጉꬃባ ኦꬃናው ዳንዳዖና ሂንቴ ሃራባስ ኣይስ ኡንዔቴቲ?

²⁷ ኣኔ ጪሻቲ ዋኒዲ ዲጪያኮ ቤዒቴ። ዋዮኮናኔ ሱቆኮና። ሃሪ ኣቶሺን፥ ሶሎሞኔይ ባ ዴዒያ ቦንቾ ኡባን ኤንታፌ ኢሱዋ ሜላካ ማዒቤና።

²⁸ ሂንቴኖ፥ ኣማኖይ ፓጪዳይሳቶ፥ ሂዛ፥ ፆሳይ ሃቺ ቤንቲዲ ዎንቶ ታማን ዬጌታና ጪሻታ ሃይሳዳ ማይዚኮ፥ ሂንቴና ዋቲ ኣꬂ ማይዜኔ?

²⁹ ሄሳ ጊሾ፥ ኣይ ሚኖ ዎይኮ ኣይ ኡዪኖ ጊዲ ኡንዔቶፊቴ።

³⁰ ሄ ኡባስ ፆሳ ኣማኖና ኣሳቲ ኡንዔቶሶና። ሺን ሂንቴ ኣዋይ ፆሳይ ሄሲ ኡባይ ሂንቴው ኮሼይሳ ኤሬስ።

³¹ ኡባፌ ኣꬂዲ ፆሳ ካዎቴꬃ ኮዪቴ ሄሲ ኡባይ ሂንቴው ጉጂ ኢሜታና።

² Qoncconna qosettidi, erettonna geemmidi attiyaabay aykkoyka baawa.

³ Hiza, hintte dhuman odidabay ubbay poo7on si7ettana, qol77a gaathan kalkkashidabay dabaaban odettana.

⁴ “Ta baggato, ta odeyssa si7ite; ashuwa wodhoosonappe attin haraa aykkoka oothanaw dandda7onnayssatas babbofite.

⁵ Hanoshin, hintte babbanaw besseyssa ta hinttew qonccisana. Hessika wodhidaappe guye Gaannamen yegganaw wolqqay de7eyssas iyaw babbite. Ee, tuma gays; iyaw babbite.

⁶ Ichchashu buubbeti issi santimes bayzettokonaayye? Hanoppe attin enttafe issinnaka Xoossaa sinthan dogetuku.

⁷ Hari attoshin, hintte huu7e binaanaykka paydettidi de7ees. Hiza, babbofite; daro buubbetappe hintte aadhdheeta.

⁸ “Ta odeyssa si7ite; asa sinthan taw markkattiya ubbaas Asa Na7ay Xoossaa kiitanchchota sinthan markkattana.

⁹ Asa sinthan tana kaddeyssas Xoossaa kiitanchchota sinthan ta iya kaddana.

¹⁰ Asa Na7a bolla kadhe qaala haasayaa ubbay maarota demmana, shin Geeshsha Ayyaana bolla kadhe qaala odetteyssi maaretenna.

¹¹ “Asi hinttena oykkidi Ayhude Woosa Keethan, daynnata sinthaninne kawota sinthan gooshechchiya wode ay odaneekkonne woygi zaaraneekko hirggofite.

¹² He wode hintte odanabaa Geeshsha Ayyaanay hinttena tamaarssana” yaagis.

¹³ Asaa giddofe issi asi Yesuusakko yidi, “Ta ishay taw nu aawa laatappe shaakkana mela iyaw oda” yaagis.

¹⁴ Yesuusi zaaridi, “La addiyaw, hintte bolla tana daynnanne laata shaakkiya cima oothiday oonee?” yaagis.

¹⁵ Qassika Yesuusi, “Asa de7oy shalo darotethan gidonna gisho yaare aggidi minthidi hinttena naagite” yaagis.

¹⁶ Kaallidikka leemison, “Gadey daro kathi immiya issi dure uray de7ees.

¹⁷ He uray, ‘Ta kathaa taani shiishanaw bessi guuxida gisho ay ootho?’ yaagidi ba wozanan qoppis.

¹⁸ Hizappe yaatana; kase de7iya shaaleta laallada haraa dalgga shaaleta keexana. Kathaanne taw de7iyaba ubbaa iyan yeggana.

¹⁹ Ba shemppeeko, ‘Ta shemppete, daro laythas new gidiya shalo shiishas. Hiza, shemppada ma, uya, ufaytta’ yaagana.

²⁰ “Shin Xoossay, ‘La, eeya addiyaw, hachchi qamma ne shemppiya neeppe ekettawusu. Hiza, ne shiishidabay ooddees gidanee?’ yaagis.

²¹ “Hessa gisho, baw duretethi sa7an shiishiya asas, Xoossaa matan dure gidonna asaas wurssethay ha urayssa mela” yaagis.

²² Hessafe guye, Yesuusi ba tamaaretakko, “Hiza, ta odiyabaa si7ite, hintte shemppuwas ay mino hintte bollaas ay ma77ino yaagidi un77ettofite.

²³ Shemppoy kathafe bolli afilappe aadhdhees.

²⁴ Kafota be7ite zerokkona, kiishokkona, eleykka shaaleykka baawa. Shin Xoossay enttana muzees. Hintte kafotappe daro aadhdheeta.

²⁵ Hanoshin, hinttefe un77ettidi ba laythaa bolla issi qamma gujjanaw dandda7ey oonee?

²⁶ Hiza, ha guuthabaa oothanaw dandda7onna hintte harabaas ays un77etteetii?

²⁷ Ane cishshati waanidi dicciyakko be7ite. Waayokkonanne suqqokona. Hari attoshin, Solomoney ba de7iya bonchcho ubban enttafe issuwa melakka ma77ibeena.

²⁸ Hinttenoo, ammanoy paccidayssato, hiza, Xoossay hachchi benttidi wontto taman yegettana cishshata hayssada mayzikko, hinttena waati aathi mayzennee?

²⁹ Hessa gisho, ay miino woykko ay uyino gidi un77ettofite.

³⁰ He ubbaas Xoossaa ammanonna asati un77ettoosona. Shin hintte aaway Xoossay hessi ubbay hinttew koshsheyssa erees.

³¹ Ubbaafe aathidi Xoossaa kawotethaa koyite hessi ubbay hinttew gujji imettana.